കണ്ണൂര്‍: ഡോക്ടര്‍ കുറിച്ചു കൊടുത്ത മരുന്നിനു പകരം മാറി നല്‍കിയ വീര്യം കൂടിയ മരുന്ന് കഴിച്ച് ഗുരുതരാവസ്ഥയില്‍ ചികിത്സയില്‍ കഴിഞ്ഞിരുന്ന പിഞ്ചുകുഞ്ഞ് ആശുപത്രിയില്‍ നിന്ന് ഡിസ്ചാര്‍ജായി. ചെറുകുന്ന് പൂങ്കാവിലെ ഇ.പി സമീറിന്റെ മകന്‍ എട്ടുമാസം പ്രായമുളള മുഹമ്മദാണ് മരുന്ന് മാറിക്കഴിച്ചതിനെ തുടര്‍ന്ന് കരളിന് അസുഖമായി ഗുരുതരാവസ്ഥയില്‍ ആശുപത്രിയില്‍ തീവ്രപരിചരണ വിഭാഗത്തില്‍ അഞ്ചു ദിവസമായി ചികിത്സയില്‍ കഴിഞ്ഞത്. കുട്ടിയെ വെള്ളിയാഴ്ച വൈകീട്ട് ആശുപത്രിയില്‍ നിന്നു ഡിസ്ചാര്‍ജ് ചെയ്തു.

20 ദിവസം അണുബാധയൊന്നുമേല്‍ക്കാതെ അതിസൂക്ഷ്മതയോടെ കുട്ടിയെ പരിചരിക്കണമെന്ന നിര്‍ദേശം നല്‍കിയാണ് ഡോക്ടര്‍മാര്‍ ഡിസ്ചാര്‍ജ് ചെയ്തത്. കഴിഞ്ഞ എട്ടാം തിയതി ആയിരുന്നു പനി ബാധിച്ച് കുട്ടിയെ പഴയങ്ങാടിയിലെ പീടിയാട്രീഷനെ കാണിച്ചത്. കാള്‍പോള്‍ സിറപ്പ് മരുന്നാണ് ഡോക്ടര്‍ കുറിച്ചതെങ്കിലും മെഡിക്കല്‍ ഷോപ്പില്‍ നിന്ന് അധിക ഡോസിലുള്ള കാള്‍പോള്‍ ഡ്രോപ്‌സാണ് നല്‍കിയത്.

വീണ്ടും പീഡിയാട്രിഷനെ കാണിച്ചപ്പോഴാണ് മരുന്നു മാറിനല്‍കിയിരുന്നത് കണ്ടെത്തിയത്. കുട്ടിയുടെ രക്തപരിശോധന നടത്തിയ ശേഷം അടിയന്തരചികിത്സയ്ക്കായി ഡോക്ടര്‍ കണ്ണൂരിലെ സ്വകാര്യ ആശുപത്രിയിലെത്തിക്കുകയായിരുന്നു. കുട്ടിയുടെ പിതൃസഹോദരന്‍ അഷറഫിന്റെ പരാതിയില്‍ പഴയങ്ങാടി ടൗണിലെ കദീജ മെഡിക്കല്‍സിനെതിരേ പഴയങ്ങാടി പൊലിസ് കേസെടുക്കുകയും ചെയ്തു. സംഭവത്തെ തുടര്‍ന്ന് മെഡിക്കല്‍ ഷോപ്പിനെതിരേ ജനരോഷം ഉയര്‍ന്നിരുന്നു.