തിരുവനന്തപുരം: പുനഃസംഘടനയെ തുടര്‍ന്ന് സംസ്ഥാന ബി.ജെ.പിയില്‍ ഉടലെടുത്ത ചേരിപ്പോര് ഒടുങ്ങുന്നില്ല. കേന്ദ്ര ആഭ്യന്തര മന്ത്രി അമിത് ഷാ പങ്കെടുത്ത പാർട്ടി പരിപാടികളില്‍ നിന്ന് വിട്ടുനിന്നായിരുന്നു കേന്ദ്ര സഹമന്ത്രി സുരേഷ് ഗോപിയുടെ പ്രതിഷേധം. തൃശൂര്‍ ജില്ലാ പ്രസിഡന്റായിരുന്ന കെ.കെ അനീഷ് കുമാറിനെ ജനറല്‍ സെക്രട്ടറിയാക്കണമെന്ന ആവശ്യം നടപ്പാകാതിരുന്നതാണ് സുരേഷ് ഗോപിയെ ചൊടിപ്പിച്ചത്. അടുപ്പക്കാരായ പി.ആര്‍ ശിവശങ്കരന്‍, ഉല്ലാസ് ബാബു, യുവരാജ് ഗോകുല്‍ എന്നിവരെയും പരിഗണിക്കാത്തതില്‍ സുരേഷ് ഗോപിക്ക് അസംതൃപ്തിയുണ്ട്. അമിത് ഷായുടെ അനുമതി വാങ്ങിയാണ് പരിപാടിയില്‍ നിന്ന് വിട്ടുനിന്നതെന്നാണ് സുരേഷ് ഗോപിയുമായി ബന്ധപ്പെട്ടവരുടെ വിശദീകരണം. പ്രവര്‍ത്തനമികവാണ് മാനദണ്ഡമെന്നാണ് സംസ്ഥാന ജനറല്‍ സെക്രട്ടറിമാരായ എം.ടി രമേശും എസ്. സുരേഷും പറയുന്നത്. പാര്‍ട്ടിയില്‍ തുടര്‍ന്നുവരുന്ന സാമുദായിക സന്തുലിതാവസ്ഥ ഇത്തവണ അട്ടിമറിച്ചെന്നാണ് മുരളീധരപക്ഷത്തിന്റെ വിമര്‍ശനം.

ALSO READ: അമിത് ഷാ പങ്കെടുത്ത പരിപാടികളിൽ നിന്ന് കേന്ദ്രമന്ത്രി സുരേഷ് ഗോപി വിട്ടുനിന്നു: പുതിയ ഭാരവാഹി പട്ടികയിൽ അതൃപ്തിയെന്ന് സൂചന

അതിനിടെ, കേരളത്തില്‍ ബി.ജെ.പിയെ വളര്‍ത്തിയ കെ. സുരേന്ദ്രന് കൈയടിക്കാന്‍ അമിത് ഷാ പുത്തരിക്കണ്ടത്തെ പൊതുസമ്മേളനത്തില്‍ ആഹ്വാനം ചെയ്തത് അവര്‍ പിടിവള്ളിയാക്കുകയും ചെയ്യുന്നു. വി. മുരളീധരന്‍ പക്ഷത്തെ ഭാരവാഹിപട്ടികയില്‍ വെട്ടിനിരത്തിയ വിവാദത്തിനിടെയാണ് അമിത് ഷായുടെ അഭിനന്ദനം. ഇതു റീലുകളാക്കി മുരളീധര-സുരേന്ദ്ര വിഭാഗം സമൂഹമാധ്യമങ്ങളിൽ പങ്കുവച്ചു. ഭാരവാഹിപട്ടിക പ്രഖ്യാപിച്ചതിനു പിന്നാലെ അതൃപ്തി പരസ്യമാക്കി മുരളീധരപക്ഷ നേതാവ് സി. ശിവന്‍കുട്ടി രംഗത്തെത്തിയിരുന്നു.

ALSO READ: മുരളീധരൻ പക്ഷത്തെ വെട്ടി ബിജെപി കേരള ഭാരവാഹികളെ പ്രഖ്യാപിച്ചു; ഷോൺ ജോർജും ശ്രീലേഖയും നേതൃനിരയിൽ

സംസ്ഥാന വക്താക്കളുടെ പട്ടികയില്‍ ഉല്ലാസ് ബാബുവിനെ ഉള്‍പ്പെടുത്താത്തതില്‍ സമൂഹമാധ്യമങ്ങളില്‍ ഉള്‍പ്പെടെ വ്യാപക വിമര്‍ശനം ഉയരുകയാണ്. ഉള്ളതുകൊണ്ട് തൃപ്തിപ്പെടണമെന്ന് അമ്മ പഠിപ്പിച്ചിട്ടുണ്ടെന്നാണ് ഉല്ലാസ് ബാബുവിന്റെ ഫേസ്ബുക്ക് പോസ്റ്റ്.

ഭിന്നത തുടരുന്ന പശ്ചാത്തലത്തില്‍ ദേശീയ നേതൃത്വത്തെ സമീപിക്കാനാണ് ഇരു വിഭാഗങ്ങളുടെയും തീരുമാനം.