കോഴിക്കോട്: സമീപകാലത്തായി കോൺഗ്രസിനെ വെട്ടിലാക്കുന്ന ശശി തരൂർ എം.പിയുടെ നിലപാടുകൾക്കെതിരേ ഹൈക്കമാൻഡ് മൗനം പാലിക്കുമ്പോൾ സംസ്ഥാന നേതൃത്വത്തിൽ അതൃപ്തി. അടിയന്തരാവസ്ഥയെക്കുറിച്ചുള്ള ലേഖനത്തിൽ ഇന്ദിരാഗാന്ധിയെ ഉൾപ്പെടെ വിമർശിച്ചിട്ടും ദേശീയ നേതൃത്വം മൗനംപാലിക്കുന്നതിൽ അണികൾക്കും നേതാക്കൾക്കും അമർഷമുണ്ട്. എന്നാൽ, തരൂരിനെ കരുതലോടെ നിരീക്ഷിക്കുകയാണ് ദേശീയ നേതൃത്വം. 

തരൂരിന്റെ നടപടികളെ കണ്ടില്ലെന്ന് നടിക്കുന്ന നിലപാട് ശരിയല്ലെന്ന വികാരം കോൺഗ്രസിൽ ശക്തമാണ്. സംസ്ഥാനത്തെ പല മുതിർന്ന നേതാക്കളും തരൂരിനെതിരേ ഇതിനകം രംഗത്തുവന്നിട്ടുണ്ട്. കെ. മുരളീധരനാണ് തരൂരിനെതിരായ വിമർശനത്തിന് തുടക്കമിട്ടത്. പിന്നീട് കെ.സി ജോസഫ്, മുല്ലപ്പള്ളി രാമചന്ദ്രൻ, പി.ജെ കുര്യൻ തുടങ്ങിയവരും രൂക്ഷ ഭാഷയിൽ വിമർശിച്ചു. 

മുസ് ലിം ലീഗ് ഉൾപ്പെടെയുള്ള ഘടകകക്ഷികൾക്കും തരൂരിന്റെ നിലപാട് മാറ്റത്തിൽ ആശങ്കയുണ്ട്. എന്നാൽ, തരൂരിനെതിരേ പ്രതികരണം വേണ്ടെന്ന് ദേശീയ നേതൃത്വം പാർട്ടി വക്താക്കൾക്ക് കർശന നിർദേശം നൽകിയിട്ടുണ്ട്. കോൺഗ്രസിൽ പ്രതിസന്ധി പടർത്താനുള്ള തരൂരിന്റെ നീക്കത്തിന് വളംവയ്‌ക്കേണ്ടതില്ലെന്നാണ് നേതൃത്വത്തിന്റെ പൊതുനിലപാട്. തരൂർ പ്രവർത്തകസമിതി അംഗമായതിനാൽ അഭിപ്രായം പറയേണ്ടത് അഖിലേന്ത്യാ നേതൃത്വമാണെന്ന നിലപാടിലാണ് പ്രതിപക്ഷ നേതാവ് വി.ഡി സതീശനും കെ.പി.സി.സി പ്രസിഡന്റ് സണ്ണി ജോസഫും. പരസ്യമായി തരൂരിനെ തള്ളാൻ ഇവർ തയാറായിട്ടില്ല. കോൺഗ്രസ് പൂർണമായി തള്ളി പരസ്യമായി രംഗത്തിറങ്ങിയാൽ മാത്രം പ്രതികരിച്ചാൽ മതിയെന്ന നിലപാടിലാണ് ഇവർ. ഇക്കാര്യത്തിൽ ഹൈക്കമാൻഡുമായി നിരന്തരം ആശയവിനിമയം നടത്തിയാകും സംസ്ഥാന കോൺഗ്രസിന്റെ തുടർനീക്കങ്ങൾ. തരൂർ എവിടെവരെ പോകുമെന്ന് നോക്കാമെന്നും തങ്ങളായിട്ട് അതിന് പ്രാധാന്യം നൽകി വിഷയം സജീവമാക്കേണ്ടതില്ലെന്നുമുള്ള നിലപാടിലാണ് കെ.സി വേണുഗോപാൽ ഉൾപ്പെടെയുള്ളവർ. 

മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമവാർഷികദിനമായ 18ന് പുതുപ്പള്ളിയിൽ നടക്കുന്ന അനുസ്മരണ പരിപാടിയിൽ രാഹുൽ ഗാന്ധി പങ്കെടുക്കുന്നുണ്ട്. അന്നത്തെ പരിപാടിയിൽ തരൂർ എത്തുമോയെന്ന് ഉറ്റുനോക്കുകയാണ് കോൺഗ്രസ് നേതാക്കൾ. അടുത്തിടെ കോൺഗ്രസ് നിലപാടിന് വിരുദ്ധമായി നിരവധി പ്രസ്താവനകളാണ് തരൂർ നേരിട്ടും ലേഖനങ്ങളിലൂടെയും നടത്തിയത്. 

High command keeping a close eye on Tharoor Deep resentment in state Congress