കത്വ: പഹല്‍ഗാം ഭീകരാക്രമണത്തില്‍ സുരക്ഷ വീഴ്ച്ചയെ കുറിച്ച് ചോദിച്ച ദൈനിക് ജാഗരണ്‍ റിപ്പോര്‍ട്ടറെ മര്‍ദ്ദിച്ച് ബിജെപി പ്രവര്‍ത്തകര്‍. വാര്‍ത്ത റിപ്പോര്‍ട്ട് ചെയ്യാനായി കശ്മീരിലെ കത്വയിലെത്തിയപ്പോഴാണ് മാധ്യമപ്രവര്‍ത്തകന്‍ രാകേശ് ശര്‍മ്മക്ക് നേരെ ബിജെപി പ്രവൃത്തകരുടെ ആക്രമണമുണ്ടായത്. ഇയാളെ ആശുപത്രിയില്‍ പ്രവേശിപ്പിച്ചു. 

ഭീകരാക്രമണത്തിന് പിന്നാലെ ബിജെപി എംഎല്‍എ ദേവീന്ദര്‍ മന്യാല്‍, രാജീവ് ജസ്രോതിയ, ഭരത് ഭൂഷണ്‍ എന്നിവരുടെ നേതൃത്വത്തില്‍ പ്രദേശത്ത് പ്രതിഷേധ ജാഥ സംഘടിപ്പിച്ചിരുന്നു. ഇതിനിടെ റിപ്പോര്‍ട്ടര്‍ എംഎല്‍എമാരോട് സുരക്ഷ വീഴ്ച്ചയെ കുറിച്ച് ചോദിച്ചു. ഇതില്‍ പ്രകോപിതരായ പാര്‍ട്ടി അണികള്‍ റിപ്പോര്‍ട്ടര്‍ക്ക് നേരെ തിരിയുകയും ക്രൂരമായി ആക്രമിക്കുകയുമായിരുന്നു. റിപ്പോര്‍ട്ടര്‍ വിഘടനവാദത്തിന്റെ ഭാഷയില്‍ സംസാരിക്കുകയാണെന്ന് ആരോപിച്ചാണ് ബിജെപി അംഗങ്ങളുടെ ക്രൂരത. 

മര്‍ദ്ദനത്തില്‍ നിന്ന് പൊലിസാണ് മാധ്യമപ്രവര്‍ത്തകനെ രക്ഷിച്ചത്. തുടര്‍ന്ന് ആശുപത്രിയില്‍ പ്രവേശിപ്പിച്ചു. നിലവില്‍ ഇദ്ദേഹം ചികിത്സയിലാണ്. 

അതേസമയം സംഭവവത്തില്‍ ജമ്മുവിലെ മാധ്യമ പ്രവര്‍ത്തകര്‍ ശക്തമായ പ്രതിഷേധവുമായി രംഗത്തെത്തി. സംഭവത്തില്‍ ബിജെപി അണികള്‍ക്കെതിരെ കേസെടുക്കണമെന്ന് കത്വ സീനിയര്‍ പൊലിസ് സൂപ്രണ്ടിനോട് ആവശ്യപ്പെട്ടിട്ടുണ്ട്. മാത്രമല്ല പ്രതികള്‍ക്കെതിരെ ബിജെപി നടപടി എടുക്കുന്നത് വരെ പാര്‍ട്ടിയുടെ എല്ലാ പരിപാടികളും ബഹിഷ്‌കരിക്കുമെന്നും മാധ്യമപ്രവര്‍ത്തകര്‍ വ്യക്തമാക്കിയിട്ടുണ്ട്.

Rakesh Sharma, a journalist from Dainik Jagran, was reportedly attacked by BJP workers in Kathua, Jammu and Kashmir. The attack happened while he was reporting on the recent terror attack in Pahalgam and asked questions about security issues.