കൊച്ചി: മന്ത്രവാദവും ആഭിചാര കർമങ്ങളും നിയന്ത്രിക്കുന്നതിന് നിയമനിർമാണം നടത്തുമെന്ന് സംസ്ഥാന സർക്കാർ ഹൈക്കോടതിയിൽ വ്യക്തമാക്കി. നേരത്തെ നിയമ നിർമാണത്തിൽ നിന്ന് പിന്മാറ്റം സൂചിപ്പിച്ച നിലപാട് തിരുത്തി, ആഭ്യന്തര വകുപ്പ് പുതിയ സത്യവാങ്മൂലം സമർപ്പിച്ചു. നിയമപരവും ഭരണഘടനാപരവുമായ സങ്കീർണതകൾ കാരണം മന്ത്രിസഭാ ചർച്ച മാറ്റിവച്ചതാണെന്നും, എന്നാൽ നിയമനിർമാണം പരിഗണനയിലുണ്ടെന്നും സർക്കാർ അറിയിച്ചു.

ചീഫ് ജസ്റ്റിസ് നിതിൻ ജാംദാർ, ജസ്റ്റിസ് ബസന്ത് ബാലാജി എന്നിവരുൾപ്പെട്ട ഡിവിഷൻ ബെഞ്ച്, ഈ സങ്കീർണതകൾ എന്തൊക്കെയാണെന്ന് വിശദമാക്കാൻ സർക്കാരിനോട് നിർദേശിച്ചു. കഴിഞ്ഞ അഞ്ച് വർഷത്തിനിടെ മന്ത്രവാദവും ആഭിചാരവുമായി ബന്ധപ്പെട്ട് എത്ര കേസുകൾ രജിസ്റ്റർ ചെയ്തു, നിലവിലുള്ള നിയമങ്ങൾ പ്രകാരം അവ എങ്ങനെ കൈകാര്യം ചെയ്തു എന്നതിന്റെ വിശദാംശങ്ങളും സമർപ്പിക്കാൻ കോടതി ആവശ്യപ്പെട്ടു. ഹരജി ഓഗസ്റ്റ് 5-ന് വീണ്ടും പരിഗണിക്കും.

ALSO READ: ഭാസ്കര കാരണവർ വധക്കേസ്: നല്ലനടപ്പും സ്ത്രീയെന്ന പരിഗണനയും; ഷെറിനെ വിട്ടയക്കാനുള്ള മന്ത്രിസഭാ തീരുമാനം ഗവർണർ അംഗീകരിച്ചു;  പ്രതിക്ക് ഉടൻ ജയിൽമോചനം

നേരത്തെ, ആഭ്യന്തര വകുപ്പ് ഡെപ്യൂട്ടി സെക്രട്ടറി സമർപ്പിച്ച സത്യവാങ്മൂലത്തിൽ, മന്ത്രവാദത്തിനും ആഭിചാര കർമങ്ങൾക്കുമെതിരെ നിയമനിർമാണത്തിൽനിന്ന് പിന്മാറിയതായി സൂചിപ്പിച്ചിരുന്നു. ഇതിനെതിരെ കോടതി, ദുരാചാരങ്ങളെ സർക്കാർ അംഗീകരിക്കുകയാണോ എന്ന് ചോദ്യം ഉന്നയിക്കുകയും ഉന്നത ഉദ്യോഗസ്ഥന്റെ മറുപടി ആവശ്യപ്പെടുകയും ചെയ്തിരുന്നു. തുടർന്നാണ് ആഭ്യന്തര വകുപ്പ് അഡിഷനൽ ചീഫ് സെക്രട്ടറി ബിശ്വനാഥ് സിൻഹ പുതിയ സത്യവാങ്മൂലം സമർപ്പിച്ചത്.

The Kerala government revised its stance in the High Court, affirming that it is considering legislation to regulate black magic and sorcery. Addressing legal and constitutional complexities, the Home Department submitted a new affidavit, clarifying it has not withdrawn from the plan. The court directed the government to detail these complexities and provide data on related cases over the past five years. The matter is set for further hearing on August 5