ഡൽഹി: ആശാ വർക്കർമാരുടെ സമരത്തെ പിന്തുണച്ച് കോൺഗ്രസ് നേതാവും വയനാട് എംപിയുമായ പ്രിയങ്ക ഗാന്ധി സംസ്ഥാന സർക്കാരിനെ വിമർശിച്ചു. അവകാശങ്ങൾക്കായി സ്ത്രീകൾ യാചിക്കേണ്ടി വരുന്നത് ദുർഭാഗ്യകരമാണെന്നും, ആശാ വർക്കർമാർ ആത്മാഭിമാനത്തിനായാണ് പോരാടുന്നതെന്നും പ്രിയങ്ക ഡൽഹിയിൽ പ്രതികരിച്ചു.

ആശാ വർക്കർമാർ വേതനത്തിൽ 7000 രൂപയുടെ വർധനവാണ് ആവശ്യപ്പെടുന്നത്. കേരളത്തിലെ ആശാ വർക്കർക്കൾ കർണാടക, തെലുങ്കാന സംസ്ഥാനങ്ങളേക്കാൾ കുറഞ്ഞ വേതനം ലഭിക്കുന്നതായും പ്രിയങ്ക ഗാന്ധി ആരോപിച്ചു. സംസ്ഥാന സർക്കാർ സമരക്കാരെ അടിച്ചമർത്താൻ ശ്രമിക്കുകയാണെന്നും, യുഡിഎഫ് അധികാരത്തിൽ എത്തുമ്പോൾ ആശാ വർക്കർമാരുടെ വേതനം വർധിപ്പിക്കുമെന്നും അവര്‍ വ്യക്തമാക്കി.

അതേസമയം, സെക്രട്ടറിയേറ്റിന് മുന്നിൽ ആരംഭിച്ച ആശാ വർക്കർമാരുടെ സമരം ഇന്ന് 20ാം ദിവസത്തിലേക്ക് കടന്നു. സമരസമിതി നേതാവ് എസ്. മിനിയയെ അനാദരവോടെ ചിത്രീകരിച്ച സി.ഐ.ടി.യു. നേതാവ് പി.ബി. ഹർഷകുമാറിന്റെ പരാമർശത്തിനെതിരെ വ്യാപക പ്രതിഷേധം ഉയരുകയാണ്. സി.പി.എം സംസ്ഥാന സെക്രട്ടറി എം.വി. ഗോവിന്ദൻ ഹർഷകുമാറിന്റെ വിവാദ പരാമർശം തള്ളിയതായി വ്യക്തമാക്കി.