മസ്‌കത്ത്: ജലക്ഷാമ വെല്ലുവിളി മറികടക്കുന്നതിനായി ഗള്‍ഫ് രാജ്യങ്ങള്‍ കൂടുതല്‍ സുസ്ഥിര ജല ഉപയോഗ രീതികളിലേക്ക് മാറുന്നതായി റിപ്പോര്‍ട്ട്. ജിസിസി രാജ്യങ്ങളില്‍ ഭൂഗര്‍ഭജല ഉപയോഗം കുറയുന്നതിനൊപ്പം ശുദ്ധീകരിച്ച മലിനജലത്തിന്റെ പുനരുപയോഗം വര്‍ധിച്ചുവരുന്നതായാണ് ഏറ്റവും പുതിയ കണക്കുകള്‍ വ്യക്തമാക്കുന്നത്.

ഒമാന്‍, സൗദി അറേബ്യ, യുഎഇ, ഖത്തര്‍ തുടങ്ങിയ ഗള്‍ഫ് രാജ്യങ്ങളില്‍ വര്‍ഷങ്ങളായി ഭൂഗര്‍ഭജലമാണ് കാര്‍ഷിക ആവശ്യങ്ങള്‍ക്കും വിവിധ വ്യാവസായിക മേഖലകള്‍ക്കുമായി പ്രധാനമായും ഉപയോഗിച്ചിരുന്നത്. എന്നാല്‍ മഴയുടെ കുറവും അമിത ജല ഉപയോഗവും കാരണം ഭൂഗര്‍ഭ ജലനിരപ്പ് താഴ്ന്നത് വലിയ ആശങ്ക സൃഷ്ടിച്ചു. ചില പ്രദേശങ്ങളില്‍ കടല്‍വെള്ളത്തിന്റെ ഉപ്പുരസം ഭൂഗര്‍ഭജലത്തിലേക്ക് കലരുന്ന സാഹചര്യം വരെ രൂപപ്പെട്ടതോടെ ജലസംരക്ഷണ നടപടികള്‍ ശക്തമാക്കുകയായിരുന്നു.

ഇതോടെയാണ് ശുദ്ധീകരിച്ച മലിനജലം വിവിധ ആവശ്യങ്ങള്‍ക്കായി ഉപയോഗിക്കുന്ന പദ്ധതികള്‍ ഗള്‍ഫ് രാജ്യങ്ങള്‍ വ്യാപകമാക്കിയത്. പാര്‍ക്കുകള്‍, റോഡരികുകളിലെ ഹരിതവല്‍ക്കരണം, പൊതുതോട്ടങ്ങള്‍, വ്യാവസായിക ആവശ്യങ്ങള്‍ എന്നിവയ്ക്കായി ഇപ്പോള്‍ റീസൈക്കിള്‍ ചെയ്ത വെള്ളമാണ് കൂടുതലായും ഉപയോഗിക്കുന്നത്. കുടിവെള്ള ആവശ്യങ്ങള്‍ക്കായി ഭൂഗര്‍ഭജലം സംരക്ഷിക്കുകയാണ് ഇതിലൂടെ ലക്ഷ്യമിടുന്നത്.

ALSO READ: ഒമാനില്‍ ഊര്‍ജഖനന മേഖലയില്‍ ഇന്ന് മുതല്‍ ലൈസന്‍സ് നിര്‍ബന്ധം; ഇല്ലെങ്കില്‍ തൊഴില്‍ വിസ പുതുക്കില്ല

ജനസംഖ്യ വര്‍ധനയും നഗരവല്‍ക്കരണവും കാരണം ജല ഉപഭോഗം ഓരോ വര്‍ഷവും ഉയര്‍ന്നുവരുന്ന സാഹചര്യത്തില്‍ ഗള്‍ഫ് രാജ്യങ്ങള്‍ ജലസുരക്ഷയ്ക്ക് വലിയ പ്രാധാന്യമാണ് നല്‍കുന്നത്. സമുദ്രജലം ശുദ്ധീകരിക്കുന്ന ഡിസാലിനേഷന്‍ പ്ലാന്റുകള്‍ക്കൊപ്പം മാലിന്യജല ശുദ്ധീകരണ കേന്ദ്രങ്ങളിലേക്കും വലിയ നിക്ഷേപങ്ങളാണ് ഇപ്പോള്‍ നടക്കുന്നത്.

ഒമാനില്‍ കാര്‍ഷിക മേഖലയിലെ അമിത ജല ഉപയോഗം നിയന്ത്രിക്കാന്‍ നേരത്തെ തന്നെ വിവിധ നിയന്ത്രണങ്ങള്‍ കൊണ്ടുവന്നിരുന്നു. വെള്ളം ലാഭിക്കാനുള്ള ഡ്രിപ്പ് ഇറിഗേഷന്‍ ഉള്‍പ്പെടെയുള്ള ആധുനിക ജലസേചന രീതികള്‍ കര്‍ഷകരെ പ്രോത്സാഹിപ്പിച്ചും സര്‍ക്കാര്‍ മുന്നോട്ട് പോകുന്നു. ജല ഉപയോഗത്തില്‍ കൂടുതല്‍ നിയന്ത്രണം കൊണ്ടുവരുന്നതിനായി ബോധവത്കരണ ക്യാമ്പെയ്‌നുകളും തുടരുന്നുണ്ട്.

കാലാവസ്ഥാ വ്യതിയാനവും കടുത്ത ചൂടും തുടരുന്ന സാഹചര്യത്തില്‍ ഭാവിയില്‍ ജലലഭ്യത വലിയ വെല്ലുവിളിയായി മാറാമെന്നാണ് വിദഗ്ധരുടെ മുന്നറിയിപ്പ്. അതിനാല്‍ തന്നെ പ്രകൃതി വിഭവങ്ങളുടെ സംരക്ഷണത്തിനും ദീര്‍ഘകാല ജലസുരക്ഷ ഉറപ്പാക്കുന്നതിനുമായി ഗള്‍ഫ് രാജ്യങ്ങള്‍ കൂടുതല്‍ ശക്തമായ പദ്ധതികളിലേക്ക് കടക്കുകയാണെന്നും റിപ്പോര്‍ട്ടുകള്‍ ചൂണ്ടിക്കാട്ടുന്നു.

GCC countries are reducing groundwater usage and increasing the use of recycled water as part of long-term water conservation and sustainability efforts amid growing climate and water security challenges.