തിരുവനന്തപുരം: രോഗികളില്‍ നിന്നും സ്വകാര്യ ലാബുകള്‍ അമിതനിരക്ക് ഈടാക്കുന്നതു തടയാനായി പരിശോധനാ നിരക്കുകള്‍ ഏകീകരിക്കാന്‍ സര്‍ക്കാര്‍ തലത്തില്‍ വിദഗ്ധ സമിതി രൂപീകരിക്കണമെന്ന് സംസ്ഥാന മനുഷ്യാവകാശ കമ്മിഷന്‍. ആവശ്യമെങ്കില്‍ സര്‍ക്കാര്‍, സ്വകാര്യ ലാബുകള്‍ ഉള്‍പ്പെടെയുള്ള എല്ലാ പരിശോധനാ സ്ഥാപനങ്ങള്‍ക്കും മാനദണ്ഡങ്ങളുടെ അടിസ്ഥാനത്തില്‍ ഗ്രേഡിങ് ഏര്‍പ്പെടുത്തി നിരക്കുകള്‍ നിശ്ചയിക്കണമെന്നും ഉത്തരവില്‍ പറയുന്നു. നിരക്കുകള്‍ സര്‍ക്കാര്‍, സ്വകാര്യ ലാബുകള്‍ പരസ്യമായി പ്രദര്‍ശിപ്പിക്കണം. തിരുവനന്തപുരം മെഡിക്കല്‍ കോളജില്‍ ലാബ് പരിശോധനയ്ക്ക് എത്തുന്ന രോഗികള്‍ക്ക് പരിശോധനാ തീയതികള്‍ നിശ്ചയിച്ച് നല്‍കുന്നതിന് കംപ്യൂട്ടര്‍വല്‍കൃത സംവിധാനം ഏര്‍പ്പെടുത്തണമെന്നും കമ്മിഷന്‍ നിര്‍ദേശിച്ചു. അത്യാവശ്യ പരിശോധനകള്‍ അടിയന്തരമായി നടത്താന്‍ പ്രത്യേക സംവിധാനം ഏര്‍പ്പെടുത്തണം. നിലവിലുള്ള പരിശോധനാ സംവിധാനങ്ങള്‍ ഞായര്‍ ഉള്‍പ്പെടെ 24 മണിക്കൂറും പ്രവര്‍ത്തിപ്പിക്കണമെന്നും കമ്മിഷന്‍ നിര്‍ദേശിച്ചു. എറണാകുളം റേഞ്ച് ഐ.ജി എസ്. ശ്രീജിത്ത് സമര്‍പ്പിച്ച അന്വേഷണ റിപ്പോര്‍ട്ട് സ്വീകരിച്ചു കൊണ്ടാണ് ഉത്തരവ്.