കഴിഞ്ഞ മാസം എൻഡ്യുറൻസ് അത്ലറ്റ്സ് ഓഫ് തൃശൂരിന്റെ നേതൃത്വത്തിൽ സംഘടിപ്പിച്ച 12 കിലോമീറ്റർ കൂട്ടയോട്ടത്തിൽ തൃശൂർ ലൂർദ് സെന്റ് മേരീസ് യുപി സ്കൂളിലെ ഏഴാം ക്ലാസ് വിദ്യാർഥി സൽമാൻ്റെ നിഷ്കളങ്കമായ ചോദ്യം ഇങ്ങനെയായിരുന്നു. "കലക്ടർ സാറിനെ ഓടിത്തോൽപ്പിച്ചാൽ സ്കൂളിന് അവധി തരുമോ?"  സൽമാൻ തൃശൂർ ജില്ലാ കളക്ടർ അർജുൻ പാണ്ഡ്യനോട് ചോദിച്ചത്. തൃശൂരിലെ എല്ലാ കുട്ടികൾക്കും വേണ്ടി അവധി ആവശ്യപ്പെടുകയാണെന്നും സൽമാൻ കൂട്ടിച്ചേർത്തിരുന്നു.

ഓട്ടം ഫ്ലാഗ് ഓഫ് ചെയ്ത ശേഷം കലക്ടർ ഓടാൻ തുടങ്ങവേയാണ് സൽമാൻ്റെ ഈ ചോദ്യം ഉയർന്നത്. വെല്ലുവിളി സ്വീകരിച്ച കലക്ടർ അർജുൻ പാണ്ഡ്യനും സൽമാനും മറ്റ് പങ്കാളികളും ഒന്നിച്ച് സൗഹൃദ ഓട്ടം പൂർത്തിയാക്കി. ഓട്ടത്തിൽ മികച്ച പ്രകടനം കാഴ്ചവച്ച സൽമാന് പ്രത്യേക അഭിനന്ദനം നൽകിയ കലക്ടർ, മഴമൂലം അവധി പ്രഖ്യാപിക്കേണ്ട സാഹചര്യം വന്നാൽ  അവധി സൽമാന്റെ പേരിൽ നൽകാമെന്ന ഉറപ്പും നൽകിരുന്നു. ആ വാക്കാണ് ഇന്ന് തൃശ്ശൂർ ജില്ലാ കളക്ടർ പാലിച്ചിരിക്കുന്നത്.

തൃശ്ശൂർ ജില്ലാ കളക്ടറുടെ ഫേസ്ബുക്ക് പോസ്റ്റിൻ്റേ പൂർണരൂപം

തൃശ്ശൂര്‍ ജില്ലയിലെ എല്ലാ വിദ്യാഭ്യാസ സ്ഥാപനങ്ങള്‍ക്ക് നാളെ (ജൂലൈ 17) അവധി തൃശ്ശൂര്‍ ജില്ലയില്‍ ഇന്ന് ഓറഞ്ച് അലർട്ട് പ്രഖ്യാപിക്കുകയും ശക്തമായ മഴ തുടരുകയും ചെയ്യുന്ന സാഹചര്യത്തിൽ, മുന്‍കരുതല്‍ നടപടിയുടെ ഭാഗമായി നാളെ (17/7/2025) ന് ജില്ലയിലെ പ്രൊഫഷണല്‍ കോളജുകള്‍, അംഗണവാടികള്‍, നഴ്‌സറികള്‍, കേന്ദ്രീയ വിദ്യാലയങ്ങള്‍, സി.ബി.എസ്.ഇ, ഐ.സി.എസ്.ഇ സ്‌കൂളുകള്‍, ട്യൂഷന്‍ സെന്ററുകള്‍, മദ്രസകൾ ഉള്‍പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്‍ക്കും അവധി പ്രഖ്യാപിക്കുന്നു. മുന്‍കൂട്ടി നിശ്ചയിച്ച പരീക്ഷകള്‍ക്കും അഭിമുഖങ്ങള്‍ക്കും മാറ്റം ഉണ്ടായിരിക്കില്ല.

അവധി ചോദിച്ചുകൊണ്ടുള്ള മെസ്സേജുകൾ നേരിട്ടും സാമൂഹികമാധ്യമങ്ങളിലൂടെയും എന്നോട് കുട്ടികൾ ചോദിക്കാറുള്ളതാണ്.... കഴിഞ്ഞ മാസം പാലപിള്ളിയിൽ വച്ചു നടന്ന മരത്തോണിനിടെ പരിചയപ്പെട്ട ഏഴാംക്ലാസ്സുകാരൻ സൽമാന്റെ ചോദ്യവും അങ്ങനെ ഉള്ള ഒന്നായിരുന്നു..
മഴയുടെ സാഹചര്യങ്ങളും മുന്നറിയിപ്പും കണക്കിലാക്കിയാണ് അവധികൾ നിശ്ചയിക്കുന്നത്. കുറച്ചു ദിവസത്തെ ഇടവേളക്ക് ശേഷം, ഇതാ ഒരു മഴ അവധി കൂടി. ഈ മഴ അവധികൾ വീട്ടിൽ ഇരുന്നു പഠിച്ചും മറ്റു പ്രവർത്തികളിൽ ഏർപ്പെട്ടും, പുഴകളിലോ മറ്റു ജലാശയങ്ങളിലോ ഇറങ്ങാതെ വീട്ടിൽ ഇരിക്കണം എന്നഭ്യർത്ഥിക്കുന്നു. ഈ അവധി സൽമാനും, സൽമാനെ പോലെ സ്പോർട്സിനേ സ്നേഹിക്കുന്ന, എല്ലാ കൊച്ചു കൂട്ടുകാർക്കും ആയി ഡെഡിക്കേറ്റ് ചെയ്യുന്നു.
വലിയ സ്വപ്‌നങ്ങൾ കാത്തുസൂക്ഷിക്കുകയും പരിശ്രമിക്കുകയും ചെയ്യുന്ന എല്ലാ കൂട്ടുകാർക്കും, അവ യാഥാർഥ്യമാവട്ടെ എന്നാശംസിക്കുന്നു. വലിയ നേട്ടങ്ങളിലേക്ക് ഓടി കുതിക്കുവാൻ സൽമാനും സാധിക്കട്ടെ!
സ്നേഹപൂർവ്വം..
അർജുൻ പാണ്ഡ്യൻ
തൃശൂർ ജില്ലാ കളക്ടർ