കോഴിക്കോട്: കോഴിക്കോട് ജില്ലയിൽ അതിശക്തമായ മഴ തുടരുന്നതിനിടെ മരുതോങ്കര പഞ്ചായത്തിലെ തൃക്കന്തോട് ഉരുൾപൊട്ടി. ജനവാസ മേഖലയിൽനിന്ന് അകലെയാണ് ഉരുൾപൊട്ടിയത്. എന്നാൽ, സമീപത്തെ കടന്തറപ്പുഴയിൽ ജലനിരപ്പ് ഉയർന്നതിനെ തുടർന്ന് 75 കുടുംബങ്ങളെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. താഴ്ന്ന പ്രദേശങ്ങളിൽ വെള്ളം കയറുകയും തൊട്ടിൽപ്പാലം-മുള്ളങ്കുന്ന് റോഡ് വെള്ളത്തിനടിയിലാവുകയും ചെയ്തു.

ALSO READ: ചൂരൽമല - മുണ്ടക്കൈ പ്രദേശത്ത് നിരോധനം

സംസ്ഥാനത്ത് മഴ ശക്തമായതിനാൽ വയനാട്, തൃശൂർ, കാസർകോട് ജില്ലകളിലെ വിദ്യാഭ്യാസ സ്ഥാപനങ്ങൾക്ക് ജൂലൈ 17-ന് ജില്ലാ കലക്ടർമാർ അവധി പ്രഖ്യാപിച്ചു. കോഴിക്കോട് ജില്ലയിലെ സ്കൂളുകൾക്കും അവധിയാണ്. അങ്കണവാടികൾ, മദ്രസകൾ, ട്യൂഷൻ സെന്ററുകൾ എന്നിവയ്ക്കും ഈ അവധി ബാധകമാണ്.

അതിശക്തമായ മഴയെ തുടർന്ന് ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് എന്നീ ഒൻപത് ജില്ലകളിൽ ഓറഞ്ച് അലർട്ടും ബാക്കി അഞ്ച് ജില്ലകളിൽ യെല്ലോ അലർട്ടും കാലാവസ്ഥാ വകുപ്പ് പ്രഖ്യാപിച്ചു. മഴ ശക്തമായ സാഹചര്യത്തിൽ താമരശ്ശേരി, കുറ്റ്യാടി ചുരം റോഡുകളിൽ ഗതാഗത നിയന്ത്രണം ഏർപ്പെടുത്തി. അത്യാവശ്യ വാഹനങ്ങൾക്ക് മാത്രമാണ് പ്രവേശനം അനുവദിക്കുക. ഭാരമേറിയ വാഹനങ്ങൾക്ക് ചുരം റോഡുകളിൽ പ്രവേശനം നിഷേധിച്ചിട്ടുണ്ട്. പ്രദേശത്ത് പൊലീസ് പട്രോളിംഗ് ശക്തമാക്കാൻ ജില്ലാ കലക്ടർ നിർദേശം നൽകി.