\തിരുവനന്തപുരം: മനുഷ്യ-വന്യജീവി സംഘര്‍ഷത്തിങ്ങള്‍ക്ക് നല്‍കുന്ന നഷ്ടപരിഹാര തുക സംബന്ധിച്ച മാനദണ്ഡങ്ങള്‍ക്ക് ദുരന്തനിവാരണ അതോറിറ്റിയുടെ എക്‌സിക്യൂട്ടീവ് കമ്മിറ്റി അന്തിമരൂപം നല്‍കി. ചീഫ് സെക്രട്ടറി ശാരദ മുരളീധരന്റെ അധ്യക്ഷതയില്‍ ചേര്‍ന്ന യോഗത്തിലാണ് തീരുമാനം. കഴിഞ്ഞ വര്‍ഷം ചേര്‍ന്ന മന്ത്രിസഭാ യോഗം മനുഷ്യവന്യജീവി സംഘര്‍ഷം പ്രത്യേക ദുരന്തമായി പ്രഖ്യാപിക്കാന്‍ തീരുമാനിച്ചിരുന്നു. സംസ്ഥാനത്തെ വന്യമൃഗങ്ങളുടെ ആക്രമണത്തിന്റെ തീവ്രത കണക്കിലെടുത്തായിരുന്നു നടപടി. 

യോഗത്തില്‍ പാമ്പ് കടിയേറ്റുള്ള മരണം പ്രത്യേക ദുരന്തമായി ലിസ്റ്റില്‍ ഉള്‍പ്പെടുത്താനും നാല് ലക്ഷം രൂപ സംസ്ഥാന ദുരന്ത പ്രതികരണ നിധിയില്‍ നിന്ന് നല്‍കാനും ഉത്തരവായി. വന്യമൃഗ സംഘര്‍ഷത്തെ പ്രതിരോധിക്കുന്നതിനിടയില്‍  കിണറുകള്‍ / വളപ്പിലെ മതില്‍/ വേലികള്‍/ ഉണക്കുന്ന അറകള്‍/ എംഎസ്എംഇ യൂണിറ്റുകള്‍ തുടങ്ങിയ ആസ്തികള്‍ക്ക് നാശനഷ്ടം സംഭവിച്ചാല്‍ പരമാവധി ഒരു ലക്ഷം രൂപ എസ് ഡി ആര്‍ എഫില്‍ നിന്ന് അനുവദിക്കാനും തീരുമാനിച്ചു. 

പുറമെ വനം വകുപ്പില്‍ സംസ്ഥാന തലത്തിലും ഡിവിഷന്‍ തലത്തിലും കണ്‍ട്രോള്‍ റൂമുകള്‍ സ്ഥാപിക്കും.  ഇതിനായി  3 കോടി 72  ലക്ഷം രൂപക്കുള്ള നിര്‍ദ്ദേശം അംഗീകരിച്ചു. ഇത്  ഒറ്റത്തവണ ഗ്രാന്‍ഡാണ്.  സംസ്ഥാന വനം എമര്‍ജന്‍സി ഓപ്പറേഷന്‍ സെന്റര്‍,  ഡിവിഷണല്‍ വനം എമര്‍ജന്‍സി ഓപ്പറേഷന്‍ സെന്റര്‍ എന്നിവയുടെ പ്രവര്‍ത്തനച്ചെലവും വാര്‍ഷിക പരിപാലനച്ചെലവും വനംവകുപ്പ് വഹിക്കും.

government decided to pay Rs 4 lakh compensation in death due to snake bite