പട്‌ന: നിയമസഭാ തെരഞ്ഞെടുപ്പ് ആസന്നമായ ബിഹാറില്‍ വോട്ടര്‍പ്പട്ടികയുമായി ബന്ധപ്പെട്ട വിവാദ പരിഷ്‌കാരങ്ങളില്‍ ഇളവുവരുത്തി തെരഞ്ഞെടുപ്പ് കമ്മിഷന്‍. വോട്ടര്‍പ്പട്ടികയില്‍നിന്ന് മാറ്റിനിര്‍ത്തപ്പെട്ടവര്‍ സാധാരണക്കാര്‍ക്ക് പ്രാപ്യമായ ആധാര്‍ കാര്‍ഡും റേഷന്‍ കാര്‍ഡും ഒഴികെയുള്ള രേഖകള്‍ സമര്‍പ്പിക്കണമെന്ന കടുത്ത നിലപാടില്‍ കമ്മിഷന്‍ ഇളവുവരുത്തി.
കമ്മിഷന്‍ നേരത്തെ അറിയിച്ച 11 നിശ്ചിതരേഖകള്‍ ഇല്ലാത്തവര്‍ക്ക് പ്രത്യേക ഫോമുകള്‍ പൂരിപ്പിച്ച് ബൂത്ത് ലെവല്‍ ഓഫിസര്‍മാര്‍ക്ക് (ബി.എല്‍.ഒ) സമര്‍പ്പിക്കാമെന്ന് സംസ്ഥാന ചീഫ് ഇലക്ടറല്‍ ഓഫിസര്‍ (സി.ഇ.ഒ) അറിയിച്ചു. ഇപ്പോള്‍ അപേക്ഷിക്കൂവെന്നും രേഖകള്‍ പിന്നീട് സമര്‍പ്പിച്ചാല്‍ മതിയെന്നും സി.ഇ.ഒ അറിയിച്ചു. അപേക്ഷകര്‍ ഒപ്പുവച്ച ഫോമുകള്‍ ബി.എല്‍.ഒമാര്‍ ഉടന്‍ കമ്മിഷന്റെ ഔദ്യോഗിക സൈറ്റില്‍ അപ്‌ലോഡ് ചെയ്യണമെന്നും നിര്‍ദേശിച്ചു. അപേക്ഷയോടൊപ്പമുള്ള രേഖകള്‍ പിന്നീട് ഹാജരാക്കിയാല്‍ മതിയെന്നും ഇന്നലെ ബിഹാറിലെ ദിനപത്രങ്ങളില്‍ കൊടുത്ത പരസ്യം മുഖേന കമ്മിഷന്‍ അറിയിച്ചു.

ALSO READ: ഗയയിൽ അഞ്ചാം ക്ലാസ് വിദ്യാർത്ഥികളുടെ അടിപിടി; അധ്യാപകനെ രക്ഷിതാക്കൾ മർദിച്ചു, സ്കൂൾ യുദ്ധക്കളമായി

വോട്ടര്‍മാര്‍ ഫോട്ടോയും രേഖകളും ഉടന്‍ ബി.എല്‍.ഒമാര്‍ മുമ്പാകെ സമര്‍പ്പിക്കുക. രേഖകളും ഫോട്ടോയും കൈവശമില്ലെങ്കില്‍ അത് ശരിയാക്കുന്നത് വരെ താമസിക്കേണ്ടതില്ല. ആദ്യം വേഗം അപേക്ഷിക്കുക, രേഖകള്‍ പിന്നീട് ശരിയാക്കാം പരസ്യത്തില്‍ പറയുന്നു. നേരത്തെ ഈ മാസം 26ന് മുമ്പായി രേഖകള്‍ സമര്‍പ്പിക്കാനായിരുന്നു കമ്മിഷന്‍ ആവശ്യപ്പെട്ടിരുന്നത്. ജനന സര്‍ട്ടിഫിക്കറ്റുകള്‍, പാസ്‌പോര്‍ട്ടുകള്‍, വിദ്യാഭ്യാസ സര്‍ട്ടിഫിക്കറ്റുകള്‍, സ്ഥിരതാമസ സര്‍ട്ടിഫിക്കറ്റുകള്‍, വനാവകാശങ്ങള്‍, ജാതി സര്‍ട്ടിഫിക്കറ്റ്, സര്‍ക്കാര്‍ നല്‍കുന്ന കുടുംബ രജിസ്റ്റര്‍, ഭൂമി/ വീട് അലോട്ട്‌മെന്റ് സര്‍ട്ടിഫിക്കറ്റുകള്‍, സര്‍ക്കാര്‍ ജീവനക്കാര്‍ക്കോ പെന്‍ഷന്‍കാര്‍ക്കോ നല്‍കിയ രേഖകള്‍, 1967ന് മുമ്പ് വിവിധ പൊതു അധികാരികള്‍ നല്‍കിയ മറ്റ് രേഖകള്‍ എന്നിങ്ങനെയുള്ള 11 രേഖകളില്‍ ഏതെങ്കിലും ഹാജരാക്കണമെന്നാണ് കമ്മിഷന്‍ അറിയിച്ചത്. ആധാറും റേഷന്‍ കാര്‍ഡും സ്വീകരിക്കാതെ മറ്റ് രേഖകള്‍ സമര്‍പ്പിച്ചെങ്കിലേ വോട്ടാവകാശം ഉണ്ടാകൂവെന്ന തീരുമാനം വിവാദമായ സാഹചര്യത്തിലാണ് കമ്മിഷന്റെ നിലപാടുമാറ്റം.

The Election Commission has rolled back certain voter list reforms in Bihar after public protests and political opposition. The move aims to address citizens' concerns ahead of upcoming elections.