സ്‌പെയ്ൻ: ലാ ലിഗയിൽ വിജയക്കുത്തിപ്പ് തുടർന്ന് റയൽ മാഡ്രിഡ്. റയോ വല്ലോക്കാനോയെ ഒന്നിനെതിരെ രണ്ട് ഗോളുകൾക്കാണ് കാർലോ ആൻസലോട്ടിയും സംഘവും പരാജയപ്പെടുത്തിയത്. മത്സരത്തിൽ റയലിന് വേണ്ടി സൂപ്പർതാരം കിലിയൻ എംബാപ്പെ ഒരു ഗോൾ നേടി മികച്ച പ്രകടനമാണ് നടത്തിയത്. റയലിനായി എംബാപ്പെ നേടുന്ന 29ാം ഗോളായിരുന്നു ഇത്. ഈ ഗോളിന് പിന്നാലെ ഒരു തകർപ്പൻ റെക്കോർഡ് സ്വന്തമാക്കാനും ഫ്രഞ്ച് സൂപ്പർതാരത്തിന് സാധിച്ചിരിക്കുകയാണ്. 

റയൽ മാഡ്രിഡിനായി അരങ്ങേറ്റ സീസണിൽ തന്നെ 29+ ഗോളുകൾ നേടുന്ന താരങ്ങളുടെ പട്ടികയിലാണ് എംബാപ്പെ ഇടം നേടിയത്. ക്രിസ്റ്റ്യാനോ റൊണാൾഡോ, റൂഡ് വാൻ നിസ്റ്റൽറൂയ്, റൊണാൾഡോ നസാരിയോ, ഡാവർ സുക്കർ, ഇവാൻ സമോറാനോ, ഹ്യൂഗോ സാഞ്ചസ് എന്നിവരാണ് ഈ പട്ടികയിലുള്ള താരങ്ങൾ. റൊണാൾഡോക്ക് ശേഷം അരങ്ങേറ്റ സീസണിൽ തന്നെ ഇത്രയധികം ഗോളുകൾ സ്കോർ ചെയ്യുന്ന ആദ്യ താരം കൂടിയാണ് എംബാപ്പെ. 

റയൽ മാഡ്രിഡിനായി അരങ്ങേറ്റ സീസണിൽ തന്നെ ഏറ്റവും കൂടുതൽ ഗോളുകൾ നേടിയ താരമെന്ന റെക്കോർഡ് ഇവാൻ സമോറാനോയുടെ പേരിലാണുള്ളത്. റയലിനായി അരങ്ങേറ്റ സീസണിൽ 39 ഗോളുകളാണ് താരം നേടിയത്. ഇതിനോടകം തന്നെ 41 മത്സരങ്ങളിൽ നിന്നും 29 ഗോളുകൾ സ്വന്തമാക്കിയ എംബാപ്പെക്ക് ഈ റെക്കോർഡ് തകർക്കാനുള്ള അവസരവും മുന്നിലുണ്ട്. റൊണാൾഡോ റയലിനായി അരങ്ങേറ്റ സീസണിൽ 35 മത്സരങ്ങളിൽ നിന്ന് 33 ഗോളുകളും 10 അസിസ്റ്റുകളും ആണ് നേടിയിട്ടുള്ളത്. ഏഴ് ഗോളുകൾ കൂടി നേടിയാൽ റൊണാൾഡോയുടെ റെക്കോർഡും ഫ്രഞ്ച് താരത്തിന് തകർക്കാൻ സാധിക്കും. 
 
മത്സരത്തിൽ എംബാപ്പെക്ക് പുറമെ ബ്രസീലിയൻ താരം വിനീഷ്യസ് ജൂനിയറും റയലിനായി ലക്ഷ്യം കണ്ടു. പെഡ്രോ ഡയസ്സാണ് റയോ വല്ലോക്കാനക്കായി ആശ്വാസ ഗോൾ നേടിയത്. ബോൾ പൊസഷനിലും റയോ വല്ലോക്കാനെയായിരുന്നു മുന്നിലുണ്ടായിരുന്നത്. 55 ബോൾ പൊസഷൻ സ്വന്തമാക്കിയ വല്ലോക്കാനോ 20 ഷോട്ടുകളാണ് റയലിൻ്റെ പോസ്റ്റിലേക്ക് ഉതിർത്തത്. ഇതിൽ ആറ് ഷോട്ടുകളും ഓൺ ടാർഗറ്റിലേക്കായിരുന്നു. മറുഭാഗത്ത് 10 ഷോട്ടുകളിൽ നിന്നും അഞ്ച് ഷോട്ടുകൾ ലക്ഷ്യത്തിൽ എത്തിക്കാൻ റയലിന് സാധിച്ചു.

നിലവിൽ ലാ ലിഗയിൽ രണ്ടാം സ്ഥാനത്താണ് റയൽ മാഡ്രിഡ്. 27 മത്സരങ്ങളിൽ നിന്നും 17 വിജയവും ആറ് സമനിലയും നാല് തോൽവിയും അടക്കം 57 പോയിൻ്റാണ് റയലിൻ്റെ കൈവശമുള്ളത്. ഇത്ര തന്നെ പോയിൻ്റുമായി ബാഴ്സലോണയാണ് ഒന്നാം സ്ഥാനത്തുള്ളത്. ഗോൾ വ്യത്യാസത്തിൽ റയലിനേക്കാൾ ബഹുദൂരം മുന്നിലാണ് ബാഴ്സ.

kylian mbappe Create a New Record in Real Mdarid in Goal Scoring