പത്തനംതിട്ട: കോന്നി പയ്യനാമൺ ചെങ്കുളത്ത് പാറമടയിലെത്തിയ ഹിറ്റാച്ചിക്ക് മുകളിൽ കൂറ്റൻ പാറ വീണ അപകടത്തിൽ ഒരാളുടെ മൃതദേഹം കണ്ടെത്തിയതായി ഫയർ ഫോഴ്സ് സ്ഥിരീകരിച്ചു. ഒഡീഷ സ്വദേശിയായ മഹാദേവ് പ്രധാനാണ് മരിച്ചത്. രണ്ട് തൊഴിലാളികളാണ് കുടുങ്ങിയത്. ഒപ്പമുണ്ടായിരുന്ന അജയ് റായിക്ക് വേണ്ടിയുള്ള തിരച്ചിൽ വൈകിട്ട് നടന്നിരുന്നു. എന്നാൽ പാറകൾ ഇനിയും ഇടിഞ്ഞ് വീഴാനുള്ള സാധ്യത കണക്കിലെടുത്ത് തിരച്ചിൽ തൽക്കാലം നിർത്തി വെച്ചു. തിരച്ചിൽ നാളെ രാവിലെ ഏഴ് മണിക്ക് വീണ്ടും ആരംഭിക്കും. പ്രദേശത്ത് രാത്രി തിരച്ചിൽ നടത്തുന്നത് അങ്ങേയറ്റം ദുഷ്കരമാണ്. മറ്റ് തൊഴിലാളികൾ ആരെങ്കിലും ഇനി കുടുങ്ങിയിട്ടുണ്ടോ എന്നും പരിശോധിക്കേണ്ടതുണ്ട്. ഒരാളുടെ മൃതദേഹമാണ് കണ്ടെത്തിയത്. നീണ്ട രക്ഷാ പ്രവർത്തനത്തിലൊടുവിലാണ് മഹാദേവ് പ്രധാന്റെ മൃത​ദേഹം കണ്ടെത്തിയത്. പ്രദേശത്ത് രക്ഷാ പ്രവർത്തനം നടത്തുന്നത് ദുഷ്കരമായ സാഹചര്യത്തിലാണ് നാളെത്തേക്ക് മാറ്റി വെച്ചത്. 

ALSO READ: പത്തനംതിട്ട പാറമട അപകടം: ഒരാളുടെ മൃതദേഹം കണ്ടെത്തി, മറ്റൊരാൾക്കായുള്ള തിരച്ചിൽ തുടരുന്നു; രക്ഷാപ്രവർത്തനം ദുഷ്കരം

ഉച്ചഭക്ഷണത്തിന് ശേഷം ഷിഫ്റ്റ് പ്രകാരം ജോലിക്ക് കയറിയവരാണ് അപകടത്തിൽപ്പെട്ടത്. പാറമടയുടെ ദുർഘടമായ ഭൂപ്രദേശം രക്ഷാപ്രവർത്തനത്തിന് വലിയ വെല്ലുവിളിയാണ്. തിരുവല്ലയിൽ നിന്ന് എൻഡിആർഎഫ് സംഘം (27 അംഗങ്ങൾ) രക്ഷാപ്രവർത്തനത്തിനായി തിരിച്ചിട്ടുണ്ട്. കൊല്ലം, കോട്ടയം ജില്ലകളിൽ നിന്ന് കൂടുതൽ ഫയർ ഫോഴ്സ് സംഘവും സ്ഥലത്തേക്ക് എത്തുന്നു. പാറമടയിൽ മുകളിൽ നിന്ന് കല്ലുകൾ അടർന്നു വീഴുന്നത് രക്ഷാപ്രവർത്തനത്തെ സങ്കീർണമാക്കുന്നു. റോപ്പ് റെസ്ക്യൂ ലക്ഷ്യമിട്ടെങ്കിലും, ഫയർ ഫോഴ്സിന് ഹിറ്റാച്ചിക്ക് സമീപത്തേക്ക് എത്താനാകാത്ത സ്ഥിതിയാണ്. "മാൻപവർ കൊണ്ട് മാത്രം രക്ഷാപ്രവർത്തനം സാധ്യമല്ല. കൂടുതൽ യന്ത്രസാമഗ്രികൾ എത്തിക്കേണ്ടതുണ്ട്. പാറ അടർന്നു വീഴുന്ന ഭാഗം പൊട്ടിച്ചു മാറ്റേണ്ടി വരും," ജില്ലാ ഫയർ ഓഫീസർ പ്രതാപചന്ദ്രൻ വ്യക്തമാക്കി.

ALSO READ: പത്തനംതിട്ടയിൽ പാറമടയിൽ അപകടം: ഹിറ്റാച്ചിക്ക് മുകളിൽ കൂറ്റൻ പാറ വീണു, തൊഴിലാളികൾ കുടുങ്ങിക്കിടക്കുന്നതായി വിവരം

120 ഏക്കർ വിസ്തൃതിയിൽ പ്രവർത്തിക്കുന്ന ഈ പാറമടയ്ക്കെതിരെ നേരത്തെ പരാതികൾ ഉയർന്നിരുന്നു. പാറമടയിലെ ക്രഷറിന്റെ ലൈസൻസ് കഴിഞ്ഞ ജൂൺ 30-ന് അവസാനിച്ചതാണ്. കോന്നി പഞ്ചായത്തിൽ മുൻ അംഗം ബിജി കെ. വർഗീസ് പാറമടയ്ക്കെതിരെ പരാതി നൽകിയിരുന്നതായി വിവരമുണ്ട്.