ദുബൈ: പുതിയ കാറുകളും മറ്റു നാലു ചക്ര വാഹനങ്ങളും റോഡില്‍ ഇറങ്ങുന്നത് രാജ്യത്ത് അനുദിനം വര്‍ധിക്കുകയാണ്. എന്നാല്‍ ഇത് ഗതാഗതക്കുരുക്ക് വര്‍ധിക്കാന്‍ കാരണമാകുകയാണ്. തിരക്കേറിയ സമയങ്ങളില്‍, പ്രത്യേകിച്ച് സ്‌കൂള്‍ വിടുന്ന സമയങ്ങളിലും ഓഫീസ് യാത്രാ സമയങ്ങളിലും, ദുബൈ, ഷാര്‍ജ തുടങ്ങിയ നഗരങ്ങളിലെ പ്രധാന റോഡുകള്‍ വാഹനങ്ങളാല്‍ സ്തംഭിക്കുന്ന കാഴ്ച പതിവാണ്. 2024ല്‍ ദുബൈയില്‍ ദിനംപ്രതി 3.5 ദശലക്ഷം വാഹനങ്ങള്‍ റോഡുകളിലുണ്ടായിരുന്നുവെന്ന് റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി (ആര്‍ടിഎ) റിപ്പോര്‍ട്ട് ചെയ്യുന്നു. കഴിഞ്ഞ രണ്ട് വര്‍ഷത്തിനിടെ ഇക്കാര്യത്തില്‍ 10% വര്‍ധനവാണ് ഉണ്ടായിരിക്കുന്നത്.

ALSO READ: മിര്‍ദിഫില്‍ ബ്ലൂ ലൈന്‍ മെട്രോ നിര്‍മ്മാണം ആരംഭിക്കുന്നു; ഡ്രൈവര്‍മാര്‍ക്ക് മുന്നറിയിപ്പുമായി ദുബൈ ആര്‍ടിഎ

ഗതാഗതക്കുരുക്കിന്റെ വെല്ലുവിളി

ലോകോത്തര നിലവാരമുള്ള 12 വരി ഹൈവേകള്‍, ഫ്‌ലൈഓവറുകള്‍, അണ്ടര്‍പാസുകള്‍ എന്നിവ ഉണ്ടെങ്കിലും, ഗതാഗതക്കുരുക്ക് യുഎഇയില്‍ ദൈനംദിന ജീവിതത്തിന്റെ ഭാഗമാണ്. കൂടുതല്‍ റോഡുകള്‍ നിര്‍മ്മിക്കുന്നുണ്ടെങ്കിലും, ഓരോ വര്‍ഷവും പുതിയ വാഹനങ്ങള്‍ റോഡിലെത്തുന്നതിനാല്‍ പ്രശ്‌നം തുടരുകയാണ്. റോഡ്‌സേഫ്റ്റി യുഎഇയുടെയും അല്‍ വത്ബ ഇന്‍ഷുറന്‍സിന്റെയും സര്‍വേ പ്രകാരം, യുഎഇയിലെ 86% ആളുകള്‍ ഗതാഗതക്കുരുക്ക് നേരിടുന്നു. ദുബൈയില്‍ 91 ശതമാനവും ഷാര്‍ജയില്‍ 90 ശതമാനവും ആളുകള്‍ ഗതാഗതക്കുരുക്ക് നേരിടുന്നു എന്നാണ് കണക്കുകള്‍ വ്യക്തമാക്കുന്നത്. 

60% വാഹനങ്ങളിലും ഒരു യാത്രക്കാരന്‍ മാത്രമേ ഉള്ളൂ എന്നും കണക്കുകള്‍ വ്യക്തമാക്കുന്നു. ഇത് റോഡുകളിലെ തിരക്ക് കൂട്ടുന്നു. ഷാര്‍ജയില്‍ നിന്ന് ദുബൈയിലേക്ക് യാത്ര ചെയ്യുന്ന കോശിയെ പോലുള്ളവര്‍ ഗതാഗതക്കുരുക്ക് ഒഴിവാക്കാന്‍ രാവിലെ 5:30ന് പുറപ്പെടുന്നു. എന്നിട്ടും, വൈകുന്നേരങ്ങളില്‍ രണ്ട് മണിക്കൂര്‍ വരെ ട്രാഫിക് ജാമില്‍ കുടുങ്ങുന്നു. 

'വൈകുന്നേരം വീട്ടിലേക്ക് മടങ്ങാന്‍ ഒരുപാട് സമയം റോഡില്‍ ചെലവഴിക്കേണ്ടി വരുന്നു,' അദ്ദേഹം പറയുന്നു.

