തിരുവനന്തപുരം: പൊതുപരീക്ഷാ ചോദ്യപേപ്പറുകളില്‍ വീണ്ടും അക്ഷരത്തെറ്റുകള്‍ കണ്ടെത്തി. പ്ലസ് വണ്‍ ബയോളജി, കെമിസ്ട്രി പരീക്ഷകളിലെ ചോദ്യങ്ങളിലാണ് അക്ഷരത്തെറ്റുള്ളത്. ബയോളജി പരീക്ഷയുടെ പേപ്പറില്‍ മാത്രം 14 തെറ്റുകളുണ്ട്. ചോദ്യത്തിന്റെ നിര്‍മാണത്തിലും പ്രൂഫ്‌റീഡിങ്ങിലും ഗുരുതര വീഴ്ചയാണ് സംഭവിച്ചതെന്ന് അധ്യാപകര്‍ പറഞ്ഞു.

'ദ്വിബീജപത്ര സസ്യം' - 'ദി ബീജ പത്രസസ്യം' എന്നാണ് അച്ചടിച്ചിരിക്കുന്നത്. 'അവായുശ്വസനം' എന്നതിനുപകരം 'ആ വായൂ ശ്വസനം' എന്നാണ് അച്ചടിച്ചിരിക്കുന്നത്. 'വ്യത്യാസ'ത്തിനു പകരം 'വൈത്യാസം' എന്നും 'സൈക്കിളില്‍' എന്നതിനു പകരം 'സൈക്ലിളില്‍' എന്നുമാണ്. 

അതുപോലെ പ്ലസ്ടു എക്കണോമിക്‌സില്‍ 'വരുമാനം കുറയുന്നു' എന്നതിനു പകരം 'വരുമാനം കരയുന്നു' എന്നാണ് അച്ചടിച്ചിരിക്കുന്നത്. 'എളുപ്പത്തില്‍' എന്നതിന് 'എളുപ്പുത്തില്‍' എന്നും 'നല്‍കിയിരിക്കുന്ന' എന്നതിന് 'നല്‍കിയിരുക്കുന്ന' എന്നുമൊക്കെയാണ് ഉള്ളത്. 'ബാഹ്യസവിശേഷത'യ്ക്ക് 'ബാഹ്യസവിഷേത' എന്നും 'ആറു ക്ലാസുകള്‍' എന്നതിന് 'അറു ക്ലാസുകള്‍' എന്നുമൊക്കെയായി നിരവധി തെറ്റുകളാണുള്ളത്.