തിരുവനന്തപരും: സംസ്ഥാനത്ത് വിവിധ ഇടങ്ങളില്‍ ഇന്ന് ശക്തമായ മഴയ്ക്കും, ഇടിമിന്നലിനും സാധ്യതയെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്‍കി. ഇന്ന് മൂന്ന് ജില്ലകളിലാണ് യെല്ലോ അലര്‍ട്ട് പ്രഖ്യാപിച്ചിട്ടുള്ളത്. പാലക്കാട്, വയനാട്, മലപ്പുറം ജില്ലകള്‍ക്കാണ് മുന്നറിയിപ്പുള്ളത്. ഇവിടങ്ങളില്‍ മണിക്കൂറില്‍ 40 മുതല്‍ 50 കിലോമീറ്റര്‍ വരെ വേഗതയില്‍ വീശിയേക്കാവുന്ന കാറ്റിനും സാധ്യതയുണ്ടെന്നും ജനങ്ങള്‍ ജാഗ്രത പാലിക്കണമെന്നും കാലാവസ്ഥ വകുപ്പ് മുന്നറിയിപ്പ് നല്‍കി. 

മാത്രമല്ല അടുത്ത മൂന്ന് മണിക്കൂറിനുള്ളില്‍ എറണാകുളം ജില്ലയില്‍ ഒറ്റപ്പെട്ടയിടങ്ങളില്‍ ശക്തമായ മഴയ്്ക്ക് സാധ്യതയുണ്ട്. കൂടാതെ തിരുവനന്തപുരം, ആലപ്പുഴ, കോട്ടയം, തൃശൂര്‍ ജില്ലകളില്‍ ഒറ്റപ്പെട്ട നേരിയ മഴയ്ക്കും സാധ്യതയുണ്ടെന്നും കാലാവസ്ഥ വകുപ്പ് അറിയിച്ചു. 

നാളെ മലപ്പുറം, വയനാട് എന്നിങ്ങനെ രണ്ട് ജില്ലകള്‍ക്കാണ് യെല്ലോ അലര്‍ട്ട്. മറ്റന്നാള്‍ മുതല്‍ പ്രത്യേക യെല്ലോ അലര്‍ട്ടുകള്‍ പ്രഖ്യാപിച്ചിട്ടില്ല. എങ്കിലും മഴ സാധ്യത നിലനില്‍ക്കുന്നുണ്ട്. 

മഴയോടൊപ്പം ഇടിമിന്നലും ഉണ്ടാവാന്‍ സാധ്യതയുള്ളതിനാല്‍ സംസ്ഥാനത്തുടനീളം പ്രത്യേക ജാഗ്രത നിര്‍ദേശം പുറപ്പെടുവിച്ചിട്ടുണ്ട്. ഇന്നലെ കോട്ടയം പാലയ്ക്കടുത്ത് സഹോദരങ്ങള്‍ക്ക് ഇടിമിന്നലേറ്റിരുന്നു. ആണ്ടൂര്‍ സ്വദേശികളായ ആന്‍മരിയ (22), ആന്‍ഡ്രൂസ് (17) എന്നിവര്‍ക്കാണ് പരിക്കേറ്റത്. രാത്രി ഏഴ് മണിയോട വീടിനകത്ത് വെച്ചാണ് ഇവര്‍ക്ക് മിന്നലേറ്റത്. ഇവരെ പിന്നീട് ചേര്‍പ്പുങ്കലിലെ സ്വകാര്യ ആശുപത്രിയില്‍ പ്രവേശിപ്പിക്കുകയും ചെയ്തു. ആയതിനാല്‍ ഇടിമിന്നലില്‍ നിന്ന് പ്രത്യേക ജാഗ്രത പാലിക്കാന്‍ കാലാവസ്ഥ വകുപ്പും, ദുരന്ത നിവാരണ അതോറിറ്റിയും പൊതുജനങ്ങള്‍ക്ക് മുന്നറിയിപ്പ് നല്‍കിയിട്ടുണ്ട്. 

Heavy Rain and Thunderstorm Alert in Kerala Yellow Alert Issued for Three Districts  Latest Kerala Weather Updates