ഡൽഹി: ചെങ്കടലിൽ ജർമ്മൻ നിരീക്ഷണ വിമാനത്തിന് നേരെ ചൈനീസ് യുദ്ധക്കപ്പൽ ലേസർ ആക്രമണം നടത്തിയതായി ജർമനി ആരോപിച്ചു. യൂറോപ്യൻ യൂണിയന്റെ ആസ്പൈഡ്സ് (ASPIDES) ദൗത്യത്തിന്റെ ഭാഗമായി യെമനിലെ ഹൂതി വിമതരുടെ ഭീഷണിയിൽ നിന്ന് വാണിജ്യ കപ്പലുകളെ സംരക്ഷിക്കുന്നതിനായി നിരീക്ഷണം നടത്തുകയായിരുന്നു ജർമ്മൻ വിമാനം. സംഭവത്തെ തുടർന്ന് ജർമനി ബെർലിനിലെ ചൈനീസ് അംബാസഡറെ വിളിച്ചുവരുത്തി, ചൈനയുടെ നടപടിയെ ശക്തമായി അപലപിച്ചു.

ജർമ്മൻ വിദേശകാര്യ ഓഫീസ്, ചൈനയുടെ ഈ പ്രവൃത്തി അംഗീകരിക്കാനാവാത്തതാണെന്ന് വ്യക്തമാക്കി. ചൈനീസ് യുദ്ധക്കപ്പലിന്റെ നടപടി വിമാനത്തിലെ ഉദ്യോഗസ്ഥരുടെയും ദൗത്യത്തിന്റെയും സുരക്ഷയെ അപകടത്തിലാക്കിയെന്ന് ജർമനി ആരോപിച്ചു. ലേസർ ആക്രമണത്തെ തുടർന്ന് നിരീക്ഷണ വിമാനം ദൗത്യം താൽക്കാലികമായി നിർത്തിവച്ച് ജിബൂട്ടിയിലെ താവളത്തിൽ സുരക്ഷിതമായി തിരികെ ഇറക്കി.

ഈ മാസം ആദ്യം നടന്ന ഈ സംഭവത്തെ ജർമ്മൻ പ്രതിരോധ മന്ത്രാലയവും സ്ഥിരീകരിച്ചു. ചെങ്കടൽ പ്രദേശത്ത് ഇത്തരത്തിലുള്ള ആക്രമണങ്ങൾ നേരത്തെയും റിപ്പോർട്ട് ചെയ്യപ്പെട്ടിട്ടുണ്ടെന്ന് അസോസിയേറ്റഡ് പ്രസ്സ് (എപി) വാർത്താ ഏജൻസി റിപ്പോർട്ട് ചെയ്തു. എന്നാൽ, ചൊവ്വാഴ്ച വരെ ജർമനിയുടെ ആരോപണങ്ങൾക്ക് ചൈന ഔദ്യോഗികമായി പ്രതികരിച്ചിട്ടില്ല. ബെർലിനിലെ ചൈനീസ് എംബസിയും ചൈനയുടെ വിദേശകാര്യ മന്ത്രാലയവും ഇക്കാര്യത്തിൽ മൗനം പാലിക്കുകയാണ്.

യൂറോപ്യൻ യൂണിയന്റെ നേതൃത്വത്തിലുള്ള ആസ്പൈഡ്സ് ദൗത്യം ചെങ്കടൽ, ഏദൻ ഉൾക്കടൽ, ഇന്ത്യൻ മഹാസമുദ്രം എന്നിവിടങ്ങളിലൂടെ സഞ്ചരിക്കുന്ന വാണിജ്യ, വ്യാപാര കപ്പലുകളുടെ സുരക്ഷ ഉറപ്പാക്കുന്നതിനാണ് ശ്രദ്ധ കേന്ദ്രീകരിക്കുന്നത്. ഈ ദൗത്യത്തിന് സൈനിക ലക്ഷ്യങ്ങളില്ലെന്നും ജർമനി വ്യക്തമാക്കിയിട്ടുണ്ട്.

Germany accused a Chinese warship of targeting its surveillance plane with a laser in the Red Sea, part of the EU's ASPIDES mission to protect civilian ships from Houthi threats. Germany summoned China's ambassador, condemning the act as unacceptable and a risk to safety. The plane halted its mission and safely returned to Djibouti. China has not officially responded.