തിരുവനന്തപുരം: കേരളത്തിന്റെ പ്രകൃതിസൗന്ദര്യവും വന്യജീവികളുടെ സമൃദ്ധിയും ഇനി ഒരൊറ്റ ക്ലിക്കില്‍ അനുഭവിക്കാം. കേരള വനം വകുപ്പിന്റെ പുതിയ കേന്ദ്രീകൃത ഇക്കോടൂറിസം വെബ് പോര്‍ട്ടല്‍ ecotourism.forest.kerala.gov.in hgn. വനം മന്ത്രി എ.കെ ശശീന്ദ്രന്‍ ജൂലൈ മൂന്നിന് വനംമഹോത്സവത്തിന്റെ ഭാഗമായി പോര്‍ട്ടല്‍ ഉദ്ഘാടനം ചെയ്തു.

സംസ്ഥാനത്തെ 80ല്‍ പരം ഇക്കോടൂറിസം കേന്ദ്രങ്ങളിലേക്കുളള പ്രവേശന ടിക്കറ്റുകള്‍ നിങ്ങള്‍ക്കിനി വീട്ടില്‍ ഇരുന്ന് തന്നെ ബുക്ക് ചെയ്യാം. വ്യത്യസ്ത പാക്കേജുകള്‍, ക്യാന്‍സലേഷന്‍, റീഫണ്ട് സൗകര്യങ്ങള്‍, ഉപഭോക്തൃ സേവനം, വനശ്രീ ഉല്‍പന്നങ്ങളുടെ വാങ്ങല്‍ എന്നിവയൊക്കെ ഇനി ഒരു പ്ലാറ്റ്‌ഫോമില്‍ നിങ്ങള്‍ക്ക് സാധ്യമാണ്. ടിസ്സര്‍ ടെക്‌നോളജീസ്, സംസ്ഥാന വന വികസന ഏജന്‍സി (SFDA)  എന്നിവയുടെ സഹകരണത്തോടെയാണ് ഈ പോര്‍ട്ടലിന്റെ സാങ്കേതിക സമന്വയം സാധ്യമാക്കിയിരിക്കുന്നത്. ഉദ്ഘാടന ചടങ്ങില്‍ എപിസിസിഎഫ് ഡോ. പി. പുകഴേന്തി, ഡോ. ജെ. ജസ്റ്റിന്‍ മോഹന്‍ തുടങ്ങിയവരും സന്നിഹിതരായിരുന്നു. കൂടുതല്‍ സൗകര്യങ്ങള്‍ ഒരുക്കി പോര്‍ട്ടലിന്റെ രണ്ടാം ഘട്ട നവീകരണവും വനം വകുപ്പിന്റെ ആലോചനയില്‍ നടക്കുന്നുണ്ട്.