കൊച്ചി: ആശ വര്‍ക്കര്‍മാരുടെ ഒരാവശ്യം കൂടി അംഗീകരിച്ച് സര്‍ക്കാര്‍. ആശ വര്‍ക്കര്‍മാര്‍ നടത്തി കൊണ്ടിരിക്കുന്ന സമരം 35-ാം ദിവസം സെക്രട്ടറിയേറ്റ് വളഞ്ഞ് ഉപരോധത്തിലേക്ക് നീങ്ങിയതോടെ ഓണറേറിയം നല്‍കുന്നതിനുള്ള പത്തു മാനദണ്ഡങ്ങള്‍ സര്‍ക്കാര്‍ പിന്‍വലിച്ചു. 

ആശ വര്‍ക്കര്‍മാര്‍ നേരത്തെ ഉന്നയിച്ചിരുന്ന നിരവധി ആവശ്യങ്ങളില്‍ ഒന്നാണ് സര്‍ക്കാര്‍ ഇപ്പോള്‍ അംഗീകരിച്ചിരിക്കുന്നത്. മുന്‍പ് ഓണറേറിയം നല്‍കുന്നതിന് സര്‍ക്കാര്‍ നിശ്ചയിച്ചിരുന്ന 10 മാനദണ്ഡങ്ങള്‍ പിന്‍വലിച്ചുകൊണ്ട് സര്‍ക്കാര്‍ ഉത്തരവ് ഇറക്കി.

ഓണറേറിയം നല്‍കുന്നതിനായി മുമ്പ് സര്‍ക്കാര്‍ നിശ്ചയിച്ചിരുന്ന 10 മാനദണ്ഡങ്ങള്‍ പിന്‍വലിക്കാന്‍ തീരുമാനിച്ചതായി ആരോഗ്യ മന്ത്രി വീണ ജോര്‍ജ് കഴിഞ്ഞദിവസം നിയമസഭയെ അറിയിച്ചിരുന്നു.

വിരമിക്കല്‍ ആനുകൂല്യം നല്‍കുക, ഓണറേറിയം വര്‍ധിപ്പിക്കുക തുടങ്ങിയ ആവശ്യങ്ങള്‍ക്ക് ഒപ്പമാണ് മാനദണ്ഡങ്ങള്‍ പിന്‍വലിക്കാനും സമരക്കാര്‍ സര്‍ക്കാറിനോട് ആവശ്യപ്പെട്ടിരുന്നത്. 

ആശ വര്‍ക്കര്‍മാര്‍ സമരം തുടങ്ങിയതിനുശേഷം സര്‍ക്കാര്‍ ഓണറേറിയവും ഇന്‍സെന്റീവ് കുടിശികയും അനുവദിച്ചിരുന്നു. ഇതിനു പിന്നാലെയാണ് പത്തു മാനദണ്ഡങ്ങള്‍ പിന്‍വലിച്ചുള്ള ഉത്തരവും സര്‍ക്കാര്‍ പുറപ്പെടുവിച്ചിരിക്കുന്നത്.