പൊതുഗതാഗതം; ഒരു പരിഹാരം

ഗതാഗതക്കുരുക്കിന് ഏറ്റവും ഫലപ്രദമായ പരിഹാരമാണ് പൊതുഗതാഗത സംവിധാനങ്ങള്‍. യുഎഇയിലെ ഓരോ എമിറേറ്റും സ്വന്തം ഗതാഗത ശൃംഖലകള്‍ വാഗ്ദാനം ചെയ്യുന്നു. ദുബൈ ആര്‍ടിഎ, അബൂദബി മൊബിലിറ്റി സെന്റര്‍, ഷാര്‍ജയുടെ മുവാസലാത്ത് എന്നിവ ബസുകള്‍, ടാക്‌സികള്‍, ഇന്റര്‍സിറ്റി ഗതാഗതം എന്നിവ കുറഞ്ഞ നിരക്കില്‍ പ്രദാനം ചെയ്യുന്നു. അജ്മാന്‍, റാസല്‍ ഖൈമ, ഫുജൈറ എന്നിവിടങ്ങളിലും സമാനമായ ശൃംഖലകള്‍ പ്രവര്‍ത്തിക്കുന്നു. മൊബൈല്‍ ആപ്പുകള്‍ വഴി ടാക്‌സി, ബസ് സേവനങ്ങള്‍ എളുപ്പത്തില്‍ ലഭ്യമാണ്.

ദുബൈ മെട്രോ ഇതിന് ഒരു മികച്ച ഉദാഹരണമാണ്. 2024ല്‍ 275.4 ദശലക്ഷം യാത്രക്കാരാണ് മെട്രോ ഉപയോഗിച്ചത്. ദുബൈയിലെ അക്കൗണ്ടന്റായ ശങ്കര്‍ കെ., മുഹൈസിനയില്‍ നിന്ന് റാഷിദിയയിലെ സെന്റര്‍പോയിന്റ് സ്റ്റേഷനില്‍ വാഹനം പാര്‍ക്ക് ചെയ്ത് മെട്രോയില്‍ ജെഎല്‍ടിയിലേക്ക് യാത്ര ചെയ്യുന്നു. 'മെട്രോ ഉപയോഗിക്കുന്നതിലൂടെ ഇന്ധനവും സാലിക്കും മാത്രമല്ല ഞാന്‍ ലാഭിക്കുന്നത്. ഇതിലൂടെ എനിക്ക് പാര്‍ക്കിംഗ് സ്ഥലം തേടേണ്ട ആവശ്യവുമില്ല,' അദ്ദേഹം പറയുന്നു.

ബ്ലൂ ലൈനും ഇത്തിഹാദ് റെയിലും

2029ല്‍ പ്രവര്‍ത്തനം ആരംഭിക്കുന്ന ദുബൈ മെട്രോ ബ്ലൂ ലൈന്‍, മിര്‍ദിഫ്, ദുബൈ ക്രീക്ക് ഹാര്‍ബര്‍, സിലിക്കണ്‍ ഒയാസിസ് തുടങ്ങിയ മേഖലകളെ ബന്ധിപ്പിച്ച് ഗതാഗതക്കുരുക്ക് കുറയ്ക്കും. ദുബൈ മറീനയെ ജുമൈറ ബീച്ച് റെസിഡന്‍സുമായി ബന്ധിപ്പിക്കുന്ന ട്രാം, പാം മോണോറെയില്‍ എന്നിവയും ഗതാഗത ഓപ്ഷനുകള്‍ വര്‍ധിപ്പിക്കുന്നു.

2026ല്‍ പ്രവര്‍ത്തനം ആരംഭിക്കുന്ന ഇത്തിഹാദ് റെയില്‍ വഴി അബൂദബിയില്‍ നിന്ന് ഫുജൈറയിലേക്ക് രണ്ട് മണിക്കൂറും അബുദാബിയില്‍ നിന്ന് ദുബൈയില്‍ എത്താന്‍ അര മണിക്കൂറും മതിയാകും.

ALSO READ: ദുബൈയിൽ ഊബർ-ബൈഡു സഹകരണത്തോടെ ഓട്ടോണമസ് റോബോ ടാക്സികൾ ഉടൻ

ജലഗതാഗതത്തിലും വളര്‍ച്ച

അബൂദബിയിലെ ഫെറികളും വാട്ടര്‍ ടാക്‌സികളും മാര്‍സ മിന, ലൂവ്രെ അബൂദബി, യാസ് മറീന തുടങ്ങിയ സ്ഥലങ്ങളെ ബന്ധിപ്പിക്കുന്നു. ദുബൈയില്‍, ദെയ്‌റ, ബര്‍ ദുബായ്, മറീന മാള്‍, പാം ജുമൈറ തുടങ്ങിയ സ്ഥലങ്ങളെ ജലഗതാഗതം വഴി ബന്ധിപ്പിക്കുന്നു. അജ്മാനിലെ അബ്രകളും സമാനമായ സേവനങ്ങള്‍ നല്‍കുന്നു.

To tackle growing traffic congestion, the UAE is expanding its metro networks and accelerating Etihad Rail projects, offering residents more public transport options and improved connectivity.