കോഴിക്കോട്: എരഞ്ഞിക്കല്‍, കണ്ടംകുളങ്ങര സ്വദേശിയായ സൈനികന്‍ വിഷ്ണുവിനെ കാണാതായ സംഭവത്തില്‍ പ്രത്യേക അന്വേഷണ സംഘത്തിന് രൂപം നല്‍കി. അന്വേഷണ ഉദ്യോഗസ്ഥര്‍ പൂനെയിലേക്ക് യാത്ര തിരിച്ചു. എലത്തൂര്‍ എസ്.ഐക്കാണ് നാലംഗ ടീമിന്റെ ചുമതല. അന്വേഷണ സംഘത്തില്‍ രണ്ട് സൈബര്‍ വിദഗ്ധരേയും ഉള്‍പ്പെടുത്തിയിട്ടുണ്ട്. മഹാരാഷ്ട്ര പൊലീസുമായി ഇവര്‍ ബന്ധപ്പെട്ടുവെന്നാണ് ലഭിക്കുന്ന വിവരം. 

സംഭവത്തില്‍ സമഗ്രമായ അന്വേഷണം നടത്താന്‍ നിര്‍ദേശം നല്‍കിയതായി മന്ത്രി എ.കെ ശശീന്ദ്രന്‍ ഇന്നലെ അറിയിച്ചിരുന്നു. ഇക്കാര്യത്തില്‍ സൈന്യത്തിന്റെ സഹായം തേടിയതായും മന്ത്രി അറിയിച്ചു. 

ചെറിയകാരംവള്ളി സുരേഷിന്റെ മകനായ വിഷ്ണുവിനെ കഴിഞ്ഞ ബുധനാഴ്ചയാണ് കാണാതായത്. പൂനെയിലെ ആര്‍മി ഇന്‍സ്റ്റിറ്റ്യൂട്ടില്‍ നിന്ന് അവധിയെടുത്ത് നാട്ടിലേക്ക് വരുന്നതിനിടെയാണ് സംഭവം. കഴിഞ്ഞ ദിവസം അമ്മയെ വിളിച്ച് കണ്ണൂരെത്തിയെന്ന് പറഞ്ഞ വിഷ്ണുവിന്റെ മൊബൈല്‍ ഫോണ്‍ വിവരങ്ങള്‍ ശേഖരിച്ചപ്പോള്‍ അവസാന ടവര്‍ ലൊക്കേഷന്‍ കണ്ണൂരല്ലെന്നാണ് അന്വേഷണ സംഘത്തിന് ലഭിച്ചത്. വിഷ്ണുവിന്റെ അവസാന ടവര്‍ ലൊക്കേഷന്‍ പൂനെയിലെ ലോണാവാലയിലാണെന്നാണ് കണ്ടെത്തല്‍.