ദുബൈ:മലിനീകരണത്തിന് സാധ്യതയുള്ളതിനാല്‍ അടുത്തിടെയാണ് പെപ്പറോണി ബീഫ് സൂപ്പര്‍മാര്‍ക്കറ്റുകളില്‍ നിന്ന്  പിന്‍വലിച്ചത്. എന്നാല്‍ പിന്‍വലിച്ചതിനു ശേഷം നടത്തിയ ഗവേഷണ പഠനങ്ങളില്‍ പെപ്പറോണി ബീഫ് കഴിക്കുന്നത് സുരക്ഷിതമാണെന്ന് സ്ഥിരീകരിച്ചിരിക്കുകയാണ് യുഎഇ.

ജനുവരി 11 ന്, കാലാവസ്ഥാ വ്യതിയാന പരിസ്ഥിതി മന്ത്രാലയം പെപ്പറോണി ബീഫ് ലിസ്റ്റീരിയ മോണോസൈറ്റോജെന്‍സ് ബാക്ടീരിയകളുമായി സമ്പര്‍ക്കത്തിലേര്‍പ്പെട്ട് മലിനീകരണ സാധ്യതയുള്ളതിനാല്‍ സൂപ്പര്‍മാര്‍ക്കറ്റുകളില്‍ നിന്ന് പിന്‍വലിക്കുകയായിരുന്നു.

ഇത് ഉല്‍പ്പാദിപ്പിക്കുന്ന കമ്പനിയെ തിരിച്ചറിഞ്ഞില്ല. എന്നാല്‍ ലബോറട്ടറി പരിശോധനകള്‍ പൂര്‍ത്തിയാകുകയും സംഭവത്തിന്റെ വിശദാംശങ്ങള്‍ സ്ഥിരീകരിക്കുകയും ചെയ്യുന്നതുവരെ യുഎഇയിലെ വിപണികളില്‍ നിന്ന് ബാധിത ഉല്‍പ്പന്നം മുന്‍കരുതലായി പിന്‍വലിക്കുകയായിരുന്നു.

പ്രാദേശിക റെഗുലേറ്ററി അതോറിറ്റികളും സഊദി ഫുഡ് ആന്‍ഡ് ഡ്രഗ് അതോറിറ്റിയുമായി നടത്തിയ അന്വേഷണത്തില്‍, പ്രചാരത്തിലുള്ള ഭക്ഷ്യ ഇനത്തിന്റെ ആരോഗ്യവും സുരക്ഷയും ഉറപ്പാക്കാന്‍ ആവശ്യമായ എല്ലാ മുന്‍കരുതല്‍ നടപടികളും ബന്ധപ്പെട്ട സ്ഥാപനം സ്വീകരിച്ചിട്ടുണ്ടെന്ന് കണ്ടെത്തി.

പരിശോധനയിലൂടെ, സൂപ്പര്‍മാര്‍ക്കറ്റുകളിലുടനീളമുള്ള പ്രചാരത്തിലുള്ള ഉല്‍പ്പന്നങ്ങള്‍ ആരോഗ്യകരവും ആരോഗ്യ ആവശ്യകതകളും വ്യവസ്ഥകളും പൂര്‍ണ്ണമായും പാലിക്കുന്നവയാണെന്ന് ഉറപ്പിക്കാനും അതോറിറ്റിക്ക് കഴിഞ്ഞു.

ലിസ്റ്റീരിയ മോണോസൈറ്റോജെന്‍സ് ബാക്ടീരിയ എന്നത് ഭക്ഷണത്തിലൂടെ പകരുന്ന ഒരു ബാക്ടീരിയ രോഗമാണ്. ഇത് ഗര്‍ഭിണികള്‍ക്കും 65 വയസ്സിനു മുകളിലുള്ളവര്‍ക്കും ദുര്‍ബലമായ രോഗപ്രതിരോധ ശേഷിയുള്ളവര്‍ക്കും വളരെ ഗുരുതരമായി മാറാനുള്ള സാധ്യതയുണ്ട്. ഭക്ഷണം പ്രോസസ്സ് ചെയ്യുമ്പോഴോ തയ്യാറാക്കുമ്പോഴോ പായ്ക്ക് ചെയ്യുമ്പോഴോ ആണ് ഇത് പകരുന്നത്.

പ്രാദേശികമായി ഉല്‍പ്പാദിപ്പിക്കുന്നതോ ഇറക്കുമതി ചെയ്യുന്നതോ ആയ എല്ലാ ഭക്ഷ്യ ഉല്‍പന്നങ്ങള്‍ക്കും ഏറ്റവും ഉയര്‍ന്ന ഭക്ഷ്യ സുരക്ഷാ മാനദണ്ഡങ്ങള്‍ ബാധകമാക്കുന്നതിന് ബന്ധപ്പെട്ട വിവിധ അധികാരികളുമായി മന്ത്രാലയം പ്രവര്‍ത്തിക്കുന്നുണ്ടെന്ന് ഭക്ഷ്യ വൈവിധ്യത്തിനായുള്ള MOCCAE അസിസ്റ്റന്റ് അണ്ടര്‍സെക്രട്ടറി ഡോ. മുഹമ്മദ് സല്‍മാന്‍ അല്‍ ഹമാദി ഉറപ്പുനല്‍കി.

'ഉപഭോഗത്തിന്റെ സുരക്ഷിതത്വം എത്രയും വേഗം ഉറപ്പാക്കാനായി  പെപ്പറോണി ബീഫിനെക്കുറിച്ചുള്ള അന്വേഷണം മന്ത്രാലയം ഊര്‍ജിതമാക്കുകയാണ്,' അദ്ദേഹം കൂട്ടിച്ചേര്‍ത്തു.