ദോഹ: 15 മാസത്തിലേറെയായി ഫലസ്തീനില്‍ ഇസ്‌റാഈല്‍ നടത്തിവരുന്ന കൂട്ടക്കൊല അവസാനിപ്പിക്കാനുള്ള വെടിനിര്‍ത്തല്‍ കരാര്‍ ഹമാസും ഇസ്‌റാഈലും അംഗീകരിച്ചതോടെ പശ്ചിമേഷ്യ സമാധാനത്തിലേക്ക്. വെടിനിര്‍ത്തല്‍ സംബന്ധിച്ച് മധ്യസ്ഥചര്‍ച്ചകള്‍ക്ക് നേതൃത്വം നല്‍കിയ ഖത്തര്‍ പ്രധാനമന്ത്രിയും വിദേശകാര്യമന്ത്രയുമായ മുഹമ്മദ് ബിന്‍ അബ്ദുര്‍റഹമാന്‍ ബിന്‍ ജാസിം അല്‍ഥാനിയാണ് പ്രഖ്യാപനം നടത്തിയത്.

2023 ഒക്ടോബര്‍ ഏഴിന് ഹമാസ് ബന്ദികളാക്കിയ സൈനികരടക്കമുള്ള ഇസ്‌റാഈല്‍ പൗരന്‍മാരുടെ മോചനത്തിനനുസരിച്ച് പലപ്പോഴായി ഫലസ്തീനില്‍നിന്ന് നിയമവിരുദ്ധമായി സയണിസ്റ്റ് സൈന്യം പിടിച്ചുകൊണ്ടുപോയ സ്ത്രീകളും കുട്ടികളും അടക്കമുള്ള തടവുകാരുടെ മോചനവും ഉറപ്പാക്കുന്ന വിധത്തിലാണ് കരാര്‍. മൂന്ന് ഘട്ടമായാണ് കരാര്‍ നടപ്പാക്കുക. ഓരോ ഘട്ടത്തിനുമിടയില്‍ 42 ദിവസങ്ങളുടെ ഇടവേളയുണ്ടാകും. ആദ്യഘട്ടത്തില്‍ 33 ബന്ദികളെ ഹമാസ് മോചിപ്പിക്കും. ഇതിന് ആനുപാതികമായി 2000 ഫലസ്തീന്‍ തടവുകാരെ ഇസ്‌റാഈല്‍ വിട്ടയക്കും. അതിര്‍ത്തിയുടെ 700 മീറ്റര്‍ ഉള്ളിലേക്ക് ഇസ്‌റാഈല്‍ സൈന്യം പിന്മാറുകയും ചെയ്യും. ആദ്യഘട്ടം ആരംഭിച്ച് ഏഴ് ദിവസത്തിന് ശേഷം ഈജിപ്തിനോട് ചേര്‍ന്നുള്ള റഫ അതിര്‍ത്തി തുറക്കും. ഇതുവഴി പരുക്കേറ്റ ഫലസ്തീനികള്‍ക്ക് മികച്ച ചികിത്സ ലഭ്യമാക്കാനാകും.

കരാറിന്റെ വിശദാംശങ്ങള്‍ ഇങ്ങനെയാണ്

▶️ ഞായറാഴ്ച (ജനുവരി 19) മുതല്‍ കരാര്‍ നിലവില്‍ വരും

▶️ മൂന്ന് ഘട്ടങ്ങളിലായാണ് വെടിനിര്‍ത്തല്‍ 

▶️ കരാര്‍ നടപ്പാക്കുന്നത് ഖത്തര്‍, ഈജിപ്ത്, യു.എസ് എന്നീ രാജ്യങ്ങള്‍ നിരീക്ഷിക്കും

▶️ ഗസ്സയിലേക്ക് പ്രതിദിനം 600 ട്രക്ക് ലോഡ് സഹായം അനുവദിക്കും 

▶️ 6 ആഴ്ചത്തെ ആദ്യ ഘട്ടത്തില്‍ കുട്ടികള്‍, വനിതാ സൈനികര്‍, സാധാരണക്കാര്‍, 50 വയസ്സിനു മുകളിലുള്ളവര്‍ എന്നിങ്ങനെ 33 ബന്ദികളെ ഹമാസ് മോചിപ്പിക്കും

▶️ പകരം ഒരു വനിതാ സൈനികന് 50 പലസ്തീന്‍ തടവുകാരെയും ഓരോ സാധാരണ തടവുകാരനും 30 പേരെ വീതവും മോചിപ്പിക്കും.

▶️ 2023 ഒക്ടോബര്‍ 7 മുതല്‍ ഗസ്സയില്‍നിന്ന് തടവിലാക്കിയ 19 വയസ്സിന് താഴെയുള്ള എല്ലാ സ്ത്രീകളെയും കുട്ടികളെയും ഇസ്‌റാഈല്‍ മോചിപ്പിക്കും.

▶️ രണ്ടാം ഘട്ടത്തിന്റെ ഭാഗമായി ഇസ്‌റാഈല്‍ ജയിലുകളില്‍ കഴിയുന്ന കൂടുതല്‍ പലസ്തീനികളെ മോചിപ്പിക്കുന്നതിന് പകരമായി ശേഷിക്കുന്ന എല്ലാ ബന്ദികളെയും ഹമാസും മോചിപ്പിക്കും.

▶️ ഈജിപ്തിനും പലസ്തീനും ഇടയിലുള്ള അതിര്‍ത്തി പ്രദേശമായ ഫിലാഡല്‍ഫി ഇടനാഴിയില്‍ നിന്നുള്‍പ്പെടെ ഗസ്സയില്‍ നിന്ന് ഇസ്‌റാഈല്‍ 'പൂര്‍ണ്ണമായ പിന്‍വാങ്ങല്‍' ആരംഭിക്കും.

▶️ അന്താരാഷ്ട്ര മേല്‍നോട്ടത്തില്‍ മൂന്ന് മുതല്‍ അഞ്ച് വര്‍ഷം വരെ നീണ്ടുനില്‍ക്കുന്ന പുനര്‍നിര്‍മ്മാണ പ്രവര്‍ത്തനങ്ങള്‍ നടത്തും. പകരമായി ബന്ദികളുടെ മൃതദേഹങ്ങള്‍ കൈമാറും.

▶️ പലസ്തീനികളെ ക്രമേണ ഗസ്സയുടെ വടക്ക് ഭാഗത്തേക്ക് മടങ്ങാന്‍ ഇസ്‌റാഈല്‍ അനുവദിക്കും

▶️ മോചിപ്പിക്കാമെന്ന് ഇസ്‌റാഈല്‍ സമ്മതിച്ച ആയിരം തടവുകാരില്‍ 190 പേര്‍ 15 വര്‍ഷത്തിലേറെയായി ഇസ്‌റാഈല്‍ ജയിലില്‍ കഴിയുന്നവരാണ്.

Full details of Israel-Hamas ceasefire deal