വഡോദര: വിജയ് ഹസാരെ ട്രോഫിയുടെ സെമി ഫൈനലിൽ ഹരിയാനയെ അഞ്ചു വിക്കറ്റുകൾക്ക് പരാജയപ്പെടുത്തി കർണാടക ഫൈനലിലേക്ക് മുന്നേറി. മത്സരത്തിൽ ആദ്യം ബാറ്റ് ചെയ്ത ഹരിയാന 50 ഓവറിൽ ഒമ്പത് വിക്കറ്റ് നഷ്ടത്തിൽ 237 റൺസാണ് നേടിയത്. വിജയലക്ഷ്യം പിന്തുടർന്ന കർണാടക 47.2 ഓവറിൽ അഞ്ചു വിക്കറ്റുകൾ ബാക്കിനിൽക്കെ ലക്ഷ്യം അനായാസമായി മറികടക്കുകയായിരുന്നു. 

ദേവദത്ത് പടിക്കലിന്റെ തകർപ്പൻ ബാറ്റിങ്ങിന്റെ കരുത്തിലാണ് കർണാടക വിജയിച്ചത്. 113 പന്തിൽ 86 റൺസാണ് പടിക്കൽ നേടിയത്. എട്ട് ഫോറുകളും ഒരു സിക്‌സും അടങ്ങുന്നതാണ് താരത്തിന്റെ ഇന്നിംഗ്സ്. ഇതോടെ ലിസ്റ്റ് എ ക്രിക്കറ്റിൽ 2000 റൺസ് പൂർത്തിയാക്കാനും പടിക്കലിന് സാധിച്ചു.

31 മത്സരങ്ങളിൽ നിന്നുമാണ് താരം 2000 റൺസ് നേടിയത്. 82.52 എന്ന മികച്ച ശരാശരിയിൽ ആണ് പടിക്കൽ 2000 റൺസ് പിന്നിട്ടത്.  ലിസ്റ്റ് എ ക്രിക്കറ്റിന്റെ ചരിത്രത്തിൽ ഏറ്റവും ഉയർന്ന ശരാശരിയിൽ 2000 റൺസ് നേടുന്ന താരമായും ഇതോടെ പടിക്കൽ മാറി.

കർണാടക്കായി രവിചന്ദ്രൻ സ്മരനും അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്. മൂന്ന് വീതം ഫോറുകളും സിക്സുകളും ഉൾപ്പടെ 94 പന്തിൽ 76 റൺസാണ് താരം നേടിയത്. കർണാടകയുടെ ബൗളിങ്ങിൽ അഭിലാഷ് ഷെട്ടി നാല് വിക്കറ്റുകൾ നേടി മികച്ച പ്രകടനമാണ് നടത്തിയത്. ശ്രേയസ് ഗോപാൽ, പ്രസിദ് കൃഷ്ണ എന്നിവർ രണ്ട്‌ വീതം വിക്കറ്റും ഹർദിക് രാജ് ഒരു വിക്കറ്റും നേടി.