രണ്ടാം പിണറായി സര്‍ക്കാരിന്റെ നാലാം വാര്‍ഷികാഘോഷങ്ങളുടെ ഭാഗമായി നടത്തുന്ന 'എന്റെ കേരളം' പരിപാടിക്ക് വിവിധ ജില്ലകളില്‍ ആവേശകരമായ തുടക്കം. സാംസ്‌കാരിക ഘോഷയാത്രകളുടെ അകമ്പടിയോടെയാണ് പരിപാടി ആരംഭിച്ചത്. ഏപ്രില്‍ 21 മുതല്‍ ആരംഭിച്ച വാര്‍ഷികാഘോഷങ്ങള്‍ മെയ് 29 വരെ നീണ്ടുനില്‍ക്കും. 

പരിപാടികളുടെ ഭാഗമായി എല്ലാ ജില്ലകളിലും പ്രദര്‍ശന വിപണന മേള നടക്കും. വിവിധ വകുപ്പുകളുടെ സ്റ്റാളുകള്‍, വിപണന സ്റ്റാളുകള്‍, സെമിനാറുകള്‍, കലാ- സാസ്‌കാരിക പരിപാടികള്‍, ഭക്ഷ്യ-പുസ്തക മേള, കാര്‍ഷിക പ്രദര്‍ശനം എന്നിവ നടക്കും. 

കാസര്‍ഗോഡ് ജില്ലയില്‍ ഏപ്രില്‍ 21നാണ് പരിപാടി ആരംഭിച്ചത്. മുഖ്യമന്ത്രി പിണറായി വിജയന്‍ പ്രദര്‍ശന മേള ഉദ്ഘാടനം ചെയ്തു. മന്ത്രിമാര്‍, ജനപ്രതിനിധികള്‍, ചീഫ് സെക്രട്ടറി, കലാ-സാംസ്‌കാരിക രംഗത്തെ പ്രമുഖര്‍ എന്നിവര്‍ പങ്കെടുത്തും. ഏപ്രില്‍ 27 വരെയാണ് ജില്ലയില്‍ മേള നടക്കുന്നത്. 

വയനാട് ജില്ലയില്‍ എന്റെ കേരളം മേളയിലെ കലാസാംസ്‌കാരിക പരിപാടികള്‍ ഇന്ന്മുതല്‍ നടത്തും. ഫാന്‍സിസ് മാര്‍പ്പാപ്പയുടെ വിയോഗത്തെ തുടര്‍ന്ന് മേളയുടെ ആദ്യ രണ്ട് ദിനങ്ങളിലെ കലാ-സാംസ്‌കാരിക പരിപാടികള്‍ മാറ്റിവെച്ചിരുന്നു. ഏപ്രില്‍ 28 വരെ കല്‍പ്പറ്റ എസ്‌കെഎംജെ സ്‌കൂള്‍ മൈതാനിയിലാണ് പ്രദര്‍ശന മേള നടക്കുക. 

കോഴിക്കോട് ജില്ലയില്‍ മേയ് 3 മുതല്‍ 12 വരെയാണ് പ്രദര്‍ശന മേള നടക്കുക. കോഴിക്കോട് ബീച്ചില്‍ വെച്ച് കായികം, സാംസ്‌കാരികം, വിദ്യാഭ്യാസം, തൊഴില്‍, കൃഷി, സംരഭകത്വം, വ്യവസായം എന്നീ മേഖലകളില്‍ കഴിവ് തെളിയിച്ച വ്യക്തിത്വങ്ങള്‍ പങ്കെടുക്കും.