ന്യൂഡല്‍ഹി: ബോളിവുഡ് നടിയും എം.പിയുമായ കങ്കണ റാവത്തിനെതിരായ മാനനഷ്ട കേസ് റദ്ദാക്കാന്‍ വിസമ്മതിച്ച് സുപ്രിം കോടതി. 2021ലെ കര്‍ഷക സമരത്തില്‍ പങ്കെടുത്ത സ്ത്രീക്കെതിരെ മോശം പരാമര്‍ശമുള്ള ട്വീറ്റ് ചെയ്തതിനായിരുന്നു അവര്‍ക്കെതിരായ കേസ്. കങ്കണയുടേത് ഒരു റീട്വീറ്റ് മാത്രമല്ലെന്ന് നിരീക്ഷിച്ച സുപ്രിം കോടതി അവരതില്‍ എരിവും പുളിയും ചേര്‍ത്തെന്നും ചൂണ്ടിക്കാട്ടി. 

പഞ്ചാബിലെ ബാത്തിന്‍ഡയില്‍ നിന്നുള്ള യ മഹീന്ദര്‍ കൗര്‍ എന്ന 73കാരിയാണ് കങ്കണക്കെതിരെ മാനനഷ്ട കേസ് നല്‍കിയത്.  2019ല്‍ സി.എ.എക്കെതിരായി നടന്ന ഷഹീന്‍ ബാഗ് പ്രതിഷേധ സമരത്തിലെ മുത്തശ്ശിയായി (ഷഹീന്‍ ബാഗ് ദാദി ബില്‍ക്കീസ്) മഹീന്ദ കൗറിനെ കങ്കണ എക്‌സിലൂടെ ചിത്രീകരിച്ചുവെന്ന് ആരോപിച്ചാണ് അവര്‍ പരാതി നല്‍കിയത്. ഇത്തരത്തിലുള്ള സ്ത്രീകളെ വെറും 100 രൂപ നല്‍കി വാടകക്കെടുക്കാന്‍ കഴിയുമെന്നും അവര്‍ അധിക്ഷേപിച്ചു. 

ALSO READ: 'ഖത്തറിനെതിരായ ആക്രമണം ലക്ഷ്യം കണ്ടില്ല' പരാജയം സമ്മതിച്ച് ഇസ്‌റാഈല്‍ സുരക്ഷാ വിഭാഗം

ഇതുമായി ബന്ധപ്പെട്ട ട്വീറ്റ്  റീട്വീറ്റ് ചെയ്യുക മാത്രമാണ് കങ്കണ ചെയ്തതെന്നാണ് അവര്‍ക്ക് വേണ്ടി ഹാജരായ അഭിഭാഷകന്‍ വാദിച്ചത്. എന്നാല്‍ കേസ് പരിഗണിച്ച ജസ്റ്റിസുമാരായ വിക്രം നാഥും സന്ദീപ് മേത്തയും ഈ വാദം അംഗീകരിക്കാന്‍  തയാറായില്ല. 

മാനനഷ്ടക്കേസ് റദ്ദാക്കാന്‍ കോടതി വിസമ്മതിച്ചതിന് പിന്നാലെ ഹരജി പിന്‍വലിക്കുകയാണെന്ന് കങ്കണയുടെ അഭിഭാഷകന്‍ കോടതിയെ അറിയിച്ചു.

കഴിഞ്ഞ മാസം പഞ്ചാബ്-ഹരിയാന ഹൈക്കോടതിയും കേസുമായി ബന്ധപ്പെട്ട കങ്കണയുടെ അപ്പീല്‍ തള്ളിയിരുന്നു. കേസുമായി ബന്ധപ്പെട്ട് ഹാജരാകണമെന്ന ബാത്തിന്‍ഡ മജിസ്‌ട്രേറ്റ് കോടതി ഉത്തരവിനെതിരെയാണ് കങ്കണ പഞ്ചാബ്-ഹരിയാന ഹൈക്കോടതിയെ സമീപിച്ചത്.

the supreme court of india has declined to quash the defamation case filed against actress kangana ranaut. the case will proceed as legal arguments continue over her controversial remarks.