തിരുവനന്തപുരം: കോട്ടയം മെഡിക്കൽ കോളജിൽ കെട്ടിടം തകർന്നു വീണ് കൂട്ടിരിപ്പുകാരി മരണപ്പെട്ട സംഭവവും തിരുവനന്തപുരം മെഡിക്കൽ കോളജിൽ വകുപ്പ് മേധാവിയുടെ തുറന്ന് പറച്ചിലും സൃഷ്ടിച്ച വിവാദങ്ങളിൽ ആരോഗ്യവകുപ്പ് ഉലയുന്നതിനിടെ, വകുപ്പ്  മന്ത്രിമാരുമായി ബന്ധപ്പെട്ട വകുപ്പ് മേധാവികളുടെ പ്രതികരണം ചർച്ചയാകുന്നു.
വിവാദങ്ങൾക്കിടെ മുൻ ആരോഗ്യ മന്ത്രി കെ.കെ ശൈലജയെ പ്രകീർത്തിച്ച് മുൻ ആരോഗ്യവകുപ്പ് ഡയറക്ടർ ഡോ. സരിത ശിവരാമൻ രംഗത്തെത്തിയതോടെയാണ് ചർച്ചയുടെ തുടക്കം. പിന്നാലെ നിലവിലെ ആരോഗ്യ മന്ത്രിവീണാ ജോർജിനെ പുകഴ്ത്തി നിലവിലെ ഡയറക്ടർ ഡോ. കെ.ജെ റീനയും രംഗത്തെത്തി.

ALSO READ: വീണാ ജോർജിനെതിരായ ഫേസ്ബുക്ക് പോസ്റ്റ്; സിപിഎം നേതാക്കൾക്കെതിരെ നടപടിക്ക് നിർദ്ദേശം

രക്ഷാപ്രവർത്തനം ഏകോപിപ്പിക്കേണ്ട നിരവധി സാഹചര്യങ്ങൾ നേരിടേണ്ടി വന്നപ്പോഴൊക്കെ കരുത്തും ആത്മവിശ്വാസവും പകർന്നുതന്ന് കൂടെ നിന്ന ജനപ്രതിനിധികളെ ഓർത്തുപോകുന്നുവെന്നായിരുന്നു കോട്ടയം ദുരന്തത്തിന്റെ പശ്ചാത്തലത്തിൽ  ഡോ. സരിത നവമാധ്യമത്തിൽ കുറിച്ചത്. ജീവന്റെ ഒരു തുള്ളിയെങ്കിലുംബാക്കിയുള്ളവരെ മരണത്തിന് വിട്ടുകൊടുക്കാനാവില്ലെന്ന അവരുടെ നിശ്ചയദാർഢ്യം തന്ന ഊർജം ചെറുതല്ലെന്നും കോട്ടയത്ത് മന്ത്രിമാരുടെ സാനിധ്യമുണ്ടായിട്ടും രക്ഷാപ്രവർത്തനം വൈകി എന്ന വാർത്ത കേട്ടപ്പോൾ ഭൂതകാലത്തേക്ക് തിരിഞ്ഞുനോക്കിപ്പോയതാണെന്നുമായിരുന്നു  മുൻ ആരോഗ്യവകുപ്പ് ഡയറക്ടറുടെ വാക്കുകൾ.

ALSO READ: നിപ സമ്പര്‍ക്കപ്പട്ടികയില്‍ ആകെ 383 പേര്‍; മന്ത്രി വീണാ ജോര്‍ജിന്റെ നേതൃത്വത്തില്‍ ഉന്നതതല യോഗം ചേര്‍ന്നു

നവമാധ്യമത്തിലെ ഈ പോസ്റ്റ് ചർച്ചയായതോടെയാണ് നിലവിലെ ആരോഗ്യവകുപ്പ് ഡയറക്ടർ പ്രതികരണവുമായി രംഗത്തെത്തിയത്. ആരോഗ്യരംഗത്ത് ആശുപത്രികളുടെ വികസനകാര്യത്തിലും പൊതുജനാരോഗ്യ കാര്യത്തിലും സജീവമായി ഇടപെടുന്ന മന്ത്രിയാണ് വീണാ ജോർജെന്നായിരുന്നു ഡോ.കെ.ജെ റീനയുടെ പ്രതികരണം. കാസർകോട് മുതൽ തിരുവനന്തപുരം വരെയുള്ള ആശുപത്രികളിൽ മന്ത്രി സന്ദർശനം നടത്താറുണ്ട്. ആശുപത്രികളിലെ ടോയ്‌ലറ്റ് അടക്കം സന്ദർശിച്ച് എന്തൊക്കെ മാറ്റങ്ങൾ വേണമെന്ന് മന്ത്രി നിർദേശം നൽകും. ആരോഗ്യ മന്ത്രിയുടെ ഇടപെടൽ മുതൽക്കൂട്ടാണെന്നും നിലവിലെ ഡയറക്ടർ പറയുന്നു. രണ്ടു പോസ്റ്റുകളും ചർച്ചയാകുമ്പോഴും ആരോഗ്യവകുപ്പിൽ നിലിവിൽ നേരിടുന്ന പ്രശ്നങ്ങൾക്കെതിരേ നവമാധ്യമങ്ങളിലുൾപ്പെടെ പ്രതിഷേധം ശക്തമാവുകയാണ്.