ഫ്രാങ്ക്ഫർട്ട്, മ്യൂണിക്ക് തുടങ്ങി 13 ജർമ്മൻ വിമാനത്താവളങ്ങളിലെ തൊഴിലാളികൾ നടത്തിയ ഒരു ദിവസത്തെ പണിമുടക്ക് മിക്ക വിമാനങ്ങളും റദ്ദാക്കാൻ കാരണമായി. അർദ്ധരാത്രിയിൽ ആരംഭിച്ച 24 മണിക്കൂർ പണിമുടക്കിൽ വിമാനത്താവളങ്ങളിലെ പൊതുമേഖലാ ജീവനക്കാരും ഗ്രൗണ്ട്, സെക്യൂരിറ്റി ജീവനക്കാരും പങ്കാളികളാണെന്ന് എപി റിപ്പോർട്ട് ചെയ്തു.

പണിമുടക്കിന്റെ ഭാ​ഗമായി അബൂദബി സായിദ് അന്താരാഷ്ട്ര വിമാനത്താവളത്തിനും (AUH) ഫ്രാങ്ക്ഫർട്ട് വിമാനത്താവളത്തിനും (FRA) ഇടയിലുള്ള EY121/122 വിമാനങ്ങൾ എത്തിഹാദ് റദ്ദാക്കി. അതേസമയം, മാർച്ച് 10 ന് ജർമ്മനിയിലേക്കും തിരിച്ചുമുള്ള നിരവധി ഇത്തിഹാദ് എയർവേയ്‌സ് വിമാനങ്ങൾ നിലവിലെ ഷെഡ്യൂൾ അനുസരിച്ച് സർവിസ് നടത്തുന്നുണ്ട്. എന്നാൽ, പണിമുടക്ക് കാരണം അവ തടസ്സപ്പെടാൻ സാധ്യതയുണ്ടെന്ന് എയർലൈൻ വ്യക്തമാക്കി.

ദുബൈയിലെ മുൻനിര വിമാനക്കമ്പനിയായ എമിറേറ്റ്‌സ് പുറത്തിറക്കിയ അപ്‌ഡേറ്റ് പ്രകാരം ജർമ്മനിയിലെ ആസൂത്രിതമായ വ്യാവസായിക സമരങ്ങളും വിമാനത്താവള അടച്ചുപൂട്ടലുകളും മൂലം ജർമ്മനിയിലേക്കും തിരിച്ചുമുള്ള നിരവധി വിമാന സർവിസുകൾ തടസ്സപ്പെട്ടതായി പറയുന്നു. മാർച്ച് 9ന് ദുബൈയിൽ നിന്ന് ഹാംബർഗിലേക്കുള്ള EK59 ഇനി ഹാനോവറിൽ ഇറങ്ങും, ഹാംബർഗിലേക്ക് സൗജന്യ ബസ് ട്രാൻസ്ഫറുകൾ നൽകും. ഹാംബർഗിൽ നിന്ന് ദുബൈയിലേക്കുള്ള EK60, ദുബൈയിൽ നിന്ന് ഹാംബർഗിലേക്കുള്ള EK6, ഹാംബർഗിൽ നിന്ന് ദുബൈയിലേക്കുള്ള EK62 തുടങ്ങിയ എമിറേറ്റ്‌സ് വിമാനങ്ങളും റദ്ദാക്കി. മാർച്ച് 10ന് മ്യൂണിക്കിൽ നിന്ന് ദുബൈയിലേക്കുള്ള EK52 സർവിസും, ഹാംബർഗിൽ നിന്ന് ദുബൈയിലേക്കുള്ള EK60 സർവിസും റദ്ദാക്കിയതായി എമിറേറ്റ്സ് ഉപഭോക്താക്കളോട് പറഞ്ഞു.

ഫ്രാങ്ക്ഫർട്ടിൽ നിന്ന് ദുബൈയിലേക്കുള്ള എമിറേറ്റ്‌സ് വിമാനം EK48 വൈകി സർവിസ് നടത്തുന്നു, മാർച്ച് 11 ന് EK8048 ആയി സർവിസ് നടത്തും. പുനഃക്രമീകരിച്ച സർവിസ് ഫ്രാങ്ക്ഫർട്ടിൽ നിന്ന് പ്രാദേശിക സമയം വൈകുന്നേരം 5:30 ന് പുറപ്പെട്ട് മാർച്ച് 12 ന് പ്രാദേശിക സമയം പുലർച്ചെ 3:00 ന് ദുബൈയിൽ എത്തിച്ചേരും.

ദുബൈയിൽ നിന്ന് ഫ്രാങ്ക്ഫർട്ടിലേക്കുള്ള EK45, EK47 വിമാനങ്ങൾ അവയുടെ യഥാർത്ഥ ഷെഡ്യൂൾ അനുസരിച്ച് തുടർന്നും സർവിസ് നടത്തുമെന്ന് എയർലൈൻ വ്യക്തമാക്കിയതിനാൽ, എല്ലാ സർവിസുകളും തടസ്സപ്പെടുന്നില്ല. ഹാംബർഗിലേക്കും തിരിച്ചുമുള്ള വിമാനങ്ങൾ റദ്ദാക്കിയതിൽ ബുദ്ധിമുട്ടിലായ യാത്രക്കാർ റീബുക്കിംഗിനായി അവരുടെ ബുക്കിംഗ് ഏജന്റുമായി ബന്ധപ്പെടണമെന്ന് എമിറേറ്റ്‌സ് അറിയിച്ചു. ഡ്യൂസൽഡോർഫ്, മ്യൂണിക്ക് എന്നിവിടങ്ങളിലേക്കുള്ള യാത്രക്കാർക്ക് ടിക്കറ്റ് സ്വയമേവ റീബുക്ക് ചെയ്യുകയും, ഇമെയിലിലൂടെ യാത്രാ വിവരങ്ങൾ അറിയിക്കുകയും ചെയ്യും.

ജർമ്മനിയിലെ പ്രധാന വിമാനത്താവളങ്ങളിലുടനീളം ഗ്രൗണ്ട് സർവിസുകൾ, ചെക്ക്-ഇൻ നടപടിക്രമങ്ങൾ, ബാഗേജ് കൈകാര്യം ചെയ്യൽ തുടങ്ങിയ പ്രവർത്തനങ്ങൾ നിർത്തലാക്കുന്നതിനാൽ പണിമുടക്ക് 500,000-ത്തിലധികം യാത്രക്കാരെ ബാധിക്കുമെന്നായിരുന്നു യൂറോപ്യൻ മാധ്യമങ്ങൾ റിപ്പോർട്ട് ചെയ്തത്.

വെർ.ഡി ട്രേഡ് യൂണിയനും ഫെഡറൽ സർക്കാരും തമ്മിലുള്ള വേതന തർക്കത്തിന്റെ ഫലമായായിരുന്നു തൊഴിലാളി സമരം ഉടലെടുത്തത്. പൊതുമേഖലാ തൊഴിലാളികൾക്ക് കൂടുതൽ വേതനം, മെച്ചപ്പെട്ട ബോണസ്, അധിക അവധി ദിവസങ്ങൾ എന്നിവ ആവശ്യപ്പെട്ടാണ് സമരം.

Labor protests are causing disruptions in air travel, with Emirates and Etihad canceling more flights.