റിയാദ്: സഊദിയിൽ പ്രവാസി തൊഴിലാളകളുടെ വർക്ക് പെർമിറ്റുകളെ നൈപുണ്യ വിഭാഗങ്ങൾക്കനുസരിച്ച് മൂന്നായി തിരിച്ചു. സാമൂഹിക വികസന മന്ത്രി എൻജിനീയർ അഹമ്മദ് ബിൻ സുലൈമാൻ അൽ രാജ്ഹി ഇത് സംബന്ധിച്ച് സുപ്രധാന മന്ത്രിതല തീരുമാനം പുറത്തിറക്കി.

ഉയർന്ന വൈദഗ്ധ്യം (Highly Skilled), വൈദഗ്ധ്യം (Skilled), അടിസ്ഥാനം (Basic) എന്നിങ്ങനെ മൂന്ന് വിഭാഗങ്ങളാക്കിയാണ് തരം തിരിച്ചിരിക്കുന്നത്. ആഗോള പ്രതിഭകളെ സഊദി തൊഴിൽ വിപണിയിലേക്ക് ആകർഷിക്കുന്നതിനും തൊഴിലാളി കഴിവുകൾ മെച്ചപ്പെടുത്തുന്നതിനും വൈദഗ്ധ്യവും അനുഭവപരിചയവും സഊദി തൊഴിൽ വിപണിയിലേക്ക് കൈമാറ്റം ചെയ്യുന്നതിനും ലക്ഷ്യമാക്കിയാണ് പുതിയ തീരുമാനം.

രണ്ട് ഘട്ടങ്ങളിലായി നടപ്പാക്കുന്ന തീരുമാനത്തിന്റെ ആദ്യ ഘട്ടം ജൂലൈ 6 മുതൽ വന്നു. നിലവിൽ രാജ്യത്ത് ജോലി ചെയ്യുന്ന തൊഴിലാളികൾക്കുള്ള വർക്ക് പെർമിറ്റുകൾ ശമ്പളത്തിന്റെയും ജോലിയുടെയും അടിസ്ഥാനത്തിൽ തരംതിരിച്ചു തുടങ്ങിയതാണ് ആദ്യ ഘട്ടം. ഈ വർഷം ഓഗസ്റ്റ് 3 മുതൽ ആരംഭിക്കുന്ന രണ്ടാം ഘട്ടത്തിൽ, ആദ്യമായി രാജ്യത്ത് എത്തുന്നവർക്കുള്ള വർക്ക് പെർമിറ്റുകൾ തരംതിരിക്കും.

മന്ത്രാലയത്തിന്റെ ഖിവ പ്ലാറ്റ്‌ഫോം സൗകര്യത്തിന്റെ ചെലവിലാണ് തരം തിരിവ് ലഭ്യമാകുക.  മാനദണ്ഡങ്ങൾ പാലിക്കുന്നവർക്ക് വിഭാഗങ്ങൾക്കിടയിൽ മാറാനുള്ള സൗകര്യവും ഉണ്ടായിരിക്കും. പുതിയ തീരുമാനം സഊദി വിഷൻ 2030 ന്റെയും ദേശീയ പരിവർത്തന പരിപാടിയുടെയും ലക്ഷ്യങ്ങൾ കൈവരിക്കുന്നതിന് വലിയ സംഭാവന നൽകുമെന്നും മന്ത്രാലയം പ്രതീക്ഷിക്കുന്നു.