ന്യൂഡല്‍ഹി: ശശി തരൂരിനെ അതിരൂക്ഷമായി വിമര്‍ശിച്ച് മുതിര്‍ന്ന കോണ്‍ഗ്രസ് നേതാവ് പി.ജെ കുര്യന്‍. ഇംഗ്ലീഷ് വിദ്യാഭ്യാസമല്ല നേതാവാകാനുള്ള യോഗ്യത. അങ്ങനെയെങ്കില്‍ ചന്ദ്രനിലേക്ക് റോക്കറ്റ് വിട്ട എസ്.സോമനാഥിനെ നേതാവാക്കിയാല്‍ മതിയല്ലോ എന്ന് അദ്ദേഹം പരിഹസിച്ചു. 

ജനങ്ങള്‍ക്കിടയില്‍ പ്രവര്‍ത്തിച്ചാണ് നേതാവാകേണ്ടത്. ജനങ്ങള്‍ അകന്നുപോയിട്ടുണ്ടെങ്കില്‍ പാര്‍ട്ടിയെ വിമര്‍ശിക്കുന്നതിന് പകരം തിരുവനന്തപുരത്ത് താമസിച്ച് പ്രവര്‍ത്തിക്കുകയാണ് ശശി തരൂര്‍ ചെയ്യേണ്ടത്. അദ്ദേഹത്തെ തിരുവനന്തപുരത്ത് കിട്ടാറുണ്ടോയെന്നും പി.ജെ കുര്യന്‍ ചോദിച്ചു. 

രാഷ്ട്രീയ നേതൃത്വം എന്നുപറയുന്നത് ജനങ്ങളോടൊത്തുചേര്‍ന്ന് പ്രവര്‍ത്തിച്ചിട്ടുണ്ടാവുന്നതാണ്. അടിത്തട്ടില്‍നിന്ന് പ്രവര്‍ത്തിച്ചുവരുന്നയാളാണ് നേതാവ്. അല്ലാതെ നിര്‍ബന്ധപൂര്‍വ്വം ഉണ്ടാക്കിയെടുക്കുന്നതല്ല. ആദ്യം കോണ്‍ഗ്രസിന്റെ മണ്ഡലം, ബ്ലോക്ക് യോഗങ്ങളിലെല്ലാം പങ്കെടുത്ത് പ്രവര്‍ത്തിക്കണം. തരൂര്‍ പറയുന്നതില്‍ ഒരടിസ്ഥാനവുമില്ല. അദ്ദേഹത്തെ വന്നയുടന്‍ എം.പിയും മന്ത്രിയുമാക്കിയെന്നും കുര്യന്‍ കുറ്റപ്പെടുത്തി.