നന്യൂഡല്‍ഹി: യുവാക്കളിലെ പെട്ടെന്നുള്ള മരണങ്ങള്‍ അടുത്ത കാലത്തായി കൂടിയതിന് കൊവിഡ് വാക്‌സിനേഷനുമായി ബന്ധമില്ലെന്ന് കേന്ദ്ര ആരോഗ്യഏജന്‍സികളുടെ പഠനം. ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് (ഐ.സി.എം.ആര്‍), നാഷണല്‍ സെന്റര്‍ ഫോര്‍ ഡിസീസ് കണ്‍ട്രോള്‍ (എന്‍.സി.ഡി.സി), ഡല്‍ഹി എയിംസ് എന്നിവര്‍ ചേര്‍ന്ന് നടത്തിയ പഠനത്തിലാണ് കണ്ടെത്തല്‍. ജീവിതശൈലി പ്രശ്‌നങ്ങള്‍, രോഗാവാസ്ഥ, ജനിതഘടകങ്ങള്‍ എന്നിവയാകാം മരണകാരണമെന്നാണ് വിലയിരുത്തല്‍. 18നും 45നും ഇടയില്‍ പ്രായമുള്ളവരിലെ മരണങ്ങള്‍ സംഭവിക്കുന്നത് സംബന്ധിച്ച് പഠിക്കാനാണ് വിദഗ്ധരെ നിയോഗിച്ചത്.

കൊവിഡ് വാക്‌സിന്‍ തീര്‍ത്തും സുരക്ഷിതമാണെന്ന് പഠനം തെളിയിച്ചതായി കേന്ദ്ര ആരോഗ്യമന്ത്രാലയം അറിയിച്ചു. കൊവിഡ് പ്രതിരോധ കുത്തിവയ്പ്പ് യുവാക്കളിലെ പെട്ടെന്നുള്ള മരണസാധ്യത വര്‍ധിപ്പിക്കുന്നില്ല. വ്യത്യസ്ത ഗവേഷണ സമീപനങ്ങള്‍ ഉപയോഗിച്ച് രണ്ട് പരസ്പര പൂരകപഠനങ്ങളാണ് നടത്തിയത്. ഐ.സി.എം ആറിന്റെ നാഷണല്‍ ഇന്‍സ്റ്റിറ്റ്യൂട്ട് ഓഫ് എപ്പിഡെമിയോളജി (എന്‍.ഐ.ഇ) ഇന്ത്യയിലെ 1845 വയസ്സ് പ്രായമുള്ളവരിലെ മരണങ്ങളുമായി ബന്ധപ്പെട്ട ഘടകങ്ങള്‍ എ മള്‍ട്ടി സെന്‍ട്രിക് മാച്ച്ഡ് കേസ്‌കണ്‍ട്രോള്‍ സ്റ്റഡി എന്ന തലക്കെട്ടിലാണ് പഠനം നടത്തിയത്.

2023 മെയ് മുതല്‍ ആഗസ്റ്റ് വരെ 19 സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും 47 തൃതീയ പരിചരണ സൗകര്യങ്ങളുള്ള ആശുപത്രികളിലാണ് പഠനം നടത്തിയത്. 2021 ഒക്ടോബറിനും 2023 മാര്‍ച്ചിനും മധ്യേ ആരോഗ്യവാന്മാരായി കാണപ്പെട്ടെങ്കിലും പെട്ടെന്ന് മരിച്ച വ്യക്തികളെ സംബന്ധിച്ച വിവരങ്ങള്‍ സംഘം ശേഖരിച്ചു. കൊവിഡ് 19 പ്രതിരോധ കുത്തിവയ്പ്പ്, യുവാക്കളിലെ മരണസാധ്യത വര്‍ധിപ്പിക്കുന്നില്ലെന്ന് ഈ പഠനം കണ്ടെത്തി.
മരണ കാരണം വ്യക്തമാക്കല്‍ എന്ന തലക്കെട്ടിലാണ് രണ്ടാമത്തെ പഠനം നടത്തിയത്. ഡല്‍ഹിയിലെ ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ് (എയിംസിന്റെ) ധനസഹായത്തോടെ, ഐ.സി.എം.ആറുമായി സഹകരിച്ചാണ് ഈ പഠനം. ഡാറ്റയുടെ ആദ്യ വിശകലനം ഹൃദയാഘാതം ഈ പ്രായത്തിലുള്ളവരില്‍ പെട്ടെന്നുള്ള മരണത്തിന്റെ പ്രധാന കാരണമായി തുടരുന്നുവെന്നാണ് സൂചിപ്പിക്കുന്നത്.

മുന്‍ വര്‍ഷങ്ങളുമായി താരതമ്യപ്പെടുത്തുമ്പോള്‍ കാരണങ്ങളുടെ പാറ്റേണില്‍ വലിയ മാറ്റങ്ങളൊന്നും നിരീക്ഷിക്കപ്പെട്ടിട്ടില്ലെന്നും മന്ത്രാലയം വ്യക്തമാക്കുന്നു. ഭൂരിഭാഗം മരണങ്ങളിലും ജനിതകഘടകങ്ങളാണ് കാരണമായി വിശദീകരിക്കപ്പെടുന്നത്. രണ്ടാമത്തെ പഠനം പൂര്‍ത്തിയായിക്കഴിഞ്ഞാല്‍ അന്തിമ ഫലം പുറത്തുവിടുമെന്നും മന്ത്രാലയം വ്യക്തമാക്കി.

Extensive studies conducted by the Indian Council of Medical Research (ICMR) and AIIMS have conclusively established no linkage between coronavirus vaccines and sudden premature deaths among adults post Covid-19. The national studies have identified lifestyle and pre-existing conditions as key factors behind the deaths.