കൊച്ചി: മണിക്കൂറികള്‍ നീണ്ട തെരച്ചില്‍. പ്രാര്‍ഥന. ഒടുവില്‍ എറണാകുളം കുട്ടമ്പുഴ വനമേഖലയില്‍ ഇന്നലെ മുതല്‍ കാണാതായ മൂന്ന് സ്ത്രീകളെ കണ്ടെത്തി. 14 മണിക്കൂര്‍ നീണ്ട തിരച്ചിലിനൊടുവിലാണ് ഇവരെ കണ്ടെത്തിയത്.  ആറു കിലോമീറ്റര്‍ അകലെ ഉള്‍വനത്തില്‍ അറക്കമുത്തി ഭാഗത്ത് നിന്നാണ് മൂവരെയും കണ്ടൈത്തിയത്. സ്ത്രീകള്‍ സുരക്ഷിതരാണെന്നും ആരോഗ്യ പ്രശ്‌നങ്ങളില്ലെന്നും വനം വകുപ്പ് അറിയിച്ചു.

ബുധനാഴ്ച മുതല്‍ കാണാതായ പശുവിനെ തിരഞ്ഞ് ഇന്നലെ ഉച്ചയോടെയാണ് മൂന്ന് പേരും കാടിനുള്ളിലേക്ക് പോയത്. മാളേക്കുടി മായാ ജയന്‍, കാവുംകുടി പാറുക്കുട്ടി കുഞ്ഞുമോന്‍, പുത്തന്‍പുര ഡാര്‍ളി സ്റ്റീഫന്‍ എന്നിവരെയാണ് ഇന്നലെ കാണാതായത്. കാട്ടാനക്കൂട്ടം സമീപത്തുണ്ടെന്ന മായയുടെ അവസാന സന്ദേശത്തിന് പിന്നാലെ ഫോണ്‍ ഓഫായിരുന്നു. വനപാലകരും പൊലിസും ഫയര്‍ഫോഴ്‌സും നാട്ടുകാരും ചേര്‍ന്ന് ഇവര്‍ക്കായി ഇന്നലെ രാത്രിയിലും തിരച്ചില്‍ നടത്തിയിരുന്നു.