പട്‌ന: ബിഹാറില്‍ മുസ്‌ലിം യുവാവിനെ ആള്‍ക്കൂട്ടം തല്ലിക്കൊന്നു. സിവാന്‍ ജില്ലയിലെ ശിവരാജ്പൂരില്‍ താമസിക്കുന്ന 25കാരന്‍ ഷഹസാദ് അലിയാണ് കൊല്ലപ്പെട്ടത്. സംഭവത്തില്‍ ഏഴ് പേര്‍ക്കെതിരെ പൊലിസ് എഫ്.ഐ.ആര്‍ രജിസ്റ്റര്‍ ചെയ്തു. രണ്ടരമാസം മുന്‍പ് ഷഹസാദിന്റെ മൂത്ത സഹോദരനും ദുരൂഹ സാഹചര്യത്തില്‍ കൊല്ലപ്പെട്ടിരുന്നു. 

അമിത് ചൗധരി, പ്രമേന്ദ്ര മാഞ്ചി, ചത്തു മാഞ്ചി, അവധ് കിഷോര്‍ ചൗധരി, ഗുഡ്ഡു മാഞ്ചി, രഞ്ജന്‍ ചൗധരി, മന്തു കുമാര്‍ എന്നിവരാണ് പ്രതികള്‍. ഇവര്‍ എല്ലാവരും ഒരേ ഗ്രാമത്തില്‍ താമസിക്കുന്നവരാണ്. കൊലക്ക് ശേഷം ഒളിവില്‍ പോയ പ്രതികളെ ഇതുവരെ പിടികൂടാനായിട്ടില്ല. 

മേയ് 30ന് വീടിന് പുറത്തുനിന്ന് ഷഹസാദിനെ പ്രതികള്‍ പിടിച്ചുകൊണ്ടുപോവുകയും, ക്രൂരമായി മര്‍ദിച്ച് കൊലപ്പെടുത്തിയെന്നുമാണ് കുടുംബത്തിന്റെ പരാതി. ഷഹസാദിനെ മരത്തില്‍ കെട്ടിയിട്ട് ക്രൂരമായി മര്‍ദിച്ചെന്ന് ഭാര്യ പറഞ്ഞു. ഇയാളുടെ കൈവശമുണ്ടായിരുന്ന 5000 രൂപയും അക്രമികള്‍ തട്ടിയെടുത്തതായും ഭാര്യ ആരോപിച്ചു. 

ALSO READ: ഷോക്കടിപ്പിക്കാന്‍ കെ.എസ്.ഇ.ബി; സര്‍ ചാര്‍ജ് ഈടാക്കാന്‍ തീരുമാനം 

മൂത്ത മകന്റെ മരണത്തിന് പിന്നാലെ, രണ്ടാമത്തെ മകനെയും നഷ്ടപ്പെട്ടതിന്റെ വേദനയിലാണ് ഷഹസാദിന്റെ കുടുംബം. രണ്ടര മാസം മുന്‍പാണ് മൂത്ത സഹൗദരന്‍ നൗഷാദ് അലിയെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയത്. നൗഷാദ് അലിയെ കൊന്നതാണെന്നും മൃതദേഹം മരത്തില്‍ തൂങ്ങിയ നിലയില്‍ കണ്ടെത്തുകയുമായിരുന്നു. ഈ കേസില്‍ കാര്യമായ അന്വേഷണമൊന്നും പിന്നീട് ഉണ്ടായതുമില്ല. 

രണ്ട് സംഭവങ്ങളിലും പൊലിസിന്റെയും, സര്‍ക്കാരിന്റെയും ഭാഗത്തുനിന്ന് മതിയായ പിന്തുണ ലഭിച്ചിട്ടില്ലെന്ന് കുടുംബം പറയുന്നു. പ്രതികളെ ഉടന്‍ അറസ്റ്റ് ചെയ്യണമെന്നും നഷ്ടപരിഹാരം നല്‍കണമെന്നും കുടുംബം ആവശ്യപ്പെട്ടു. പൊലിസിന്റെ അനാസ്ഥക്കെതിരെ പ്രതിഷേധം സംഘടിപ്പിക്കാനാണ് കുടുംബത്തിന്റെ തീരുമാനം.