ബെംഗളൂരു: തെക്കന്‍ ബെംഗളൂരുവില്‍ യുവ എഞ്ചിനീയറെ വീട്ടില്‍ തൂങ്ങിമരിച്ച നിലയില്‍ കണ്ടെത്തി. സുദ്ദഗുണ്ടെപാളയം സ്വദേശി ശില്‍പ്പ (27)യാണ് മരണപ്പെട്ടത്. സ്ത്രീധന പീഢനമാണ് മരണ കാരണമെന്നാണ് ആരോപണം. 

ചൊവ്വാഴ്ച്ച രാത്രിയോടെയാണ് യുവതിയെ തുങ്ങി മരിച്ച നിലയില്‍ കണ്ടെത്തിയത്. ഇന്‍ഫോസിസില്‍ സോഫ്റ്റ്‌വെയര്‍ എഞ്ചിനീയറായി ജോലി ചെയ്തിരുന്ന ഇവര്‍ രണ്ടര വര്‍ഷം മുന്‍പ് സോഫ്റ്റ്‌വെയര്‍ എഞ്ചിനീയറായ പ്രവീണ്‍ എന്ന യുവാവിനെ വിവാഹം കഴിച്ചു. ഇരുവര്‍ക്കും ഒന്നര വയസുള്ള കുട്ടിയുണ്ട്. വിവാഹ സമയത്ത് പ്രവീണിന്റെ കുടുംബം 15 ലക്ഷം രൂപയും, 150 ഗ്രാം സ്വര്‍ണാഭരണങ്ങളും വീട്ടുപകരണങ്ങളും സ്ത്രീധനമായി ആവശ്യപ്പെട്ടിരുന്നെന്നാണ് ശില്‍പയുടെ കുടുംബത്തിന്റെ ആരോപണം. 

നിറത്തിന്റെ പേരിലും മകള്‍ ക്രൂരമായ പീഡനത്തിന് ഇരയാക്കപ്പെട്ടതായി കുടുംബം പറഞ്ഞു. നിനക്ക് ഇരുണ്ട നിറമാണ്, എന്റെ മകന് യോജിച്ചതല്ല. അവനെ വീട്ടേക്ക്. ഞങ്ങള്‍ അവന് നല്ലൊരു വധുവിനെ കണ്ടെത്തും,' എന്ന് പ്രവീണിന്റെ അമ്മ ശില്‍പയോട് പറഞ്ഞതായി പരാതിയിലുണ്ട്. ആറ് മാസം മുന്‍പ് പ്രവീണിന്റെ ബിസിനസ് ആവശ്യങ്ങള്‍ക്കായി അഞ്ച് ലക്ഷം രൂപ കൂടി ആവശ്യപ്പെടുകയും, അത് നല്‍കിയെന്നും ശില്‍പയുടെ കുടുംബം പരാതിയില്‍ പറഞ്ഞു. 

സംഭവത്തില്‍ സുദ്ദഗുണ്ടെപാളയ പൊലിസ് കേസെടുത്ത് അന്വേഷണം ആരംഭിച്ചു. പോസ്റ്റ്‌മോര്‍ട്ടത്തിന് ശേഷം ശില്‍പ്പയുടെ മൃതദേഹം ബന്ധുക്കള്‍ക്ക് വിട്ടുനല്‍കി. 

ALSO READ: വയനാട് ചുരത്തിലെ മണ്ണിടിച്ചില്‍; ഭാരം കുറഞ്ഞ വാഹനങ്ങള്‍ ഒറ്റവരിയായി കടത്തിവിടാന്‍ തീരുമാനം