അബൂദബി: ഭിന്നശേഷിക്കാര്‍ക്കായി യുഎഇയില്‍ പ്രത്യേക ബീച്ച് തുറന്നു. കാഴ്ചപരിമിതിയുള്ളവര്‍ക്കായി സംവരണം ചെയ്ത രാജ്യത്തെ പ്രഥമ ബീച്ചാണിത്. അബൂദബി കോര്‍ണിഷില്‍ ഗേറ്റ് 3 ന് സമീപമുള്ള 1,000 ചതുരശ്ര മീറ്റര്‍ ഏരിയയിലാണ് ബീച്ച് സ്ഥിതി ചെയ്യുന്നത്. 

സമൂഹത്തിലെ പ്രിയപ്പെട്ട ഒരു വിഭാഗത്തിന് സുരക്ഷിതമായി സമയം ചിലവഴിക്കാനും മികച്ച അന്തരീക്ഷം പ്രദാനം ചെയ്യുന്നതിനായാണ് ബീച്ച് രൂപകല്‍പ്പന ചെയ്തിരിക്കുന്നത്.

2025നെ കമ്മ്യൂണിറ്റി വര്‍ഷമായി പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ പ്രഖ്യാപിച്ചതില്‍ നിന്ന് പ്രചോദനം ഉള്‍ക്കൊണ്ട് അബൂദബി സിറ്റി മുനിസിപ്പാലിറ്റിയുടെ നേതൃത്വത്തില്‍, സായിദ് ഹയര്‍ ഓര്‍ഗനൈസേഷന്‍ ഫോര്‍ പീപ്പിള്‍ ഓഫ് ഡിറ്റര്‍മിനേഷനുമായി സഹകരിച്ചാണ് ബീച്ച് വികസിപ്പിച്ചിരിക്കുന്നത്. 

സുരക്ഷാ സവിശേഷതകള്‍, ആക്‌സസിബിലിറ്റി ഉപകരണങ്ങള്‍, വിനോദ സൗകര്യങ്ങള്‍ എന്നിവയാല്‍ പൂര്‍ണ്ണമായും സജ്ജീകരിച്ചിരിക്കുന്ന ഈ ബീച്ച്, സാമൂഹിക സംയോജനത്തെ പ്രോത്സാഹിപ്പിക്കുകയും കാഴ്ചപരിമിതിയുള്ളവരെ ശാക്തീകരിക്കുകയും ചെയ്യുന്ന ഒരിടമായി മാറ്റാനാണ് ലക്ഷ്യമിടുന്നത്. 

അടിസ്ഥാന സൗകര്യങ്ങള്‍ക്ക് പേരുകേട്ട അബൂദബിയുടെ പ്രശസ്തി ശക്തിപ്പെടുത്തിക്കൊണ്ട്, ലോക വികലാംഗ യൂണിയന്‍ ബീച്ചിനെ 'വികലാംഗ സൗഹൃദ ബീച്ച്' അവാര്‍ഡ് നല്‍കി അംഗീകരിച്ചു. രാവിലെ 6 മുതല്‍ അര്‍ദ്ധരാത്രി വരെ ബീച്ച് തുറന്നിരിക്കും. രാവിലെ 6 മുതല്‍ സൂര്യാസ്തമയം വരെ നീന്താനും കഴിയും. 

സന്ദര്‍ശകരുടെ സുരക്ഷ പരിഗണിച്ച് ഇവരുടെ ആവശ്യങ്ങള്‍ നിറവേറ്റുന്നതിനായി ബീച്ച് ഏരിയ പ്രത്യേകം രൂപകല്‍പ്പന ചെയ്തിട്ടുണ്ടെന്നും, ഉയര്‍ന്ന സുരക്ഷാ മാനദണ്ഡങ്ങള്‍ പാലിക്കുന്നതിനൊപ്പം, ബാഹ്യ സഹായം ആവശ്യമില്ലാത്ത തരത്തിലുള്ള സുരക്ഷിതവും സ്വതന്ത്രവുമായ നീന്തല്‍ അനുഭവം പ്രദാനം ചെയ്യുമെന്നും മുനിസിപ്പാലിറ്റി പറഞ്ഞു. കൂടാതെ, അവശ്യസേവനങ്ങള്‍ക്കായി ഒരു നഴ്‌സും ബീച്ചില്‍ ഉണ്ടാകും.

അബൂദബി സിറ്റി മുനിസിപ്പാലിറ്റി ബീച്ച് ഏരിയയില്‍ കാഴ്ചപരിമിതിയുള്ളവര്‍ക്കായി ഏര്‍പ്പെടുത്തിയിരിക്കുന്ന പ്രത്യേക സേവനങ്ങള്‍:

• നിശ്ചയദാര്‍ഢ്യമുള്ള ആളുകള്‍ക്ക് സ്ഥലത്തേക്ക് എളുപ്പത്തില്‍ ഗതാഗതം സാധ്യമാക്കുന്നതിനായി ഒരു വാഹനം.
• കാഴ്ച വൈകല്യമുള്ളവര്‍ക്കായി പ്രത്യേകം നിര്‍മ്മിച്ച പാതകള്‍
• നീന്തല്‍ പ്രദേശത്തെ നിര്‍ദ്ദേശങ്ങള്‍ അടങ്ങിയ ബ്രെയില്‍ സൈനേജ് ബോര്‍ഡ്
• ജാഗ്രതാ മണികളും ഉള്ള വേലി കെട്ടിയ നടപ്പാത.
• സുരക്ഷ ഉറപ്പാക്കാന്‍ ഒരു ലൈഫ് ഗാര്‍ഡിന്റെ മേല്‍നോട്ടത്തില്‍ നീന്തല്‍ മേഖല.

Abu Dhabi unveils a 1,000 sqm accessible beach on the Corniche, designed for visually impaired individuals. Features include Braille signage, tactile paths, and guided swimming areas, promoting inclusivity and equal access to leisure.