തിരുവനന്തപുരം: സംസ്ഥാനത്ത് തെരുവുനായ്ക്കളെ നിയന്ത്രിക്കാൻ പുതിയ നീക്കവുമായി സർക്കാർ. രോഗബാധിതരായ തെരുവുനായ്ക്കളെ 'ദയാവധ'ത്തിന് വിധേയമാക്കാൻ തദ്ദേശ സ്ഥാപനങ്ങൾക്ക് അനുമതി നൽകും. വെറ്ററിനറി വിദഗ്ധന്റെ സാക്ഷ്യപത്രം ലഭിച്ചശേഷമാണ് നായ്ക്കളെ ദയാവധത്തിന് വിധേയമാക്കേണ്ടത്. മൃഗസംരക്ഷണ, തദ്ദേശ, നിയമ വകുപ്പുകളുടെ സംയുക്ത ചർച്ചയ്ക്കു ശേഷമാണ് തദ്ദേശ സ്വയംഭരണ മന്ത്രി എം.ബി രാജേഷ് ഇക്കാര്യം അറിയിച്ചത്.

ആനിമൽ ഹസ്ബൻഡറി പ്രാക്ടീസസ് ആൻഡ് പ്രൊസീജേഴ്സ് റൂൾസ് സെക്ഷൻ 8(എ) പ്രകാരം ഗുരുതര രോഗമുള്ളതോ അപകടം പറ്റിയതോ ആയ നായ്ക്കളെ ദയാവധത്തിന് വിധേയമാക്കാനാണ് തീരുമാനം. തെരുവുനായ വന്ധ്യംകരണത്തിന് തദ്ദേശ വകുപ്പ് 152 ബ്ലോക്കുകളിലായി മൊബൈൽ പോർട്ടബിൾ എ.ബി.സി കേന്ദ്രങ്ങൾ ആരംഭിക്കുമെന്നും വാക്‌സിനേഷനായി ഓഗസ്റ്റിൽ വിപുലമായ യജ്ഞം നടത്തുമെന്നും മന്ത്രി പറഞ്ഞു. മൊബൈൽ എ.ബി.സി കേന്ദ്രങ്ങളുടെ പ്രവർത്തനം നിരീക്ഷിക്കാൻ തദ്ദേശ സ്ഥാപന തലത്തിൽ ജനകീയ കമ്മിറ്റി രൂപീകരിക്കും. കേന്ദ്രങ്ങളുടെ പ്രവർത്തനം തടസപ്പെടുത്തുന്നവർക്കെതിരേ സി.ആർ.പി.സി 107, ഐ.പി.സി 186 വകുപ്പുകൾ പ്രകാരം നടപടി സ്വീകരിക്കാൻ പൊലിസിന് നിർദേശം നൽകുമെന്നും മന്ത്രി പറഞ്ഞു.

ALSO READ: ഇന്ത്യന്‍ കുതിപ്പിനുള്ള ചിറക്

പോർട്ടബിൾ എ.ബി.സി യൂനിറ്റിന് 28 ലക്ഷം രൂപയാണ് ചെലവ്. ഓഡർ നൽകി ലഭ്യമാക്കാൻ രണ്ടുമാസം വേണം. ഇക്കാലയളവിൽ യൂനിറ്റുകൾ പ്രവർത്തിപ്പിക്കാൻ അനുയോജ്യ സ്ഥലം തദ്ദേശ സ്ഥാപനം കണ്ടെത്തും. ബ്ലോക്കുകളിൽ വിന്യസിക്കുന്നതിനു മുന്നോടിയായി മൃഗസംരക്ഷണ വകുപ്പിന്റെ നേതൃത്വത്തിൽ ഒരു യൂനിറ്റ് ഉപയോഗിച്ച് തിരുവനന്തപുരം ജില്ലയിലെ നെടുമങ്ങാട് പൈലറ്റ് സ്റ്റഡി നടത്തും. സ്ഥിരം എ.ബി.സി കേന്ദ്രങ്ങളേക്കാൾ ചിലവ് കുറവാണിവയ്ക്ക്. പട്ടിപിടിത്തത്തിൽ മൃഗസംരക്ഷണ വകുപ്പിന്റെ പരിശീലനം നേടിയ 158 പേരുണ്ട്. തദ്ദേശ സ്ഥാപനങ്ങൾ കുടുംബശ്രീ മുഖേന കൂടുതൽ പേരെ കണ്ടെത്തും. എ.ബി.സി കേന്ദ്രത്തിനായി പട്ടിയെ പിടിക്കുന്നവർക്ക് 300 രൂപ നൽകും. എ.ബി.സി ചട്ടങ്ങളുടെ ഇളവിന് കേന്ദ്രത്തെ സമീപിക്കുമെന്നും മന്ത്രി അറിയിച്ചു.