ലഖ്‌നൗ: രാജ്യത്തെ ഏറ്റവും പഴക്കമുള്ള മൂന്നാമത്തെ പള്ളിയായ ബദായുനിലെ ശംസി ഷാഹി മസ്ജിദിന്റെ ഉടമസ്ഥാവകാശ കേസില്‍ സിവില്‍ ജഡ്ജി (സീനിയര്‍ ഡിവിഷന്‍) ഈ മാസം 17ന് വിധി പറയും. ഷംസി ജുമാ മസ്ജിദ് നീലകണ്ഠ മഹാദേവ ക്ഷേത്രമാണെന്നും പള്ളിയില്‍ പൂജ നടത്താന്‍ വിട്ടുതരണമെന്നും ആവശ്യപ്പെട്ട് തീവ്ര ഹിന്ദുത്വവാദികള്‍ നല്‍കിയ ഹരജി കേള്‍ക്കാന്‍ ഒരു കീഴ്‌ക്കോടതിക്ക് അധികാരപരിധിയുണ്ടോ എന്ന കാര്യത്തിലാണ് 17നു വിധി പറയുക.

പള്ളി നിലനിന്ന സ്ഥലത്ത് നീലകണ്ഠ മഹാദേവ ക്ഷേത്രം ആയിരുന്നുവെന്ന് 2022ല്‍ അഖില ഭാരത ഹിന്ദു മഹാസഭയുടെ നേതാവ് മുകേഷ് പട്ടേല്‍ ആരോപിച്ചതോടെയാണ്, ബാബരി മസ്ജിദ് മാതൃകയിലുള്ള വ്യവഹാരങ്ങള്‍ ശംസി മസ്ജിദിന്റെ പേരിലും തുടങ്ങിയത്. പിന്നാലെ അതേവര്‍ഷം തന്നെ ഉടമസ്ഥാവകാശം ഉന്നയിച്ച് ഹരജി നൽകുകയുംചെയ്തു. 

2022ലാണ് ഹരജി നല്‍കിയതെങ്കിലും ഈയടുത്താണ് കേസ് വീണ്ടും ചര്‍ച്ചയായത്. എട്ടര നൂറ്റാണ്ടോളം പഴക്കമുള്ള പള്ളിയില്‍ 23,500 പേരെ ഉള്‍ക്കൊള്ളാന്‍ കഴിയും.