ഫുട്ബോളിൽ രണ്ട് പതിറ്റാണ്ടുകളായി ആധിപത്യം പുലർത്തുന്ന ഇതിഹാസ താരങ്ങളാണ് ക്രിസ്റ്റ്യാനോ റൊണാൾഡോയും ലയണൽ മെസിയും. ഇവരിൽ ഏറ്റവും മികച്ച താരമാരാണെന്ന് ഫുട്ബോൾ ലോകത്ത് എല്ലാ കാലത്തും സജീവമായി നിലനിൽക്കുന്ന ചർച്ചാ വിഷയമാണ്. ഇപ്പോൾ ഗോട്ട് ഡിബേറ്റിൽ ഇരു താരങ്ങളെയും കുറിച്ച് സംസാരിക്കുകയാണ്  മുൻ  പോർച്ചുഗൽ താരം ഡെക്കോ. കളിക്കളത്തിൽ ഒരുമിച്ച് കളിച്ചിട്ടുള്ളതിൽ വെച്ച് ഏറ്റവും പൂർണനായ താരമാണ് മെസിയെന്നും എന്നാൽ റൊണാൾഡോ ഇപ്പോഴും കാര്യങ്ങൾ പഠിക്കാൻ ആഗ്രഹിക്കുന്നുവെന്നാണ് ഡെക്കോ അഭിപ്രായപ്പെട്ടത്. 

 ''ഞാൻ കളിച്ചിട്ടുള്ളതിൽ വെച്ച് ഏറ്റവും പൂർണ്ണതയുള്ള കളിക്കാരൻ മെസിയാണ്. ക്രിസ്റ്റ്യാനോയെക്കുറിച്ച് എന്നെ ഏറ്റവും കൂടുതൽ ആകർഷിച്ച കാര്യം അദ്ദേഹം എപ്പോഴും പഠിക്കാൻ ആഗ്രഹിക്കുന്നു എന്നതാണ്. തുടക്ക കാലങ്ങളിൽ അദ്ദേഹം ഫൗളുകൾ ചെയ്തിരുന്നില്ല'' ഡെക്കോ ബാഴ്സ യൂണിവേഴ്സലിന് നൽകിയ അഭിമുഖത്തിൽ പറഞ്ഞു, 

ബാഴ്സലോണയിലാണ് മെസിക്കൊപ്പം ഡെക്കോ ഒരുമിച്ച് കളിച്ചിട്ടുള്ളത്. അർജന്റിന താരത്തിനൊപ്പം 79 മത്സരങ്ങളിലാണ് ഡെക്കോ ഒരുമിച്ചു കളിച്ചത്. ഇതിൽ ഒമ്പത് സംയുക്ത  ഗോളുകളും ഇരുവരും സ്വന്തമാക്കിയിട്ടുണ്ട്. 

മറുഭാഗത്ത് പോർച്ചുഗൽ ദേശീയ ടീമിനൊപ്പം ആണ്  ഡെക്കോ ഒരുമിച്ച് കളിച്ചത്. 57 മത്സരങ്ങളിലാണ് ഇരുവരും ദേശീയ ടീമിൽ ഒരുമിച്ച് കളിച്ചത്. ഇതിൽ ഇരുവരും അഞ്ചു ഗോളുകളും സ്വന്തമാക്കിയിട്ടുണ്ട്.

അതേസമയം മെസിയും റൊണാൾഡോയും ഇപ്പോഴും ഫുട്ബോളിൽ മിന്നും പ്രകടനങ്ങളാണ് തങ്ങളുടെ ടീമുകൾക്ക് വേണ്ടി നടത്തിക്കൊണ്ടിരിക്കുന്നത്. മെസി നിലവിൽ മേജർ ലീഗ് സോക്കർ ക്ലബായ ഇന്റർ മയാമിക്ക് വേണ്ടിയാണ് കളിക്കുന്നത്. മെസിയുടെ വരവോടെ ഇന്റർ മയാമി ലീഗിൽ മിന്നും പ്രകടനമായിരുന്നു നടത്തിയിരുന്നത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. 

റൊണാൾഡോ സഊദി പ്രൊ ലീഗ് ക്ലബായ അൽ നസറിന്റെ താരവുമാണ്. റൊണാൾഡോയുടെ വരവിന് പിന്നാലെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. അൽ നസറിന് വേണ്ടി ഇതുവരെ തകർപ്പൻ പ്രകടനങ്ങളാണ് റൊണാൾഡോ നടത്തിക്കൊണ്ടിരിക്കുന്നത്. അൽ നസറിനായി 99 ഗോളുകളാണ് റൊണാൾഡോ നേടിയിട്ടുള്ളത്. 

Deco talks about lionel messi and cristaino ronaldo