കൊല്‍ക്കത്ത: മുസ്‌ലിം ജനപ്രതിനിധികള്‍ക്കെതിരെ വിദ്വേഷ പരാമര്‍ശവുമായി പശ്ചിമ ബംഗാള്‍ പ്രതിപക്ഷ നേതാവ് സുവേന്ദു അധികാരി. 2026ലെ തിരഞ്ഞെടുപ്പില്‍ ബിജെപി സര്‍ക്കാര്‍ അധികാരത്തിലെത്തിയാല്‍ മുസ്‌ലിം എംഎല്‍എമാരെ നിയമസഭയില്‍ നിന്ന് പുറത്താക്കുമെന്നാണ് ബിജെപി നേതാവ് പറഞ്ഞത്. എംഎല്‍എമാരെ ശാരീരികമായി തന്നെ സഭയില്‍ നിന്ന് പുറത്താക്കുമെന്നായിരുന്നു ബിജെപി നേതാവിന്റെ പ്രസ്താവന. 

നേരത്തെയും വിദ്വേഷ പരാമര്‍ശങ്ങളുടെ പേരില്‍ വിവാദത്തിലായ വ്യക്തിയാണ് മുന്‍ തൃണമൂല്‍ നേതാവ് കൂടിയായ സുവേന്ദു അധികാരി. കഴിഞ്ഞ ദിവസം തൃണമൂല്‍ കോണ്‍ഗ്രസിനെതിരെ രൂക്ഷ വിമര്‍ശനവുമായി ഇദ്ദേഹം രംഗത്തെത്തിയിരുന്നു. മുസ് ലിം ലീഗിന്റെ രണ്ടാം പതിപ്പ് പോലെ പെരുമാറുന്ന വര്‍ഗീയ ഭരണകൂടമാണ് മമത ബാനര്‍ജിയുടെ സര്‍ക്കാര്‍ എന്നായിരുന്നു സുവേന്ദു അധികാരി പറഞ്ഞത്. 

അതേസമയം സുവേന്ദു അധികാരിയുടെ പരാര്‍ത്തെ രൂക്ഷമായി വിമര്‍ശിച്ച് തൃണമൂല്‍ കോണ്‍ഗ്രസ് രംഗത്തെത്തി. 
മുസ്‌ലിം എംഎല്‍എമാരെ പുറത്താക്കുമെന്ന് സുവേന്ദു അധികാരി ദിവാസ്വപ്‌നം കാണുകയാണെന്നും വരാനിരിക്കുന്ന തിരഞ്ഞെടുപ്പില്‍ ബിജെപി നിലംതൊടില്ലെന്നും തൃണമൂല്‍ നേതാവ് സുഗത റോയ് പറഞ്ഞു. 

ഗുണ്ടകളുടെ പാര്‍ട്ടിയാണ് ബിജെപിയെന്നും, 2026ലെ തിരഞ്ഞെടുപ്പോടെ ബംഗാളില്‍ നിന്ന് ബിജെപി തൂത്തെറിയപ്പെടുമെന്നും മന്ത്രി ഫര്‍ഹാദ് ഹക്കീം പറഞ്ഞു. ബിജെപിയുടെ വിഭജന രാഷ്ട്രീയം ബംഗാളില്‍ വിലപ്പോവില്ലെന്നും അദ്ദേഹം കൂട്ടിച്ചേര്‍ത്തു.