തിരുനാവായ (മലപ്പുറം): ഒരു സ്കൂളിലേക്ക് തന്നെ എല്ലാവർഷവും  അധ്യാപക വിദ്യാർഥികളെ ഇൻ്റേൺഷിപ്പിന് അയക്കരുതെന്ന് വിദ്യാഭ്യാസ വകുപ്പ്. ക്ലാസിലെ കുട്ടികളുടെ എണ്ണത്തിന് ആനുപാതികമായിരിക്കണം ഇന്റേൺഷിപ്പ് നടത്തുന്നവരുടെ എണ്ണം. ഒരു ഡിവിഷൻ മാത്രമുള്ള സ്കൂളിൽ ഇന്റേൺഷിപ്പ് പാടില്ലെന്നും പൊതുവിദ്യാഭ്യാസ വകുപ്പ് പുറത്തിറക്കുന്ന മാർഗ രേഖയിൽ പറയുന്നു.
ഇൻ്റേൺഷിപ്പിന് എസ്‌.സി.ഇ.ആർ.ടി തയാറാക്കിയ മാർഗരേഖ സർക്കാരിന് സമർപ്പിച്ചിരുന്നു. സമഗ്ര ഗുണമേന്മാ വിദ്യാഭ്യാസ പദ്ധതിയുടെ ഭാഗമായാണ് അധ്യാപക വിദ്യാർഥികളുടെ ഇൻ്റേൺഷിപ്പിന് മാർഗരേഖ തയാറാക്കിയത്. 

പഠിപ്പിക്കുമ്പോൾ സ്ഥിരം അധ്യാപകർ ക്ലാസിൽ ഉണ്ടാകണമെന്ന നിർദേശവും മാർഗരേഖയിലുണ്ട്. സമഗ്ര ഗുണമേന്മാ വിദ്യാഭ്യാസ പദ്ധതിയുടെ ഭാഗമായാണ് ഇൻ്റേൺഷിപ്പിന് അക്കാദമിക മാർഗരേഖ വികസിപ്പിക്കാൻ തീരുമാനിച്ചത്.
ഇന്റേൺഷിപ്പ് നിരീക്ഷിക്കാൻ പൊതുവിദ്യാഭ്യാസ ഡയരക്ട‌ർക്കും ഡി.ഇ.ഒമാർക്കുമായി പോർട്ടൽ തയാറാക്കും. 
കൈറ്റിനാണ് ഇതിൻ്റെ ചുമതല. ഇതിനൊപ്പം ഈ വർഷം ഡി.എൽ.എഡ്, ബി.എഡ് കേന്ദ്രങ്ങളിലെ അധ്യാപകർക്ക് പരിഷ്കരിച്ച പാഠപുസ്തകങ്ങളും പരീക്ഷാ രീതിയും പരിചയപ്പെടുത്തുന്നതിന് പരിശീലനവും നൽകും. മെയ് മാസത്തിലാകും പരിശീലനം.

New guidelines for teacher-student internships; Education Department says internships should not be held in the same school