തിരുവനന്തപുരം: വനിതാ പൊലിസ് റാങ്ക് ഹോള്‍ഡര്‍മാരും സമരത്തിലേക്ക്. നിയമനവുമായി ബന്ധപ്പെട്ടാണ് സമരം. ഏപ്രില്‍ 2 മുതല്‍ സെക്രട്ടറിയേറ്റ് പടിക്കല്‍ നിരാഹാര സമരം നടത്താനാണ് തീരുമാനം. റാങ്ക് ലിസ്റ്റ് അവസാനിക്കാന്‍ ഒരു മാസത്തില്‍ താഴെ മാത്രമാണ് ശേഷിക്കുന്നത്. അതേസമയം, 30% ല്‍ താഴെ ഉദ്യോഗാര്‍ത്ഥികള്‍ക്ക് മാത്രമേ നിയമനം ലഭിച്ചിട്ടുള്ളുവെന്നും മത്സരാര്‍ഥികള്‍ ചൂണ്ടിക്കാട്ടുന്നു. ഇക്കാര്യം ചൂണ്ടിക്കാട്ടിയാണ് സമരം. 

വനിതാ സി.പി.ഒ റാങ്ക് ലിസ്റ്റിലെ 967 ഉദ്യോഗാര്‍ഥികളില്‍ 259 പേര്‍ക്ക് മാത്രമാണ് ഇതുവരെ നിയമന ശിപാര്‍ശകള്‍ ലഭിച്ചതെന്നും ഇവര്‍ പറയുന്നു.  ഒഴിവുകള്‍ റിപ്പോര്‍ട്ട് ചെയ്യാന്‍ പലതവണ ഓഫിസുകളെ സമീപിച്ചു. എന്നാല്‍ ഫലമൊന്നും ഉണ്ടായില്ല- ഉദ്യോഗാര്‍ഥികള്‍ ആരോപിക്കുന്നു. ഓരോ സ്റ്റേഷനിലും കുറഞ്ഞത് 6 വനിതാ സി.പി.ഒമാര്‍ ആവശ്യമാണെന്നിരിക്കെ സംസ്ഥാനത്തെ 454 പൊലിസ് സ്റ്റേഷനുകളില്‍ ഭൂരിഭാഗത്തിനും അതിന്റെ പകുതി പോലും ഇല്ലെന്നും ഉദ്യോഗാര്‍ഥികള്‍ ചൂണ്ടിക്കാട്ടുന്നു.  

പൊലിസ് സേനയിലെ ജോലിഭാരം കുറക്കുന്നതിന്റെ ഭാഗമായി അംഗബലം കൂട്ടണമെന്ന് മനുഷ്യാവകാശ കമ്മീഷനടക്കം നിര്‍ദേശിച്ചിട്ടുണ്ട്. ഈ നിര്‍ദ്ദേശങ്ങളെല്ലാം നിലവിലുണ്ടായിട്ടും ലിസ്റ്റ് വന്ന് 8 മാസത്തിനു ശേഷമാണ് ആദ്യ ബാച്ച് ജോലിയില്‍ പ്രവേശിച്ചത്- അവര്‍ ചൂണ്ടിക്കാട്ടുന്നു. ഉയര്‍ന്ന കട്ട് ഓഫും ശാരീരിക ക്ഷമത പരീക്ഷയും അടക്കം പൂര്‍ത്തിയാക്കി ലിസ്റ്റില്‍ പ്രവേശിച്ചതാണ് ഇവര്‍. റാങ്ക് ലിസ്റ്റ് കാലാവധി ഏപ്രില്‍ 19 നാണ് അവസാനിക്കുക.

Women police rank holders in Kerala have announced a hunger strike starting April 2 at the Secretariat, protesting delayed appointments and recruitment issues.