മധുര: സിപിഎമ്മിന്റെ പുതിയ ജനറല്‍ സെക്രട്ടറിയായി എം.എ ബേബിയെ തിരഞ്ഞെടുത്തു. ഇഎംഎസ് നമ്പൂതിരിപ്പാടിനു ശേഷം സിപിഎമ്മിന്റെ ദേശീയ ജനറല്‍ സെക്രട്ടറിയാകുന്ന മലയാളിയാണ് എംഎ ബേബി. 

കേരള സ്റ്റുഡന്റ്‌സ് ഫെഡറേഷനിലൂടെയാണ് എം.എ ബേബി രാഷ്ട്രീയക്കളരിയില്‍ പയറ്റിത്തെളിഞ്ഞത്. 1974ല്‍ എസ്എഫ്‌ഐ സെന്‍ട്രല്‍ എക്‌സിക്യൂട്ടീവ് കമ്മിറ്റിയില്‍ അംഗമായി. 1975ല്‍ സംസ്ഥാന എസ്എഫ്‌ഐ കമ്മിറ്റി പ്രസിഡന്റായി. 1979ല്‍ അഖിലേന്ത്യാ പ്രസിഡന്റ് സ്ഥാനവും ബേബിയെ തേടിയെത്തി. 1977ല്‍ കൊല്ലം സിപിഎം ജില്ലാ കമ്മിറ്റിയില്‍ എത്തിയ ബേബി 1984ല്‍ സംസ്ഥാന കമ്മിറ്റിയിലും 1989ല്‍ സിപിഎം കേന്ദ്ര കമ്മിറ്റിയിലും അംഗമായി. 1997ലാണ് ബേബിയെ സംസ്ഥാന സെക്രട്ടറിയേറ്റ് അംഗമായി തിരഞ്ഞെടുത്തത്.

2006ല്‍ അധികാരത്തിലേറിയ വി.എസ് മന്ത്രിസഭയില്‍ വിദ്യാഭ്യാസ, സാംസ്‌കാരിക വകുപ്പ് മന്ത്രിയായിരുന്നു എം.എ ബേബി. 2006ലും 2011ലും കുണ്ടറയില്‍ നിന്ന് നിയമസഭയിലേക്ക് തിരഞ്ഞെടുക്കപ്പെട്ടു.

1986ല്‍ രാജ്യസഭയില്‍ എത്തിയ എം.എ ബേബി 1998 വരെ ആ സ്ഥാനത്തു തുടര്‍ന്നു. കൊല്ലം പ്രാക്കുളത്ത് പിഎം അലക്‌സാണ്ടറുടെയും ലില്ലിയുടെയും എട്ടു മക്കളില്‍ ഇളയ മകനായാണ് എം.എ ബേബിയുടെ ജനനം. 

പ്രകാശ് കാരാട്ടിന്റെ പൂര്‍ണ പിന്തുണയുണ്ടായിരുന്ന എം.എ ബേബിയെ കേരള ഘടകം കൂടി പിന്തുണച്ചതോടെ ബേബിയെ എതിര്‍ത്തിരുന്ന ബംഗാള്‍ ഘടകം പിന്മാറുകയായിരുന്നു. തമിഴ്‌നാട്, കര്‍ണാടക, രാജസ്ഥാന്‍ എന്നീ സംസ്ഥാനങ്ങളില്‍ നിന്നുള്ള നേതാക്കളും ബേബിക്ക് വേണ്ടി നിലകൊണ്ടു. 

85 അംഗ കേന്ദ്ര കമ്മിറ്റിക്ക് സിപിഎം 24-ാം പാര്‍ട്ടി കോണ്‍ഗ്രസ് അംഗീകാരം നല്‍കി. കമ്മിറ്റി അംഗങ്ങളില്‍ 20 പേര്‍ വനിതകളാണ്. കമ്മിറ്റിയില്‍ മുപ്പത് പേര്‍ പുതുമുഖങ്ങളാണ്. ഇതുകൂടാതെ 18 അംഗ പിബിയേയും തിരഞ്ഞെടുത്തു. 

പിണറായി വിജയന്‍, ബി.വി. രാഘവലു, എം.എ. ബേബി, മുഹമ്മദ് സലിം, വിജു കൃഷ്ണന്‍, മറിയം ദാവ് ലെ, യു. വാസുകി, എ. വിജയരാഘവന്‍, അശോക് ദാവ് ലെ, രാമചന്ദ്ര ദോം,  തപന്‍ സെന്‍, നിലോത്പാല്‍ ബസു, എം.വി. ഗോവിന്ദന്‍, അംറ റാം,  കെ. ബാലകൃഷ്ണന്‍, ജിതേന്ദ്ര ചൗധരി, ശ്രിദീപ് ഭട്ടാചാര്യ, അരുണ്‍ കുമാര്‍ എന്നിവരാണ് പിബി അംഗങ്ങള്‍. ഇവരില്‍ 8 പേര്‍ പുതുമുഖങ്ങളാണ്.