കൊച്ചി: എംഡിഎംഎയുമായി അറസ്റ്റിലായ ഇൻസ്റ്റഗ്രാം ഇൻഫ്ലുവൻസർ റിൻസി മുംതാസിന്റെ മലയാള സിനിമാ മേഖലയിലെ ബന്ധങ്ങൾ പൊലീസ് അന്വേഷണത്തിൽ വെളിവായി. ലഹരി കേസുമായി ബന്ധപ്പെട്ട് നാല് സിനിമാ താരങ്ങളെ പൊലീസ് ഫോണിൽ ബന്ധപ്പെട്ട് വിവരങ്ങൾ ശേഖരിച്ചു. കഴിഞ്ഞ നാല് മാസമായി ഈ താരങ്ങൾ റിൻസിയുമായി സ്ഥിരമായി ഫോൺ സംഭാഷണം നടത്തിയതായി ഫോൺ രേഖകൾ പരിശോധിച്ചപ്പോൾ വ്യക്തമായി. ഒരു പ്രമുഖ സംവിധായകനെയും പൊലീസ് ചോദ്യം ചെയ്തതായി വിവരമുണ്ട്.

താരങ്ങൾ പൊലീസിനോട് പറഞ്ഞത്, സിനിമാ പ്രമോഷനുകൾക്കായാണ് റിൻസിയെ ബന്ധപ്പെട്ടതെന്നാണ്. എന്നാൽ, പൊലീസ് ഈ വാദം പൂർണമായി വിശ്വസിച്ചിട്ടില്ല. റിൻസിയുമായി പണമിടപാടുകൾ നടന്നിട്ടുണ്ടോ എന്ന് അന്വേഷിക്കുകയാണ്. റിൻസിയെ കസ്റ്റഡിയിൽ വാങ്ങാൻ ഡിസ്ട്രിക്ട് ആന്റി-നാർക്കോട്ടിക്സ് സ്പെഷ്യൽ ആക്ഷൻ ഫോഴ്സ് (ഡാൻസാഫ്) സംഘം തയ്യാറെടുക്കുന്നു.

പൊലീസിന്റെ അന്വേഷണത്തിൽ, റിൻസി സിനിമാ മേഖലയിലെ പ്രമുഖർക്ക് ലഹരിമരുന്ന് എത്തിച്ചിരുന്നതായി കണ്ടെത്തി. റിൻസിയുടെ ഇടപാടുകാർ അടങ്ങിയ ലിസ്റ്റും പൊലീസിന് ലഭിച്ചു. വാട്ട്സ്ആപ്പ് ചാറ്റുകളിൽ ലഹരി വാങ്ങലിന്റെയും വിൽപ്പനയുടെയും വിശദമായ രേഖകൾ കണ്ടെത്തി. മലയാള സിനിമയിലെ യുവതാരങ്ങൾക്കിടയിൽ റിൻസി സുപരിചിതയായിരുന്നു, തന്റെ ബന്ധങ്ങൾ ലഹരിക്കച്ചവടത്തിനായി ഉപയോഗിച്ചതായി പൊലീസ് സംശയിക്കുന്നു. നിലവിൽ റിൻസി റിമാൻഡിലാണ്.

ഇൻസ്റ്റഗ്രാം ഇൻഫ്ലുവൻസർ കൂടിയായ റിൻസി മുംതാസിനെ പൊലീസ് 'സിനിമാ മേഖലയിലെ ഡ്രഗ് ലേഡി' എന്നാണ് വിശേഷിപ്പിക്കുന്നത്. സിനിമാ പ്രമോഷൻ പരിപാടികളുടെ മറവിൽ താരങ്ങൾക്ക് ലഹരി എത്തിക്കുകയായിരുന്നു ഇവരുടെ പ്രധാന ജോലി. ഷൂട്ടിംഗ് ലൊക്കേഷനുകളിലും വൻതോതിൽ ലഹരി വിതരണം ചെയ്തതായി വിവരം ലഭിച്ചു. ലഹരി ഇടപാടുകാരുമായുള്ള റിൻസിയുടെ ചാറ്റുകൾ പുറത്തുവന്നതോടെ അന്വേഷണം കൂടുതൽ കണ്ണികളിലേക്ക് വ്യാപിച്ചു.

കാക്കനാട്ടെ റിൻസിയുടെ ഫ്ലാറ്റിൽ നടത്തിയ പരിശോധനയിൽ ഡാൻസാഫ് സംഘം 20.55 ഗ്രാം എംഡിഎംഎയുമായാണ് റിൻസിയെ പിടികൂടിയത്. ബെംഗളൂരുവിൽ നിന്ന് കൊച്ചിയിലേക്ക് രാസ ലഹരി എത്തിക്കുന്ന പ്രധാന കണ്ണിയായ യാസർ അറഫാത്തിനൊപ്പമാണ് റിൻസി അറസ്റ്റിലായത്. യാസറിനെ നിരീക്ഷിച്ചിരുന്ന ഡാൻസാഫ്, ഫ്ലാറ്റിൽ നടത്തിയ പരിശോധനയിൽ റിൻസിയുടെ ഫോൺ പരിശോധിച്ചപ്പോൾ ലഹരി ഇടപാടുകളുടെ വിശദാംശങ്ങൾ ലഭിച്ചു. ഇടപാടുകാർ സിനിമാ മേഖലയിലെ പ്രമുഖരാണെന്നും, പണം കൈമാറ്റത്തിന് ഗൂഗിൾ പേ മുതൽ ക്രിപ്റ്റോ കറൻസി വരെ ഉപയോഗിച്ചതായും പൊലീസ് കണ്ടെത്തി.