കോഴിക്കോട്: കാരശ്ശേരി വലിയപറമ്പില്‍ പ്രതിയെ പിടികൂടാന്‍ എത്തിയ പൊലിസുകാര്‍ക്ക് വെട്ടേറ്റു. കാര്‍ മോഷണക്കേസ് പ്രതിയായ കാരശ്ശേരി സ്വദേശി അര്‍ഷദാണ് പൊലിസുകാരെ വെട്ടിപ്പരുക്കേല്‍പ്പിച്ചത്. 

വയനാട് കല്‍പ്പറ്റയില്‍ നിന്ന് ഇയാള്‍ കാര്‍ മോഷ്ടിച്ചിരുന്നു. ഈ കേസില്‍ അറസ്റ്റ് ചെയ്യാന്‍ എത്തിയപ്പോഴാണ് പൊലിസുകാര്‍ക്ക് വെട്ടേറ്റത്. വൈകീട്ട് 3:30ഓടെയാണ് സംഭവം. വയനാട് എസ്.പിയുടെ സ്‌ക്വാഡിലെ അംഗങ്ങള്‍ക്കാണ് വെട്ടേറ്റത്. സിപിഓമാരായ ശാലു, നൗഫല്‍ എന്നിവര്‍ക്കാണ് വെട്ടേറ്റത്. ഇരുവരുടെയും കൈയിലാണ് വെട്ടേറ്റത്.

വെട്ടേറ്റ പൊലിസുകാരെ മുക്കം കെ.എം.സി.ടി മെഡിക്കല്‍ കേളേജിലേക്ക് മാറ്റി. 

മുക്കം പൊലിസ് സംഭവസ്ഥലത്ത് എത്തിയിട്ടുണ്ട്. മൂന്നംഗ സംഘമാണ് പ്രതിയെ പിടികൂടാന്‍ എത്തിയത്. കുറച്ചു ദൂരെയായിരുന്നതിനാല്‍ മൂന്നാമത്തെ പൊലിസുകാരന്‍ വെട്ടേല്‍ക്കാതെ രക്ഷപ്പെട്ടു.