ചായക്കൊപ്പം എരിവുള്ള എന്തെങ്കിലും കഴിക്കുന്നത് പലരുടെയും ശീലമാണ്. എന്നാല്‍ അതില്‍ ആദ്യം മനസിലേക്കോടി വരുന്നത് സമൂസയായിരിക്കും. ഇത് കേള്‍ക്കുമ്പോള്‍ തന്നെ നമ്മുടെ വായില്‍ വെള്ളമൂറും. ചൂടുള്ളതും  ക്രിസ്പിയുമായ സമൂസയും എരിവുള്ള ചട്ണിയും അല്ലെങ്കില്‍ മധുരമുള്ള ചട്ണിയും ഉണ്ടെങ്കില്‍ രാവിലത്തെ ഭക്ഷണമായാലും വൈകുന്നേരത്തേ ചായയാലും സുഹൃത്തുക്കളുമൊത്തുള്ള ചായ കുടിയാണെങ്കിലും നമ്മുടെ പ്ലേറ്റില്‍ സമൂസക്കൊരു സ്ഥാനമുണ്ടായിരിക്കും.

രാജ്യത്തൊട്ടാകെ ലഭ്യമായ ഈ ലഘുഭക്ഷണം യഥാര്‍ഥത്തില്‍ ഇന്ത്യക്കാരനല്ലെന്ന് എത്ര പേര്‍ക്കറിയാം. അതേ, സമൂസ ഇന്ത്യയില്‍ നിന്നുള്ളതല്ല. നൂറുകണക്കിനു വര്‍ഷങ്ങള്‍ക്കു മുമ്പ് നമ്മുടെ അടുത്തേക്ക് വന്നു നമ്മുടെ ഹൃദയങ്ങളില്‍ ഇടം നേടിയ വിദേശ അതിഥിയാണ് സമൂസ. 

എവിടെ നിന്നു വന്നു

സമൂസയുടെ ആരംഭം മിഡില്‍ ഈസ്റ്റില്‍ നിന്നാണ്. അതായത് പശ്ചിമേഷ്യയില്‍ നിന്ന്. പത്താം നൂറ്റാണ്ടില്‍ സമൂസ പോലുള്ള വിഭവങ്ങള്‍ അവിടെ ഉണ്ടാക്കിയിരുന്നതായാണ് വിശ്വസിക്കുന്നത്. പേര്‍ഷ്യന്‍ ഭാഷയില്‍ ഇതിനെ സമോസ അല്ലെങ്കില്‍ സാംബോസ എന്നാണ് വിളിച്ചിരുന്നത്. ക്രമേണ ഈ വാക്ക് സമൂസ എന്നും സമോസ എന്നുമൊക്കെ ആയി മാറി. 

ALSO READ: വീട്ടിലെ ചെടികള്‍ തഴച്ചു വളരാന്‍ ഇക്കാര്യം മാത്രം ശ്രദ്ധിച്ചാല്‍ മതി... നിറയെ കായ്ക്കുന്നതു കാണാം

അന്നത്തെ കാലത്ത് ഇറാനിയന്‍ പാചകരീതിയില്‍ ഒരു പ്രത്യേകതരം സ്റ്റഫ്ഡ് പേസ്ട്രി ഉണ്ടായിരുന്നു. അതില്‍ ഉണങ്ങിയ പഴങ്ങളോ മാംസമോ നിറച്ച് വറുത്തതോ ചുട്ടതോ ആയിരുന്നു. ഈ രൂപത്തിലാണ് ഇന്ത്യയില്‍ സമൂസയെത്തിയത്. ചരിത്രകാരന്‍മാര്‍ പറയുന്നത്, മധ്യേഷ്യയില്‍ നിന്ന് ഇന്ത്യയിലേക്ക് വരുന്ന വ്യാപാരികളും രാജകീയ പാചകക്കാരും ഈ വിഭവത്തെ ഇന്ത്യയിലെത്തിച്ചിരുന്നു. അങ്ങനെ ഇത് നമ്മുടെ അടുക്കളയിലും എത്തി. 

ഇന്ത്യയിലെ സമോസ എങ്ങനെയാണ് മാറിയത്

വിദേശ സമൂസയില്‍ മാംസവും പരിപ്പുമായിരുന്നെങ്കില്‍ ഇന്ത്യയിലെത്തിയതോടെ പ്രാദേശിക മണ്ണിന്റെ രുചിയും സമോസയെ സ്വാധീനിച്ചു. ഇന്ത്യക്കാര്‍ ഇത് സസ്യാഹാരമാക്കി. ഇന്ത്യയില്‍ ധാരാളമായി ഉരുളക്കിഴങ്ങും സുഗന്ധ വ്യഞ്ജനങ്ങളും ഉള്ളതിനാല്‍ ഗരംമസാല, പച്ചമുളക്, മല്ലിയില, ഇഞ്ചി, ഉള്ളി തുടങ്ങിയവയിട്ടും സമൂസ വിഭവമൊരുങ്ങി. താമസിയാതെ ഈ ലഘു ഭക്ഷണം എല്ലാ തെരുവുകളിലും മുക്കിലും മൂലയിലും ചായക്കടകളിലും വിവാഹങ്ങളിലും ഉത്സവങ്ങളിലുമൊക്കെ പ്രധാനപ്പെട്ട ഭക്ഷണമായി മാറി. 

എന്ത് കൊണ്ടാണ് ഇതിന് ത്രികോണാകൃതി

സമൂസയുടെ ത്രികോണാകൃതി തന്നെയാണ് അതിന്റെ ഐഡന്റിറ്റി. ഇതിനു പിന്നില്‍ ചരിത്രപരമായ കാരണമൊന്നുമില്ലെങ്കിലും പേര്‍ഷ്യന്‍ സംസ്‌കാരത്തിന്റെ ഒരു സമ്മാനമാണെന്ന് വിശ്വസിക്കപ്പെടുന്നു. 

രുചികളിലെ മാറ്റം

കാലക്രമേണ സമൂസയിലും നിരവധി മാറ്റങ്ങള്‍ വന്നു തുടങ്ങി. ഇതില്‍ വെജ് സമൂസ, ചിക്കന്‍ സമൂസ, ബീഫ് സമോസ, ചീസ് സമോസ, മിക്‌സ് വെജ് സമോസ, പനീര്‍ സമോസ, ചോക്ലേറ്റ് സമൂസ മാഗി സമോസ തുടങ്ങിയവയും വിപണിയില്‍ ലഭ്യമാണ്. വിദേശിയാണെങ്കിലും ഇന്ത്യക്കാരനായി മാറിയ സമൂസയുടെ രുചി കൊട്ടാരങ്ങളിലും റോഡരികിലെ ഉന്തുവണ്ടികളിലും വരെ എത്തി ഹൃദയം കീഴടക്കി. ഏതു കാലവസ്ഥയായാലും സമൂസ തന്നെ സൂപ്പര്‍. 

Summary:
Pairing something spicy with tea is a favorite habit for many — and for most, the first thing that comes to mind is the crispy, golden samosa. Whether it’s breakfast, evening tea, or a gathering with friends, the samosa holds a cherished place on our plates. But did you know this beloved snack is not originally from India?