ന്യൂഡല്‍ഹി: പഹല്‍ഗാം ഭീകരാക്രമണത്തെ തുടര്‍ന്ന് ഇന്ത്യയില്‍ തങ്ഘിയിരിക്കുന്ന പാക് പൗരന്മാര്‍ പാകിസ്താനിലേക്ക് മടങ്ങണമെന്ന കേന്ദ്രസര്‍ക്കാരിന്റെ പശ്ചാത്തലത്തില്‍ വാഗ-അട്ടാരി അതിര്‍ത്തിയില്‍ വന്‍തിരക്ക്. ഉറ്റവരെ വിട്ടുപോകേണ്ടതിന്റെ വൈകാരിക നിമിഷങ്ങള്‍ക്കാണ് വാഗ-അട്ടാരി ബോര്‍ഡര്‍ സാക്ഷിയായിക്കൊണ്ടിരിക്കുന്നത്.

പാകിസ്താന്‍ പൗരന്മാര്‍ക്ക് ഇന്ത്യയില്‍ നിന്ന് മടങ്ങുന്നതിന് അനുവദിച്ച സമയപരിധി ഇന്ന് അവസാനിക്കും. സാര്‍ക് വിസയില്‍ ഇന്ത്യയില്‍ എത്തിയവരുടെ വിസാകാലാവധി ഇന്നലെ അവസാനിച്ചിരുന്നു. എന്നാല്‍ മെഡിക്കല്‍ വിസയില്‍ രാജ്യത്ത് എത്തിയവര്‍ക്ക് 29 വരെ ഇന്ത്യയില്‍ തുടരാം.

കഴിഞ്ഞ രണ്ട് ദിവസത്തിനുള്ളില്‍ അട്ടാരി-വാഗ അതിര്‍ത്തിയിലൂടെ ഏകദേശം 272 പാകിസ്താന്‍ പൗരന്മാരാണ് ഇന്ത്യ വിട്ടിത്. പാകിസ്താനില്‍ നിന്നുള്ളവരുടെ വിസാകാലാവധി അവസാനിക്കുന്ന ഇന്ന് നൂറുകണക്കിന് പേര്‍ കൂടി ഇന്ത്യ വിടുമെന്നാണ് പ്രതീക്ഷിക്കുന്നതെന്ന് ഒരു ഉദ്യോഗസ്ഥന്‍ പറഞ്ഞു.

പഞ്ചാബിലെ അന്താരാഷ്ട്ര അതിര്‍ത്തി വഴി 13 നയതന്ത്രജ്ഞരും ഉദ്യോഗസ്ഥരും ഉള്‍പ്പെടെ 629 ഇന്ത്യക്കാര്‍ പാകിസ്താനില്‍ നിന്ന് ഇന്ത്യയിലേക്ക് തിരിച്ചെത്തി.

അതേസമയം കേരളത്തിലുള്ള 104 പാകിസ്താന്‍ പൗരന്മാരിലെ 6 പേര്‍ തിരിച്ചുപോയി. സന്ദര്‍ശന വിസയില്‍ രാജ്യത്ത് എത്തിയവരാണ് മടങ്ങിപ്പോയത്. ബാക്കിയുള്ള 98 പൗരന്മാരും ദീര്‍ഘകാല വിസയില്‍ വന്നതിനാല്‍ ഇവര്‍ രാജ്യത്തു തങ്ങുന്നതില്‍ തടസ്സമില്ലെന്നാണ് അധികൃതര്‍ അറിയിച്ചിരിക്കുന്നത്. 

ഏപ്രില്‍ 22ന് 26 സാധാരണക്കാരുടെ ജീവനെടുത്ത പഹല്‍ഗാം ഭീകരാക്രമണത്തിന്റെ പശ്ചാത്തലത്തില്‍, ശനിയാഴ്ച ഭീകരവാദികളെ പിന്തുണയ്ക്കുന്ന 100ലധികം പേരുടെ വീടുകള്‍ റെയ്ഡ് ചെയ്തിരുന്നു. നൂറുകണക്കിന് പ്രദേശവാസികളെ കസ്റ്റഡിയിലെടുക്കുകയും ചെയ്തിട്ടുണ്ട്. അതേസമയം, നിയന്ത്രണ രേഖയിലെ ഏറ്റുമുട്ടല്‍ രണ്ടാം ദിവസവും അവസാനിച്ചിട്ടില്ല

The deadline for Pakistani nationals to leave India expires today, with six individuals returning from Kerala. Find out the details behind their departure and the latest developments in this ongoing matter.