തിരുവനന്തപുരം: കേരള സര്‍വകലാശാല രജിസ്ട്രാറുടെ സസ്‌പെന്‍ഷന് നിയമസാധുത ഇല്ലെന്ന നിയമോപദേശത്തില്‍ രജിസ്ട്രാര്‍ കെഎസ് അനില്‍കുമാര്‍ ഇന്ന് ഹൈകോടതിയെ സമീപിച്ചേക്കും. സസ്പന്‍ഷന്‍ നടപടി മറന്ന് അദ്ദേഹം രജിസ്ട്രാര്‍ സര്‍വകലാശാലയിലും എത്തിയേക്കും. മാത്രമല്ല വിസി ചുമതല നല്‍കിയ സിസ തോമസും സര്‍വകലാശാല ആസ്ഥാനത്ത് എത്തും. 

രജിസട്രാറെ സസ്‌പെന്‍ഡ് ചെയ്യാന്‍ സര്‍വകലാശാല ചട്ടപ്രകാരം അനുമതി ഇല്ലെന്നാണ് സിന്‍ഡിക്കേറ്റ് വ്യക്തമാക്കുന്നത്. ഗവര്‍ണറുടെ ആവശ്യപ്രകാരമുള്ള വിസിയുടെ നടപടിയെ കുറിച്ച് രജിസ്ട്രാര്‍ കോടതിയില്‍ ചോദ്യം ചെയ്യുന്നതാണ്. സിന്‍ഡിക്കേറ്റും നിയമ നടപടിക്കൊരുങ്ങുകയാണ്. ഗവര്‍ണറുടെ തീരുമാനപ്രകാരമുള്ള നടപടി ഉന്നത വിദ്യാഭ്യാസ വകുപ്പും നിയമപരമായി ചോദ്യം ചെയ്യും.

 ഇതോടെ ഭാരതാംബ ചിത്ര വിവാദം ഗവര്‍ണര്‍ സര്‍ക്കാര്‍ പോര് കടുപ്പിക്കുമെന്ന സൂചനയും നല്‍കുന്നു. കഴിഞ്ഞ ദിവസമാണ് കേരള സര്‍വകലാശാല സെനറ്റ് ഹാളില്‍ ഭാരതാംബ വിവാദവുമായി ബന്ധപ്പെട്ട സംഘര്‍ഷത്തില്‍ രജിസ്ട്രാറെ സസ്‌പെന്‍ഡ് ചെയ്തത്. വൈസ് ചാന്‍സലര്‍ മോഹനന്‍ കുന്നുമ്മലിന്റേതാണ് നടപടി. നേരത്തേ രജിസ്ട്രാര്‍ക്കെതിരേ നടപടിയാവശ്യപ്പെട്ട് ചാന്‍സലര്‍ കൂടിയായ ഗവര്‍ണര്‍ ശുപാര്‍ശ നല്‍കിയിരുന്നു.

ഇതിനു പിറകെയാണ് നടപടി ഉണ്ടായത്. വിസി രജിസ്ട്രാര്‍ക്കെതിരേ നല്‍കിയ റിപോര്‍ട്ട് പ്രകാരമാണ് രജിസ്ട്രാര്‍ക്കെതിരേ നടപടിയെടുക്കാന്‍ ഗവര്‍ണര്‍ നിര്‍ദേശിക്കുന്നത്. അതേസമയം രജിസ്ട്രാര്‍ക്കെതിരേ റിപോര്‍ട്ട് നല്‍കുന്നതിനു മുമ്പ് സിന്‍ഡിക്കേറ്റുമായി ചര്‍ച്ച ചെയ്തിട്ടില്ല എന്ന് സിന്‍ഡിക്കേറ്റ് അംഗങ്ങളും ആരോപിക്കുന്നു.