ദുബൈ: ഇറാനെതിരായ ഇസ്‌റാഈല്‍ ആക്രമണത്തെത്തുടര്‍ന്ന് സംഘര്‍ഷങ്ങള്‍ നിലനില്‍ക്കുന്ന സാഹചര്യത്തില്‍ ഏറ്റവും പുതിയ വിമാന ഷെഡ്യൂളുകള്‍ക്കായി എയര്‍ലൈനുകളുമായി പരിശോധിക്കാന്‍ യു.എ.ഇ അടിയന്തര യാത്രാ നിര്‍ദേശം നല്‍കി. നിലവിലെ സുരക്ഷാ സാഹചര്യത്തിന്റെ വെളിച്ചത്തില്‍ യാത്രക്കാര്‍ ജാഗ്രത പാലിക്കാനും, അതിവേഗം മാറിക്കൊണ്ടിരിക്കുന്ന വിമാന സ്റ്റാറ്റസുകളെക്കുറിച്ച് അറിഞ്ഞിരിക്കാനും ജോര്‍ദാന്‍, ഇറാഖ്, ലബനാന്‍, സിറിയ, ഇറാന്‍, ഇസ്‌റാഈല്‍ എന്നിവിടങ്ങളിലേക്ക് യാത്ര ചെയ്യുന്ന യു.എ.ഇ പൗരന്മാരെയും യു.എ.ഇയില്‍ താമസിക്കുന്നവരെയും സന്ദര്‍ശനത്തിലുള്ളവരെയും ഉദ്ദേശിച്ചാണ് വിദേശ കാര്യ മന്ത്രാലയം ശനിയാഴ്ച ട്രാവല്‍ അഡ്വൈസറി പുറത്തിറക്കിയത്.

'നിലവിലെ സംഭവ വികാസങ്ങളുടെയും അവ യാത്രാ രംഗത്ത് സൃഷ്ടിച്ച ആഘാതത്തിന്റെയും വെളിച്ചത്തില്‍, യു.എ.ഇ പൗരന്മാരോടും താമസക്കാരോടും സന്ദര്‍ശകരോടും വിമാന ഷെഡ്യൂളുകളെക്കുറിച്ചുള്ള ഏറ്റവും പുതിയ അപ്‌ഡേറ്റുകള്‍ക്കായി നേരിട്ട് വിമാന കമ്പനികളുമായി ബന്ധപ്പെടാന്‍ വിദേശ കാര്യ മന്ത്രാലയം ആവശ്യപ്പെടുന്നു'' പ്രസ്താവനയില്‍ പറഞ്ഞു. സംഘര്‍ഷ ബാധിത രാജ്യങ്ങളിലെ ഇമാറാത്തികള്‍ 'തവാജുദി' സേവനത്തില്‍ രജിസ്റ്റര്‍ ചെയ്യാന്‍ മന്ത്രാലയം അഭ്യര്‍ത്ഥിച്ചു.

അതേസമയം, സംഘര്‍ഷം രൂക്ഷമാകുന്നതിനാല്‍ യു.എ.ഇയിലെ വിമാന കമ്പനികളായ എമിറേറ്റ്‌സ്, ഇത്തിഹാദ്, ഫ്‌ലൈ ദുബൈ, എയര്‍ അറേബ്യ എന്നിവയുടെ ഷെഡ്യൂളുകളില്‍ മാറ്റം വരുത്തി. റദ്ദാക്കലുകളും റൂട്ട് മാറ്റലും ഉള്‍പ്പെടെയുള്ള ഈ മാറ്റങ്ങള്‍ക്ക് കാരണം നിലവിലുള്ള പ്രാദേശിക സാഹചര്യവും തുടര്‍ന്നുള്ള വ്യോമാതിര്‍ത്തി നിയന്ത്രണങ്ങളുമാണ്. യാത്രക്കാരുടെയും ജീവനക്കാരുടെയും സുരക്ഷയ്ക്ക് മുന്‍ഗണന നല്‍കുന്നത് കൊണ്ടാണെന്നു വിമാനക്കമ്പനികള്‍ അറിയിച്ചു. യാത്രക്കാരെ അവരുടെ ഫ്‌ലൈറ്റ് സ്റ്റാറ്റസിനെക്കുറിച്ച് അപ്‌ഡേറ്റ് ആയിരിക്കാന്‍ അധികൃതര്‍ പ്രേരിപ്പിക്കുന്നു.

13നും 15നുമിടയില്‍ ഇറാഖ്, ഇറാന്‍, ജോര്‍ദാന്‍, ലബനാന്‍ എന്നിവിടങ്ങളിലേക്കും തിരിച്ചുമുള്ള ഒന്നിലധികം വിമാനങ്ങള്‍ എമിറേറ്റ്‌സ് റദ്ദാക്കി. ബസ്ര, ബാഗ്ദാദ്, ടെഹ്‌റാന്‍, അമ്മാന്‍, ബെയ്‌റൂത്ത് എന്നിവ ബാധിച്ച റൂട്ടുകളില്‍ ഉള്‍പ്പെടുന്നു. ഫ്‌ലൈ ദുബൈ കണക്ഷനുകള്‍ ഉള്‍പ്പെടെ ദുബൈ വഴി ഈ സ്ഥലങ്ങളിലേക്ക് പോകുന്ന യാത്രക്കാരെ ഇനിയൊരു അറിയിപ്പ് ഉണ്ടാകുന്നതു വരെ യാത്രയ്ക്ക് സ്വീകരിക്കില്ല.

ഫ്‌ലൈറ്റ് സ്റ്റാറ്റസ് പരിശോധിക്കാനും റീബുക്കിംഗിനായി എമിറേറ്റ്‌സ് ഓഫിസുകളെയോ ട്രാവല്‍ ഏജന്റുമാരെയോ ബന്ധപ്പെടാനും സമയ ബന്ധിത അറിയിപ്പുകള്‍ക്കായി സൈറ്റില്‍ യാത്രക്കാരുടെ കോണ്‍ടാക്റ്റ് വിശദാംശങ്ങള്‍ അപ്‌ഡേറ്റ് ചെയ്യാനും യാത്രക്കാര്‍ക്ക് നിര്‍ദേശമുണ്ട്.

വ്യോമ ഗതാഗത നിയന്ത്രണങ്ങള്‍ കാരണം ഇത്തിഹാദ് റദ്ദാക്കലുകള്‍ നടപ്പിലാക്കിയിട്ടുണ്ട്. അബൂദബിടെല്‍ അവീവ്, അബൂദബിഅമ്മാന്‍ സെക്ടറിലേക്കുള്ള സര്‍വിസുകള്‍ ജൂണ്‍ 14 മുതല്‍ 16 വരെ റദ്ദാക്കി. 14ന്റെ അബൂദബിബെയ്‌റൂത്ത് (ഇവൈ583/ഇവൈ584) വിമാന സര്‍വിസുകള്‍ റദ്ദാക്കിയിട്ടുണ്ട്. മറ്റ് നിരവധി വിമാന സര്‍വിസുകള്‍ വഴിതിരിച്ചു വിടുന്നുണ്ട്. അബൂദബി വഴി ബാധിത സ്ഥലങ്ങളിലേക്ക് പോകുന്ന അതിഥികളെ അവരുടെ എംബാര്‍കേഷന്‍ പോയിന്റില്‍ കയറാന്‍ അനുവദിക്കില്ല.

The UAE has issued an urgent travel advisory to check with airlines for the latest flight schedules amid tensions following the Israeli attack on Iran.