ആലപ്പുഴ: ശമ്പളം നല്‍കാത്തത് ചോദ്യം ചെയ്ത വീട്ടുജോലിക്കാരിയെ ക്രൂരമായി മര്‍ദ്ദിച്ച അച്ഛനും, മകനുമെതിരെ കേസ്. ആലപ്പുഴ ഹരിപ്പാട് താമല്ലാക്കല്‍ ഗുരുകൃപ വീട്ടില്‍ സൂരജ്, പിതാവ് ചെല്ലപ്പന്‍ എന്നിവര്‍ക്കെതിരെയാണ് ഹരിപ്പാട് പൊലിസ് കേസെടുത്തത്. മര്‍ദ്ദനമേറ്റ കരുവാറ്റ സ്വദേശിനി രഞ്ജി മോള്‍ (37) ആശുപത്രിയില്‍ ചികിത്സയിലാണ്. 

ഒന്നരവര്‍ഷം മുന്‍പ് സൂരജിന്റെ സഹോദരിയുടെ വീട്ടില്‍ കുട്ടിയെ നോക്കാനായി രഞ്ജി മോള്‍ ജോലി ചെയ്തിരുന്നു. ഈ വകയില്‍ 76,000 രൂപ പ്രതികള്‍ യുവതിക്ക് ശമ്പളമായി നല്‍കാന്‍ ബാക്കിയുണ്ടെന്നാണ് റിപ്പോര്‍ട്ട്. തുടര്‍ന്ന് അവിടെ നിന്ന് ഇറങ്ങിയ യുവതി പിന്നീട് താമല്ലാക്കലില്‍ തന്നെയുള്ള ബേക്കറിയില്‍ ജോലി ചെയ്ത് വരികയായിരുന്നു. 

കഴിഞ്ഞ ശനിയാഴ്ച്ച രാത്രി 8.30യോടെ ബേക്കറിയിലെത്തിയ പ്രതികള്‍ രഞ്ജിമോളെ കടയില്‍ നിന്ന് വിളിച്ചിറക്കിയ ശേഷം ക്രൂരമായി മര്‍ദ്ദിക്കുകയായിരുന്നു. ശമ്പളം നല്‍കാത്തതില്‍ പ്രതികള്‍ക്കെതിരെ യുവതി പൊലിസില്‍ പരാതി നല്‍കിയിരുന്നു. ഈ വൈരാഗ്യമാണ് ആക്രമണത്തിന് പിന്നിലെന്നാണ് രഞ്ജി മോളുടെ ആരോപണം. 

ആക്രമണത്തിന്റെ ദൃശ്യങ്ങള്‍ ഇതിനോടകം പുറത്തുവന്നിട്ടുണ്ട്. പ്രതികള്‍ യുവതിയെ തള്ളി താഴെയിടുകയും ഹെല്‍മറ്റ് ഉപയോഗിച്ച് ക്രൂരമായി മര്‍ദ്ദിക്കുകയും ചെയ്യുന്നത് ദൃശ്യങ്ങളില്‍ വ്യക്തമാണ്.

father and son brutally beat up former house maid for questioning non-payment of salary in alappuzha