കോഴിക്കോട്: പി.പി.ഇ കിറ്റ് വാങ്ങിയതില്‍ സര്‍ക്കാരിന് അധിക ബാധ്യതയുണ്ടായെന്ന സിഎജി റിപ്പോര്‍ട്ടില്‍ പ്രതികരിച്ച് കോണ്‍ഗ്രസ് നേതാവ് കെ. മുരളീധരന്‍. പുരകത്തുമ്പോള്‍ വാഴ വെട്ടുക എന്ന പഴഞ്ചൊല്ല് ശൈലജ ടീച്ചര്‍ നടപ്പിലാക്കിയെന്ന് അദ്ദേഹം പറഞ്ഞു. 

ചെയ്ത തെറ്റിന് കിട്ടിയ ശിക്ഷയാണ് വടകരയിലെ തെരഞ്ഞെടുപ്പ് ഫലം. വടകരയിലെ കഴിഞ്ഞ ലോക്‌സഭാ തെരഞ്ഞെടുപ്പില്‍ പിപിഇ കിറ്റിലെ അഴിമതിയായിരുന്നു മുഖ്യ തിരഞ്ഞെടുപ്പ് വിഷയം. ശൈലജ ടീച്ചര്‍ ഒരു ലക്ഷത്തിന് മുകളില്‍ വോട്ടുകള്‍ക്ക് തോല്‍ക്കാനുള്ള മുഖ്യ കാരണം അതാണെന്നും അദ്ദേഹം വ്യക്തമാക്കി. 

കൊവിഡ് കാലത്ത് ജനം അനുഭവിച്ച ദുരിതം വിറ്റ് കാശാക്കാന്‍ ശ്രമിച്ച സര്‍ക്കാരാണ് ഇതെന്നും അതില്‍ ഒന്നാം പ്രതി മുന്‍ ആരോഗ്യമന്ത്രി കെ.കെ. ഷൈലജ ടീച്ചറാണെന്നും കോണ്‍ഗ്രസ് നേതാവ് രമേശ് ചെന്നിത്തല പറഞ്ഞു. ദുരന്തത്തെ പോലും അഴിമതിക്ക് വേണ്ടി ഉപയോഗിച്ചവര്‍ക്കെതിരേ അഴിമതിക്ക് കേസെടുക്കണമെന്നും അതുവരെ വെറുതെയിരിക്കില്ലെന്നും രമേശ് ചെന്നിത്തല വ്യക്തമാക്കി.

അതേസമയം കൊവിഡ് കാലത്ത് കുറച്ചു കിറ്റുകള്‍ കൂടുതല്‍ വിലയ്ക്ക് വാങ്ങേണ്ടിവന്നിരുന്നുവെന്ന് മുന്‍ ആരോഗ്യമന്ത്രി കെ.കെ. ശൈലജ ഇന്നലെ പ്രതികരിച്ചിരുന്നു. 'പി.പി.ഇ. കിറ്റിന് അപ്പോള്‍ ക്ഷാമമുണ്ടായിരുന്നു. സിഎജി റിപ്പോര്‍ട്ട് കണ്ടിട്ടില്ല. പക്ഷേ, നേരത്തേ നിയമസഭയില്‍ പ്രതിപക്ഷം ഈ വിഷയം ഉന്നയിച്ചപ്പോഴും ലോകായുക്തയുടെ മുന്‍പില്‍ പരാതി നല്‍കിയപ്പോഴും കാര്യങ്ങള്‍ വ്യക്തമാക്കിയതാണ്'-ശൈലജ പറഞ്ഞു.